Read Karbi 2 PITOR 2 Bible Online

2 PITOR 2 - Karbi bible

2 PITOR 2

¹Aphrang ahut monit atum ang-bong ahok-he akethanmek atum nangklang-lo. Lasonthak thaksi non nanglitum angbongta ahok-he alam kethan atum nangklangji. Halatum kepavirthek ahok-he alam thanji. Halatum aphan kepajok abang aphanta halatum Hemphu pu hanghe-detji, lapen lasonsi halatum menmen amethang akevir chevanji.

²Ake-ongpi atum halatum ason aderi-mate akam klemdunji. Lasi anut kaprek atum ke halatum keklem akam pen apot ahok a-Tovar aphan pinremji.

³La ahok-he alam kethan atum amek keplengple pen ajok amethang methang kepinchongchot atomo thansi nanglitum aphan rotsoji. Hako ahut penta halatum aphan ado padosi kepavirdetji aphan pathiktang-lo. Halatum aphan kepavirji abang ke amek jangjoije. Alangli kepathiktang ateng klemvekji.

⁴Pima Arnam jongsi hala pap keklem sining apherangke atum aphanta rairedet-lo, bonta chom arlo varchuilo, lapen Kangsai Arni nang-leletik an halatum aphan hadak kangting angbongsi ingnangcheksi bilo;

⁵Arnam jongsi hako apirthe aphan rairedet-lo, bonta dhoromime amonit atum apirthe athak langthepi vanlo, lapen halabangso ahut dhoromi alam kethan abang, Noah lapen akaprek bang throksi aphansi pajokchot-lo;

⁶Jongsi Sodom lapen Gomorrah arongsopi aphan ado padosi me pen pavirdet-lo, lapen lasonsi dhoromime atum kephoji angthek paklang-lo;

⁷lapen alangli jongsi hala dhoromipet lapen kehingno atum keklemthap apot aning aduk kedo abang, Lot aphan pajok-lo,

⁸atheke labangso dhoromi amonit hala kehingno atum angbong dodunlo lapen halatum arni arni kehingno keklem thek dunlongsi aning aduk do-olo;

⁹tangte Hemphu-ke dhoromi atum aphan asat hei hei pen pajokthek, lapen Kangsai Arni nangleletik an dhoromime atum aphan kesung angbong kebijita thek,

¹⁰lapen jasemet ke ok anat kangthirthe akam aning kehang lapen Arnam ajakong aphan kelangret atum aphan kesung angbong kebiji alangli thek. La ahok-he alam kethan atum ke angthin thebui, chingkinopik lapen adak atur kedo atum aphan kepinremji pherere.

¹¹Bonta sining apherangke atum ke la ahok-he alam kethan atum apar ingtangmu lapen ajakong themulo setta Hemphu angno halatum aphan pinrem haihe.

¹²Labangso amonit atum ke, hala bang chonepcheksi kepathilotji aphan ansi kephichot, amut kave, angthin kave amarat api atum asonthak thak-lo. Latum kechininepin alam aphan pinrem. Latum ke hala marat api atum asonthak thaksi virdetji.

¹³Latum bang aphan kepasung apot kesung phoji. Nerlosini sini chojunsi kehurithap helo ning arong kechepi akamlo pusi latum mathalo. Latum nanglitum along nangkechodun nangkejundun ahut a-ot kave pen ajok therakrap meme lapen manta ave-idet. Latum nanglitum aphan nangkepaphola pen aning arong.

¹⁴Latum beisa kechoklemji aning kehang pensi arloso atum aphan kelang. Latum pap keklem kaita dor un-e. Kekroi athir kave atum aphan latum chomosoi. Mek keplengpledetjisi latum aning charli pametang-lo. Latum ke Arnam ahirjuno angbongsi dolo.

¹⁵Latum ahok atovar pen suisi Avive atovar damrong-lo. Latum Beor asopo Balaam kechoklem asonsi kecharlidun, atheke labangso a-Balaam ke kehingno akam kechoklem pensi ale kechepalongji aning kehang.

¹⁶Labangso a-Balaam pap keklem apot tam long-lo, atheke alam kave agadha monit ase pen ningjesi labangso akethanmek abang aphan khangsi kepangcham akam paklem longledet-lo.

¹⁷Labangso amonit atum ke kethep-hak alangso lapen tomon kejappon anghun hei hei asonthak thak-lo. Arnam latum aphan kangtingpik aherangpi thikpitang-lo.

¹⁸Latum thangbakbe kelu alam pensi chepindak-lo, lapen kehingno, aderi-mate akam pensi hala nonhetsi kehingno keklem atum angbong pen kejok-lang atum aphan chomosoilo.

¹⁹Latum halatum aphan kepajokji alam chechak, bonta alangtum methang amatta kevir aban atumlo. Pima inut amonit aphan kopine ason haidet lote alangli ke halabangso ason abanlo.

²⁰Monit atum Hemphu lapen kepajok abang, Jisu Khristo aphan kechini pen ajok pirthe kepahingnothek ajakong pen jokphlot setta aphi lahei hei akehingno along damthura chingnangdamsi kehingno pahai longdet lote latum aphrang apar hingno muchot cheplang.

²¹Latum ahok atovar chinidet aphi Arnam kepi ahukum kangthir che-osi kecheruithu apar la aphrang pen kechininedet khangjang abangsi latum aphan memuji apot-lo.

²²Ahok asarlamthe kepu, “Methan ke amethang keching-oktang apotta chechothu,” lapen, “Phak aphan ke lang-le panglu-et setta inghan chitutdamthu,” pu asonsi latum cheplangdet-lo.