Read Karbi 2 PITOR 3 Bible Online

2 PITOR 3 - Karbi bible

2 PITOR 3

¹Neli kechinghon atum, labangso aloh ke neli nanglitum aphan batai hini aphong nangketok aloh-lo. Neli la pakni aloh pen nanglitum aphan lahei hei alam pachemathathusi nanglitum aning arlo ahok akematha kepadoji aphan ning nangkeparungjisi bor-ilo.

²Hako ahut Arnam amontri kangthir atum keputekang alam hei hei lapen ketoitang atum nang kethantang, Hemphu lapen Kepajok a-Bang ahukum nanglitum kechemathathujisi neli ning hang-lo.

³Aphrangsi nanglitum labangso alam chininon, mo kejut arni hei hei ahut kepinrem atum nangklangji. Halatum amethang methang akehingno aning kehang atengsi klemji. Halatum nanglitum aphan putot pusitji.

⁴Lapen halatum nanglitum aphan arjuji, “Alangli vangthuji pusi chak-lo, kalima? Tangte alangli konat-lo? Ilitum aphusar atum thilir tang-lo, bonta kadokave asonta ha pirthe kepinchong ahut asonthotsi non anta dobomlang!”

⁵Hako ahut Arnam hukum pisi sining lapen pirthe pinchong-lo pu alam, lang angbong pen lapen lang pensi pirthe pinchong-lo pu alam,

⁶lapen lang pensi, atheke langthepi pensi halabangso ahut apirthe aphan panglumsi pavirlo pu alam,

⁷mo me pen kepavirdetji aphansi non kedobom asining hei hei lapen apirthe aphan hala esonpet Arnam ahukum pensi padobomlo, lapen mo dhoromime amonit atum aphan kangsaiji lapen kepavirji ahut aphansi lahei hei aphan bibomlo pu alam halatum amethang aning kehang pensi ketengnelo.

⁸Bonta neli kechinghon atum, nanglitum eson alam tengneri! Alam ke lahelo, Hemphu angno ke arni isita ningkan suri isi asonthak thak, lapen ningkan suri isita arni isi asonthak thak-lo.

⁹Hemphu-ke ame-thang kechaktang ason kepapleng pader-o pusi komanene atum mathalo. Bonta lake ahok kali. Pima Hemphu-ke amethang kechaktang ason kepapleng kepader-o abang kali. Baduta kevirvedetji lapen kadokave atumta aning kecheruithekji aphansi alangli kechepaningdingchot.

¹⁰Bonta kanghu kevang asonthak thaksi Hemphu Arni vangji. Halabangso Arni kangrengkrung arki dosi sining hei hei avedetji, lapen la angbong kedo amar hei hei aphan me pachosi pavirdetji. Lasonsi pirthe lapen la athak kedo an aphan me chodetji.

¹¹Jongsi lahei hei kadokave aphan lasonsi pavirdetji tangte nanglitum kopuson amonit plang nangjima? Nanglitum ingthir-et pen lapen dhoro-mipet pen do-thaksi

¹²Arnam Arni aphan inghongding nangji, lapen labangso Arni nangkepale dapprangji aphan un an klem nangji. Labangso Arni ahut sining hei hei aphan me pachosi pavirdetji, lapen sining angbong kedo ason an me angtang pen ajok ingjir-etji.

¹³Bonta Arnam kechaktang ason, atheke sining kemi hei hei lapen pirthe kemi aphansi ilitum chonghongphrong-lo. Lahei hei ke Arnam aning kehang ateng keklem pame atum kedo adimlo.

¹⁴Tangte lahelo, neli kechinghon atum, nanglitum labangso Arni aphan kanghongphrong ahut nangli-tum Arnam angno kangthir-etji lapen thang akelet kavedetjile, lapen alangli pen ning kechingsamjin pen kedojile un an bor-inon.

¹⁵Hemphu aning kechepading ke nanglitum kejok kelongji aphan apor keme nangkepilo pule mathanon. Lasonsi kechinghon akorte Polta Arnam pen kelong agian pen nanglitum aphan tok-lo.

¹⁶Alangli labangso alam aphuthak ketok aloh along anta lason alamsi tok-lo. Alangli ketok aloh hei hei along kechini sungkrung alam hei hei do. Kelu lapen kangthirthe atum ke hastro along kedo akaprek kaprek alam hei hei athe kethan kepajirmidam pachokchedet asonthotsi lahei hei alam athe kethan kepajirmidamta pachokchedet-lo. Lasonsi halatum amethang methang akevir chevanlo.

¹⁷Bonta neli kechinghon atum, nanglitum ke labangso alam aphrang pen chinitang-lo. Lasi hukum kekroikre amonit atum ahok-he alam kethan along nanglitum kepholadundedetsi nanglitum akethirklong pen keklokle-detjile langpamenon.

¹⁸Bonta e-Hemphu lapen ekepajok abang, Jisu Khristo akangjinso pen lapen alangliphan akechini penle nanglitum theponbomnon. Non lapen kejut un-e akai apar akai anta alangli dak atur pathenang! Amen.