Read Karbi 1 JON 2 Bible Online

1 JON 2 - Karbi bible

1 JON 2

¹Neli kechinghon asomar atum, nanglitum pap keklemkledetji aphansi neli nanglitum aphan labangso alam nangtok-lo. Bonta komane abang jongsi pap klemlo tangte, ilitum aphan Po Arnam along ekechoningripi abang do, alangli ke dhoromipet abang, Jisu Khristo helo.

²Lapen Khristo amethang amatsi ilitum apap hei hei kepakak-i athok-lo, lapen lake ilitum apap kepakak-i athokchot kali, bonta lake anut-tin apap kepakak-i athok-lo.

³Ilitumle Arnam ahukum hei hei kroi lote ilitum alangliphan chini pu puthek pame.

⁴Komane abang jongsi alangliphan chini pusi pulo setta alangli hukum hei hei kroikre tangte alangli ke kepacherei abang-lo, lapen ahok alangli ning arlo ave.

⁵Bonta alangli lam kekroi abang aning arlo ke Arnam akanghon chok-limtang-lo.

⁶Arnam pen chelangpet-lo pu kechepu abang aling ke Jisu Khristo kedo kethak asonthotsi kengkam chejorra do-thak nangji, lapen labangso pen ajoksi ili Arnam pen chelangpet-lo pu chini pame thekji.

⁷Neli kechinghon atum, la neli nanglitum aphan nangketok ahukum ke akemi ahukum kali, lake kechengsi ahut pen nanglitum kelongtang, aban ahukumlo. Labangso ahukum ban ke nanglitum karjulongtang alamlo.

⁸Tebonseta lake Jisu Khristo akai angbong lapen nanglitum akai angbong ahok pen klang-lo apotsi langdam lote la nanglitum aphan nangketok ahukum ke hukum kemilo, Pima akangting avebomlo lapen akethe-ang non amat turbong-bomtang-lo.

⁹Badutame, akethe-ang angbongsi do pusi chepulo setta akorte aphan lang seletbom tangte alangli ke non anta akangting angbongsi dolang.

¹⁰Akorte aphan kechinghon abang ke akethe-ang angbongsi do, lapen lasi alangli long ke komane aphan pap kepaklem-i amar ave.

¹¹Bonta akorte aphan kechelang selet abang ke akangting angbongsi do. Alangli ke akangting angbongsi kedam, lapen alangli konatsi kedamma, lake alangli chechinine. Pima kangting alangli mek pachecharchedet-lo.

¹²Neli kechinghon osomar atum, Khristo pen apot nanglitum apap hei hei diyatang-lo apotsi neli nanglitum aphan labangso alam nangtok-lo.

¹³Apo atum, kecheng pen kedover abang aphan nanglitum chinilo apotsi neli nanglitum aphan nangtok-lo. Risomar atum, nanglitum kehingno abang aphan haidet-lo apotsi neli nanglitum aphan labangso alam nangtok-lo.

¹⁴Neli kechinghon osomar atum, nanglitum Po aphan chinilo apotsi neli nanglitum aphan labangso alam nangtok-lo. Apo atum, kecheng pen kedover abang aphan nanglitum chinilo apotsi neli nanglitum aphan labangso alam nangtok-lo. Risomar atum, nanglitum ajakong the-o, nanglitum aning arlo Arnam alam do lapen nanglitum kehingno abang aphan haidet-lo apotsi neli nanglitum aphan labangso alam nangtok-lo.

¹⁵Nanglitum pirthe, kalite pirthe amar chinghonri. Komane abang jongsi pirthe aphan inghonlo tangte alangli ning arlo Po aphan akanghon ave.

¹⁶Pirthe amar an, atheke ok aning kehang akam, mek kethek-lok aling ning kehang akam lapen monit atum kechepindak-i ason anke Po along penle kevang kali, bonta pirthe pensi kevang.

¹⁷Pirthe lapen la athak kedo, monit atum kar-i amar an avebomlo. Bonta Po aning kehang ateng keklem abang ke kaiketa dover.

¹⁸Neli somar atum, kejut tebok-het-lo! Khristo ahotur vangji pusi nanglitum aphan nangthanlo, lapen non Khristo ahotur atum nangklang-olo. Lasi kejut tebok-het-lo pu ilitum chini.

¹⁹Halatum ke ilitum amonit kali, lasi halatum ilitum angbong pen damjuilo. Halatum ilitum amonit-lo asonte halatum ilitum angbongsi dobomji apot-lo. Bonta halatum ke kadokaveta ilitum amonit kali pu keklangdakji aphansi halatum ilitum angbong pen damlo.

²⁰Bonta Khristo nanglitum aphu-thak Karjong Kangthir nangdung-lo apotsi nanglitum kadokaveta ahok alam chini.

²¹Tangte lahelo, nanglitum ahok alam kechininedet apotsi neli labangso alam nangtok-lo, lapu kali, bonta lake nanglitum kechini apot-lo; lapen ahok alam pen kaita kechobei alam nangklangkle.

²²Tangte kechobei abang komat-lo? Lake Khristo ke Jisu helo pu kepupe abang helo. Lason amonit ke Khristo ahoturlo. Alangli Po lapen Sopo aphan Hemphu pu dengdelo.

²³Pima Sopo aphan kedengde abang along ke Arnam ave. Sopo aphan kedeng abang along ke Arnam do.

²⁴Tangte nanglitum kecheng pen karjulongtang alam nanglitum aning arlo kechebijile matha pamenon. Nang-litum la karjulongtang alam nanglitum aning arlo chebilote nanglitum kaita Sopo lapen Po pen chelangpetverpo.

²⁵Lapen Po etum aphan piji pu ekechak ke kejut un-e achethe helo.

²⁶Nanglitum aphan kepamanghujisi kebor-i atum alamjirsi neli nanglitum aphan nangtok-lo.

²⁷Bonta nanglitum aphan ke, Khristosi nanglitum aphuthak amethang a-Karjong nangdung tang-lo. Alangli Karjong nanglitum aning arlo dotik ke baduta nanglitum aphan nangthan nangnelo. Pima alangli Karjongsi nanglitum aphan kadokave alam nangthanlo. Lapen alangli kethan alam ke ahokpet alamlo, kechobei alam kali. Tangte Karjong nangkethan alam kroira Khristo pen chelangpet-bomnon.

²⁸Tangte kechinghon osomar atum, mo Khristo kevangthuji Arni alangli kecheklangji ahut ilitum kepherere-pinji lapen ketherak nangnedet pen ajok alangli ingno pen kechepatu nangnedetjile alangli pen chelangpet-le dobomnon.

²⁹Khristo ke dhoromipet abang-lo, lake nanglitum chinilo. Tangte akeme keklem abang aling ke Arnam asolo, lale chininon.