Read Karbi 1 JON 3 Bible Online

1 JON 3 - Karbi bible

1 JON 3

¹Po ilitum aphan ko-an e-inghon-loma, lale mathanon! Ilitum aphan Arnam asomar pusi ehang-lo. Alangli akanghon lapu-an akethe! Lapen ahokta ahok-lo, ilitumke Arnam asomarlo. La apotsi pirthe ilitum aphan chininelo, pima pirthe ke Arnam aphan chininelo.

²Neli kechinghon atum, nonke ilitum Arnam asomar atumlo. Bonta ilitum kopisi cheplangjima, lake non amat ke chini pamemelang. Bonta Khristo nangcheklang lote ilitum alangli son thak thakpo, lake ilitum chini, pima alangli kopusonma, lake ilitum thek-long pamepo.

³Khristo pen ajok labangso aning kethe kedo abang aling ke Khristo kangthir-et asonthotsi amethang kechepangthir-et pensi do.

⁴Pap keklem atum anke Arnam aron kekroikre adai do. Pima papke aron kekroikre helo.

⁵Ilitum apap hei hei kepakakji aphansi Khristo vang-lo puke nanglitum chinilo, lapen alangli ke thang apap ave.

⁶Lasi Khristo pen kechelangpet atum anke pap klembombe. Pap keklem atum anke Khristo aphan thek-longlepinlang, mate chininepinlang.

⁷Kechinghon osomar atum, badu amonitta nanglitum aphan nangpa-manghu longri. Khristo ke dhoromipet abang asonthotsi dhoromi akam keklem abang aling ke dhoromipet abang-lo.

⁸Pap keklembom abang ke Hi-i Sarpo arat-lo. Pima Hi-i Sarpoke kecheng ahut penta pap klemlo. Lasi Hi-i Sarpo akam kepavirjisi Arnam a-Sopo nangcheklang-lo.

⁹Arnam aso atum anke pap klem-bombe, pima Arnam a-ot alanglitum along do. Lapen alangli ke Arnam asolo apotsi pap klembom un-e.

¹⁰Lapusonsi, komat mat atumsi Arnam asomarma, lapen komat mat atumsi Hi-i Sarpo asomarma, ilitum chini un. Akeme akam keklemkle, mate akorte aphan kechinghonhe abang ke Arnam aso kali.

¹¹Nanglitum kecheng pen karjulong alam la helo: ilitum lahin lahin chinghon nangji.

¹²Ilitum Kein ason ke cheplang nangne. Alangli ke Kehingno abang arat-lo. Alangli amethang amu Abel aphan pathilo. Kein kopi apotsi amu aphan pathi loma? Lake alangli kam ke hingnodak lapen amu akam ke mesen apot-lo.

¹³Lasi korte marli atum, pirthe amonit atum nanglitum aphan nangke-langselet apot ke nanglitum manghu nangne.

¹⁴Ili kethi otekangsi chethe angbong vangtang-lo puke ili chinilo. Pima ilitum ekorte atum aphan chinghonlo. Kanghon kave atum anke kangting angkangsi dolang.

¹⁵Akorte aphan kechelang selet abang aling ke pran ke-en abang-lo, lapen pran ke-en abang aling along ke kejut un-e achethe ave pu nanglitum chinilo.

¹⁶Ilitum aphan ajok Khristo amethang apran kechepi pen ajok ilitum kanghon alam chinilo. Lasi ilitumta ekorte atum aphan ajok emethang apran chepi nangji.

¹⁷Badu tame, inut pirthe akhi adat kedo abang jongsi akorte abang akenang do pu thek-long setta alangliphan aning anghap chingpupe tangte alangli ke kopusi Arnam aphan chinghon pu kepu unjima?

¹⁸Neli kechinghon osomar atum, ilitum akanghon ke ede ingtur lapen elam penchot kalidet nangji, bonta lake ekam pen lapen ahokpet pen nangji.

¹⁹Lasonsi ilitumke ahok abe atumlo pu ilitum chiniji: lapen lasonsi ilitum Arnam angno ning theklongji.

²⁰Ilitum aning angthinle ilitum aphan edin setta ening ingthin apar Arnam themu, lapen alangli ke kadokave alam chinipet pu ilitum chini.

²¹Lasi neli kechinghon atum, ening-ingthinle ilitum aphan edindete ilitum Arnam angno thang akephere ave.

²²Alangli long kechohang aling ili long, pima ili alangli hukum hei hei kroilo, lapen alangli aning kehang atengsi ili klemlo.

²³Alangli hukum la helo: ilitum alangli Sopo, Jisu Khristo aphan kroi nangji, lapen Khristo hukum ekepi asonthotsi ili lahin lahin chinghon nangji.

²⁴Arnam ahukum kekroi abang aling ke Arnam pen chelangpetsi do lapen Arnam alangli pen chelangpetsi dolo. Arnam ilitum pen chelangpetsi dolo pu ilitum Arnam ekepi a-Karjong pen ajok chini.