Read Karbi 1 JON 4 Bible Online

1 JON 4 - Karbi bible

1 JON 4

¹Neli kechinghon atum, amethangsi Karjong do pu kechepu atum an aphan kroipet-ri, bonta halatum kelong akarjong Arnam pensi kevang kalima, kalangma, la kechiniji aphan halatum aphan asat langnon. Pima kechobei akethanmek atum pirthe athak nangklang-olo.

²Arnam a-Karjong aphan kechini thekjike lapu helo: Jisu Khristo monit ason cheplangsi vang-lo pu kepu abang aling along ke Arnam pen kevang a-Karjong do.

³Bonta Jisu aphan lason kepupe abang ke Arnam pen kevang a-Karjong ave. Alangli kelong akarjong ke Arnam ahotur along pensi kevang. La vangji pu nanglitum arjulong-lo, lapen la non pirthe athak dotang-lo.

⁴Bonta neli kechinghon osomar atum, nanglitum ke Arnam asomar atumlo, lapen nanglitum hala ahok-he akethanmek atum aphan haitang-lo, pima nanglitum along kedo a-Karjong ke hala pirthe amonit atum along kedo akarjong atum apar ajakong themulo.

⁵Hala ahok-he akethanmek atum ke pirthe asolo. Lasi halatum ke pirthe alam hei heisi ningjelo, lapen pirthe aso atum halatum alam hei heisi ningjelo, lapen pirthe aso atum halatum alam arjudunlo.

⁶Bonta ilitumke Arnam asomarlo. Arnam aphan kechini abang ke ilitum alam arju, Arnam aso kalidet abang ke ilitum alam arjuje. La pen ajok ilitum ahok a-Karjong lapen ahok-he akarjong chini un.

⁷Kechinghon atum, ilitum lahin lahin chinghon lonang, pima kanghon ke Arnam pensi vang-lo. Kanghon kedo abang ke Arnam asolo, lapen alangli ke Arnam aphan chini.

⁸Kanghon kave abang ke Arnam aphan chinine, pima Arnam ke kanghon.

⁹Ilitum alangli Sopo pen ajok chethe kelongji aphan Arnam amethang a-Sopo po epumpet aphan pirthe athak nangtoisi ilitum aphan amethang akanghon epaklang-lo.

¹⁰Kanghon la helo: ilitumsi Arnam aphan inghonlo, lapu kali, bonta alanglisi ilitum aphan e-inghonlo lapen ilitum apap ekediya-iji aphan alangli amethang a-Sopo aphan nangtoilo.

¹¹Kechinghon atum, Arnam ilitum aphan lapu-an e-inghonlo apotsi ilitumta lahin lahin chinghon nangji.

¹²Baduta Arnam aphan thek-longle-pinlang, bonta ilitumle lahin lahin chinghon lote Arnam ilitum pen chelangpetsi dolo, lapen ilitum aning arlo alangli kanghon chok-limlo.

¹³Ilitum Arnam pen chelangpetsi dolo lapen alangli ilitum pen chelang-petsi dolo pu ilitum chini, pima alangli amethang a-Karjong ilitum aphan epitang-lo.

¹⁴Pirthe aphan kepajok abang kepaplangjisi Po Arnam amethang a-Sopo aphan nangtoilo, lake ilitum thek-long-lo, lapen anut kaprek atum aphan thanlo.

¹⁵Jisu ke Arnam a-Sopolo pu kethan abang aling ke Arnam pen chelangpetsi dolo, lapen Arnam alangli pen chelangpetsi dolo.

¹⁶Lasi Arnam ilitum aphan ekanghon do pu ilitum chini lapen kroi. Arnam ke kanghon, lapen kanghon angbong kedo abang aling ke Arnam pen chelangpetsi do lapen Arnam alangli pen chelangpetsi dolo.

¹⁷Mo Kangsai Arni ilitum akephere kavedetji aphansi ilitum along Arnam akanghon chok-limlo, lapen ilitum akephere avedetji, pima ilitum pirthe athak dotik Khristo asonthak thaksi cheplang-lo.

¹⁸Kanghon along ke kephere ave, pima kechok-lim akanghon ke kephere anta pave-et. Tangte kephere kedo abang along ke kanghon chok-limlelang, pima kesung kepho nangji angring kedo apotsi kephere ke kedo.

¹⁹Ilitum inghon, pima Arnam ilitum aphan e-inghon paphrang-lo.

²⁰Komane abang Arnam aphan inghon pule pu setta akorte aphan chelangse-letbom lote alangli ke kechobei abang-lo. Pima kethek-long-lok akorte aphan jongsi inghonhe tangte kethek-longle-det Arnam aphan ke inghon thekthe.

²¹Khristo ilitum aphan ekepi ahukum la helo: Arnam aphan kanghon abang ke akorte aphanta chinghonvek nangji.