Read Karbi 1 JON 5 Bible Online

1 JON 5 - Karbi bible

1 JON 5

¹Jisu helo Khristolo pu kekroi abang aling ke Arnam asolo, lapen apo aphan kanghon abang aling ke asopo aphanta inghon.

²Ilitum Arnam aphan kanghon lapen alangli hukum hei hei kekroi pen ajoksi ilitum Arnam asomar atum aphan kanghon do pu ilitum chini.

³Pima ilitum Arnam aphan kanghon puke Arnam ahukum hei hei kekroi helo, lapen alangli hukum hei hei ke ilitum aphan la an akesungpik kali.

⁴Pima Arnam asomar atum anke pirthe aphan hai un, lapen ilitum akekroi pen ajoksi ilitum pirthe aphan hailo.

⁵Pirthe aphan keparem un abang komatma? Lake Jisu ke Arnam a-Sopolo pu kekroi abang anchot.

⁶Lang lapen vi pen ajok kevang abang ke Jisu Khristo helo. Lang pen anchot kali, bonta lang lapen vi pen ajoksi alangli vang-lo.

⁷Lapen haki kechodun abang ke Karjong helo, pima Karjong ke ahokpet.

⁸Haki kechodun atum bang kethom do: lake Karjong, lang lapen vi helo, lapen la bang kethomta isipet ahakisi pilo.

⁹Ilitum monit atum kepi ahaki kroi, bonta la apar Arnam kepi ahaki themulo: lapen amethang a-Sopo alamjirsi Arnam labangso ahaki pilo.

¹⁰Lasi Arnam a-Sopo aphan kekroi abang aning arlo labangso ahaki do, bonta Arnam aphan kekroikre abang ke alangliphan kechobei abang paplangtang-lo. Pima Arnam amethang a-Sopo alamjir kepu alam alangli kroikredet-lo.

¹¹Labangso ahaki la helo: Arnam ilitum aphan kejut un-e achethe epilo, lapen labangso achethe ke alangli Sopo alongsi do.

¹²Sopo kedo abang aling labangso achethe do; Arnam a-Sopo kave abang aling ke chethe ave.

¹³Nanglitum, atheke Arnam a-Sopo aphan kekroi atum ke Kejut un-e achethe do pu nanglitum kechiniji aphansi neli nanglitum aphan labangso alam nangtok-lo.

¹⁴Arnam aphan ilitum ning kechetheklong athe la helo: Alangli ning kehang atengle ilitum kopine chohang lote alangli ilitum alam arju.

¹⁵Ilitum kechohang ahut aling alangli e-arju, lake ilitum chini, lasi ilitum alangli long kechohang ason aling alangli ilitum aphan epi, lata ilitum chini.

¹⁶Nangli korte abang kethi kepa-plangple apap keklem nangli thek dunlong lote nangli Arnam aphan choningri nangji. Anke Arnam alangli-phan chethe piji. Bonta lake kethi kepaplangple apap keklem abang aphanchot. Bonta kethi kepaplangdet apap do, lapen labangso apot ke Arnam aphan choningri nangji pu neli pupe.

¹⁷Kehingno akam anke pap-lo, bonta kethi kepaplangple apapta do.

¹⁸Arnam asomar atum anke pap klembombe, lake ilitum chinilo, pima Arnam a-Sopo alangliphan railo lapen kehingno abang alangliphan phangno un-e.

¹⁹Ilitumke Arnam asomarlo, lapen pirthe adang anke kehingno a-Bang aridengsi do, lake ilitum chinilo.

²⁰Ilitum ahok Arnam aphan kechini thekji aphansi Arnam a-Sopo vang-lo, lapen ilitum aphan kechini ajakong epitang-lo, lake ilitum chinilo. Ilitum ahok abang pen, atheke alangli Sopo Jisu Khristo pen chelangpetsi dolo. Ahok Arnam lapen kejut un-e achethe la helo.

²¹Kechinghon osomar atum, nangli-tum ahok-he arnam akumlin hei hei pen chepahelonon.