Read Karbi KANGSAI ATUM 1 Bible Online

KANGSAI ATUM 1 - Karbi bible

KANGSAI ATUM 1

¹Joshua thidet aphi Israel arat atum HEMPHU aphan arjulo, “Netum akhei angbong pen koloso akheisi Kanaan asor aphan ketengkheng nangjima?”

²HEMPHU thak-lo, “Judah akheisi dam paphrangpo. Ne halatum aphan longle hodaitang-lo.”

³Judah atum Simeon arat aphan pulo, “Netum aphan nekepi alongle along nangdunnon, lapen Kanaan asor aphan chedanrap-pet lonang. Anke nangtum aphan nangkepi alongle along netumta nangdunpo.” Lasi Simeon akhei lapen

⁴Judah akhei ron aphan damrap-rap-lo. HEMPHU latum aphan Kanaan asor aphuthak pahailongdet-lo, lapen Perez asor aphuthakta lapen Bezek along surikep amonit aphan paremdet-lo.

⁵Halatum hadak Adonibezek aphan long-lo lapen la aber chedanlo.

⁶La katjuilo, bonta latum laphan aphi hungdunlo lapen nepcheksi arimunpo-heihei ingthanpet-lo.

⁷Lapen Adonibezek pulo, “Recho bang 70 halatum arimunpo lapen akengmunpo-heihei ingthansi ne tebul aber a-ok pangrumlo. Ne halatum aphan keklemtang asonsi Arnam nephan non klemlo.” Laphan ha Jerusalem pondetsi la hadak thilot-lo.

⁸Judah amonit atum Jerusalem tengkhengsi la chepahemphudet-lo. Latum laso arongsopi amonit an pathisi me keidut-lo.

⁹Laso aphi latum chedanponbomsi inglong along kedo, inglong akeng-ri kedo, lapen Nitur anat Krengtai alongle kedo a-Kanaan asor pen ron chedanlo.

¹⁰Latum Hebron kedo a-Kanaan asor aphan Kiriath Arba pu kepu adim anat damsi chedanlo. Hadak latum Sheshai, Ahiman, lapen Talmai aso aphan paremdet-lo.

¹¹Hadak pen Judah amonit atum Debir arongsopi abe thursi damlo, halaso ahut laphan Kiriath Sepher si kepu.

¹²Halatum angbong Kaleb pulo, “Ne nesopi Aksah Kiriath Sepher arongsopi aphan kechepahemphu abangphan penan chopipo.”

¹³Kaleb amu Kenaz asopo Othniel laso arongsopi chepahemphudet-lo. Lasi Kaleb amethang asopi Aksah la aphan penan chopilo.

¹⁴Kechepangri arni Othniel labangpi apo aphan hidi nangji pura pahangtoilo. Labangpi gadha pen suntuk-lo lapen Kaleb aphan kopisi kenangjima arjulo.

¹⁵La thak-lo, “Ne langkedo ahidi nangji, nang nekepi alongle ke kekrengtai.” Lasi Kaleb athak lapen aber langroiso pidet-lo.

¹⁶Moses ahupo akhei Ken asor, Judah arat pen Sotele arongsopi, Jeriko pen Kekrengtai anitur Arad, Judah along damlo. Hadak latum Amalek atum angbongsi do pathirlo.

¹⁷Judah arat atum Simeon arat pen damrap-petsi latum Jephad arongsopi along kedo a-Kanaan asor aphan paremlo. Halatum arongsopi aputhak ahirjuno pisi, la pavirlo, lapen Hormah pusi irtekang-lo.

¹⁸Judah arat aphan HEMPHU rapsi halatum inglong alongri chepahemphu long-lo.

¹⁹Bonta halatum Gaza, Ashkelon mate Ekron lapen ongdung arei alongri chepahemphu un-edet-lo. Pima lahei talo arei kedo arat atum ingchin aron ahemkonglong-heihei do, lasi Judah arat latum aphan phlung un-edet-lo.

²⁰Moses kepu atengsi Hebron ke Kaleb, la Anak pen keplang akheithom kephlung abang aphan pidet-lo.

²¹Bonta Benjamin akhei arat atum Jerusalem along kedo Jebusi atum aphan phlungphledet-lo, lapen halaso arni pen Jebusi atum Benjamin arat pen dorapverbomlo.

²²Ephraim lapen Manasseh akhei atum Bethel, halaso ahut laphan Luz pusi kepu arongsopi aphan ketengkhengjisi damlo.

²³HEMPHU halatum aphan sap-lo. Halatum rongsopi langjoi atum aphan toilo,

²⁴Langjoi atum rongsopi pen kebar ahut inut amonit aphan thek-longsi halaphan arjulo, “Rongsopi arlo kelutji atovar nangpaklangtha lapen netum nangphan thangnatta pasungselo.”

²⁵Lasi la halatum aphan paklang-lo, lapen Ephraim lapen Manasseh arat atum rongsopi laso amonit lapen ahem asor pen apara kedo-an aphan pathi-et-lo.

²⁶La aphi Hitti atum alongle anatsi damjuilo, hadak isi rongsopi kimlo, lapen Luz pusi amen irlo, la nonpu-anta laso amensi dobomlang.

²⁷Manasseh akhei atum Beth-Shan, Taanak, Dor, Ibleam, Megiddo, arongsopi-heihei arat lapen adung-arei arong; Kanaan asor aphan phlungphlesi hadak padolongverlo.

²⁸Israel atum ingtang muchot ahut, halatum Kanaan pen kam paklemtoilo, bonta halatum aphan phlungphle bomlang.

²⁹Ephraim akheita Gezer arongsopi along kedo Kanaan atum aphan phlungphlesi halatum pen pen padolong-rapverlo.

³⁰Zebulun akheita Kitron, lapen Nahalal arongsopi-heihei asor aphan phlungphlesi lapen Kanaan atum aphan halatum along padolongbomsi halatum aphan kam paklemtoilo.

³¹Asher akhei ta Ako, Sidon, Ahlab, Akzib, Halbah, Aphek, Rehob arongsopi kedo arat aphan phlungphledet-lo.

³²Asher arat atum adung kedo a-Kanaan atum pen pen halatum kephlungphle arni pen dorappet-lo.

³³Naphtali akhei ta Betheshemesh lapen Nethanath arongsopi kedo arat aphan phlungphledet-lo. Naphtali arat atum adung kedo a-Kanaan atum pen pen dorappet-lo, bonta jakong pen halatum aphan kam paklemtoilo.

³⁴Amor asor Dan akhei arat aphan inglong alongri anat padoverlo, lapen halatum aphan thoi nangpasun longledet-lo.

³⁵Amor atum Aijalon, Shaalbim, lapen Heres anglong dolongverlo, bonta Ephraim lapen Manasseh akhei atum halatum aphan alangtum aron abersi khang-lo lapen jakong pen halatum aphan chotoilo.

³⁶Sela anirep, Edom asor ahoi Akrabim inglong atovar anta dolo.