Read Karbi KANGSAI ATUM 10 Bible Online

KANGSAI ATUM 10 - Karbi bible

KANGSAI ATUM 10

¹Abimelek thidet aphi Puah asopo, lapen Dodo asupo Tola, la Israel aphan kepajokjisi vang-lo. La ke Isaakar akhei pen lapen Ephraim Anglong alongri Shamir si do.

²La ningkan 23, Israel atum ajalin plang-lo. Ansi la thilo lapen Shamir along pip-lo.

³Tola aphi Jair Gilead pen vang-lo. La Israel aphan ningkan 22 jalo.

⁴La asomar bang 30 do, lapen jon 30 agadha ardonlo. Halatum Gilead along rongsopi 30 dolo, lahei Jair arong pusi nonputa pu.

⁵Jair thilo lapen Kamon along pip-lo.

⁶Puthot Israel atum Baal-heihei, lapen Astartes lapen Siria, Sidon, Moab, Ammon lapen Philistia atum a-arnam-heihei aphan karchodun pen ajok HEMPHU aphan langplotsi pap klemlo. Latum HEMPHU aphan obub-lo, lapen laphan archochedet-lo.

⁷Lasi HEMPHU Israel aphuthak aning thihak-lo, lapen Philistia lapen Ammon atum latum aphan papahai longdet-lo.

⁸Ningkan 18 Amor adet kedo Jordan Aroi anihang anat Gilead alongri Israel an aphan chenek-lo, lapen pasung-lo.

⁹Ammon atum Jordan hatsi Judah, Benjamin lapen Ephraim akhei aphan chedanjisi damlo. Israel atum sungpik khangjang-lo.

¹⁰Ansi Israel atum HEMPHU aphan choningrilo lapen pulo, “Nangphan langplotsi netum pap klemtang-lo, pima netum a-Arnam lake nangphan netum obub-lo, lapen Baal-heiheisi archorong-lo.”

¹¹HEMPHU lasonsi halatum aphan thak-lo, “Ijip asor Amor asor, Ammon asor, Philistia,

¹²Sidon, Amalek, Maon atum aphrang nangchenek-lo, lapen nangtum nephan choningrilo. Ne nangtum aphan nangpajokje langma?

¹³Bonta nangtum non anta ne-o bomlang lapen kaprek arnam aphansi archo bomlang, lasi Ne puthot nangtum aphan nang pajokjelo.

¹⁴Nangtum kechongvai tang arnam alongle damra choningrinon. Nangtum kesung ahut halatumle nangpajok dunlo nang.”

¹⁵Bonta Israel arat atum HEMPHU aphan pulo, “Netum pap klemtang-lo. Nangning kehang alingle klemnon, bonta pini netum aphan nepajoktha.”

¹⁶Lasi halatum bang adet a-arnam che-osi HEMPHU aphan archolo; lapen Israel atum kesung aphuthak la ta sungdun nang-lo.

¹⁷Anke Ammon aron asong kechedanjisi chesik-lo, lapen Gilead along amukam chekimlo. Israel atum anta chepangrum-petsi Gilead alongri Mizpah along mukam chekimlo.

¹⁸Hadak Israel arat lapen ajalin atum lahin lahin charjuseroilo, “Komatsi Ammon anat kechedanji kejaponpoma? La keklem aling abang Gilead along kedo-an aphuthak keja abang plangpo.”