Read Karbi KANGSAI ATUM 11 Bible Online

KANGSAI ATUM 11 - Karbi bible

KANGSAI ATUM 11

¹Jephthah ke Gilead asor inut angthin kethe amonit lapen la inut beisapi aso lapen apo ke Gilead lo.

²La apo Gilead lapen la apiso pen kaprek asomarta dolang lapen latum the-ding-lo, latum Jephthah aphan hem pa-obor-itoilo. Halatum la aphan pulo, “Netum apo pen nang thangta nanglong dundelo; nangke akaprek a-arloso aso ke.”

³Jephthah akorte atum pen katjuisi Tob alongrisi dodamlo. Hadak keningjoino esong amonit aphan la ningpadoksi la aphi aphi halatum paduntoilo.

⁴La penang an aphi Ammon atum Israel abethursi ron chedan damlo.

⁵La plangdet aphi Gilead ajalin atum Jephthah aphan Tob alongri pen vandet-lo.

⁶Halatum pulo, “Vangnon, netum aphan janon, anke netum Ammon atum pen chedan unpo.”

⁷Bonta Jephthah thak-lo, “Nangtum nephan lapu-an hijimlo, nangtum nepo ahem pen nephan pache-onang-lo. Nangtum kesung ahut kopisi nelong kevang nangjilang?”

⁸Halatum Jephthah aphan pulo, “Netum nang nat non patebok-lo, pima nang netum along dun pen Ammon pen chedanpo lapen Gilead arat aphuthak japo.”

⁹Jephthah halatum aphan thak-lo, “Nangtum jongsi nephan hem nangpon pen Ammon atum pen chedan nangji lapen HEMPHU nephan pahaidet lote, ne nangtum akeja abang plang unpoma?”

¹⁰Halatum thak-rappet-lo, “Netum laso along chedonsarlo. HEMPHU-si etum ahakilo.”

¹¹Lasi Jephthah, Gilead ajalin atum along dunlo, lapen rat atum la aphan halatum aphuthak pangribang lapen jalin paplang-lo. Jephthah ke Mizpah along HEMPHU aphan bangso alam an pupet-lo.

¹²Anke Jephthah apherangke atum Ammon arecho aphan papudamtoilo, “Kopisi nang netum pen kechebohong-lo? Kopi athesi nang netum adet tengkheng-loma?”

¹³Ammon arecho Jephthah apherangke atum aphan thak-lo, “Israel atum Ijip Aroi pen Jabok Aroi lapen Jordan Aroi an endet-lo. Non la la nangning ingsamjin pen nangvoi nangji.”

¹⁴Ammon along Jephthah phe-rangke toithulo,

¹⁵lapen alangliphan laso alam pulo, “Israel atum Moab mate Ammon alongle ke-en pu alam ke ahok kali.

¹⁶Keplangtang alam lahelo: Israel atum Ijip ke-o ahut halatum sangti mili ajo pen ha Akaba ataloso an lapen Kadesh an vang-lo.

¹⁷Anke halatum hukum kehangjisi Edom arecho aphan alangli alongle angbong kehatput longji aphan pherangke toilo. Bonta Edom arecho halatum aphan padam longledet-lo. Latum Moab arecho aphanta arjulo, bonta alanglita alongle angbong latum aphan padam longledet-lo. Lasi Israel atum Kadesh along sa nangkok-lo.

¹⁸Ansi puthot latum sangtimili ajo angbong damthulo, Edom alongle lapen Moab alongle arei-rei ha Moab alongle anihang anat, la paraike Arnon Aroi anat nanglelo. Hadak latum mukam chekimlo, bonta latum Arnon Aroi hat-hedet-lo, pima la Moab alongle ahoilo.

¹⁹Ansi Israel atum Sihon, la Amor akhei Heshbon arecho along pherangke toilo, la adet vurput pen ha amethang adet kechedamji aphan parjudamlo.

²⁰Bonta Israel atum aphan Sihon la paklem longledet-lo. La kedo-an ron asong vanrap-petsi Jahaz along mukam kimlo, lapen Israel aphan tengkheng-lo.

²¹Bonta Israel atum a-Arnam HEMPHU si Sihon lapen aron asong aphuthak Israel atum kepahaiji ajakong pidet-lo. Lasi Israel atum Amor atum kedo-an alongri cheraidet-lo.

²²Latum Amor atum kedo-an alongri pen nitur Arnon anat pen ha Jabbok anirep an lapen sangtimili ajo pen nihang anat, Jordan anichi anat cheraidet-lo.

²³Lasi lake Israel a-Arnam, HEMPHU-si amethang arat Israel ajoine Amor atum aphan phlungpilo.

²⁴Nang keche-en thudetji putong kebor-i ma? Nang arnam Chamosh ko-ansi nangphan nangpiloma la ansi nang enlongchotji. Bonta netum ke netum a-Arnam HEMPHU ko-anma nekepi la-ansi cheraipo.

²⁵Zippor asopo Balak, la Moab arecho aphan mute nang memu putong nang chemathama? La Israel abethurthe kalima? La netum abethursi ron nang chedanloma?

²⁶Ningkan 300 Israel atum Heshbon lapen Aroer, lapen la adung arei arong lapen Arnon Aroi akung kedo arongsopi kedo-an cherailo. Kopi athesi pu-an arni nang kedojoilo?

²⁷Kali, ne thangta nangphan kehingno klemkle. Ne puthot ron kechedan pen ajok nang kehingno klemtang-lo. HEMPHU-ke kangsai Abang. Lasi pini Israel pen Ammon atum angbong pharpo.”

²⁸Bonta Ammon arecho laso Jephthah abirta aputhak thangnat ano chedendedet-lo.

²⁹Anke HEMPHU akarjong Jephthah aphuthak vang-lo. La Gilead lapen Manasseh soding damlo lapen Gilead adet Mizpah along chevoisi Ammon anat dambomlo.

³⁰HEMPHU aphan Jephthah chechak-lo: “Nang jongsi Ammon aphuthak nephan pahailongdet lote,

³¹nephan nekechetongjira nehem pen nangkebar abangphu aphan ke isi athok asonsi ne nangphan nangpajir-detpo.”

³²Lasi Ammon atum pen kechedanjisi Jephthah langroi hatpet-lo, lapen HEMPHU laphan pahaidet-lo.

³³Latum aphan la Aroer pen ha Minnith adung-arei alongri an rong 20 arongsopi an, lapen ha Abel Keramim an pathilo. Hadak thedung akethu-kethat dolo, lapen Ammon atum aphan Israel atum paremdet-lo.

³⁴Mizpah along Jephthah ahem kechevoi ahut hadak asopi laphan kechetong damjisi nangkanbomlo lapen prakso nangthipbomsi vangbomlo. Bangpi ke la inutnat asopilo.

³⁵Labangpi aphan la kethek-long ahut, la aningke-oi pen ape chingseksi pulo, “Oh Pei! Nang nening paphukdak-lo! La kopi athesi nening paso binong-loma? Ne HEMPHU aphan dhorompet pen chechak-lo, lapen la ne voi un-elo!”

³⁶Bangpi la aphan pulo, “Nangli jongsi HEMPHU aphan eson chechaktang-lo pulote nangli kepu ateng nangli neliphan klemnon, athe HEMPHU nangli hotur Ammon atum aphan alar nangli pahuilong tang-lo.”

³⁷Bonta bangpi apo aphan arjulo, “La eson neliphan klemnon. Neli inutpet chiklo jonni nepadolongtha, anke nelijirpi atum pen inglong anat damthap longpo, lapen neli penan dode pen kethinang apot ningridampo.”

³⁸Alangli bangpi aphan padamtoilo, bangpi lapen bangpi ajirpi atum inglong-heihei arludamsi ningridamlo, pima la penan dode lapen aso avepin pensi thinangpo.

³⁹Chiklo jonni aphi bangpi apo along chevang-lo. La HEMPHU aphan kechechak ateng pen klemlo, lapen pinso amahang thek-longle pin pen bangpi thinang-lo. La helo Israel angbong jutang keplang-lo,

⁴⁰okarjang atum niphli aningkanvang ingtan dampo, Gilead along Jephthah asopi aphan keningripidam.