Read Karbi KANGSAI ATUM 12 Bible Online

KANGSAI ATUM 12 - Karbi bible

KANGSAI ATUM 12

¹Ephraim amonit atum ron kechedanjisi chesik-lo; halatum Jordan Aroi hatsi Zaphon anat damsi Jephthah aphan pulo, “Ammon atum pen nang ron kechedan kedam ahut netum nanglong kedunji aphan nehanghepin pen kopisi ahoi kehat ponloma? Nangphu athak netum hem kei-etji!”

²Bonta Jephthah halatum aphan pulo, Nemonit atum lapen Ammon angbong thedung kechebohong dolo. Ne nangtum aphan nanghang-lo, bonta halatum pen nephan nangtum nepajok unjima?

³Nangtum nangdunde pu ne thek-long pen nepran ne chesongdut-lo, lapen halatum pen kechedanjisi ahoi hatpet-lo, lapen HEMPHU nephan halatum aphuthak nepahaidet-lo. Tangte kopisi nangtum ne pen kechedanji kevang-loma non?

⁴Anke Jephthah Gilead amonit kedo-an pangrumpet-lo, Ephraim atum pen chedansi halatum aphan paremdet-lo. (Ephraim atum pulo, nangtum Gilead asor nangtum Ephraim lapen Manasseh pen kekat atum!)

⁵Ephraim asor kekat longledetjisi Gilead asor Jordan kehat meme adim an cheparideng-et-lo. Ephraim asor lang kehat pen kekatji kebor-i ahut Gilead asor pen kehat longji aphan hukum chohang nangpo, lapen Gilead asor latum aphan arjupo, “Nangtum Ephraim asorma? La jongsi ‘kali’ pu thak-lote,

⁶halatum la aphan ‘Shibboleth’ pu paputoipo” Bonta la “Sibboleth” pu si puthekchotpo, pima la labangso athe pachondak thekthe. Anke halatum la aphan phlungdunpo lapen laphan elongbak Jordan kehat along pathilo. Halaso ahut bang suri 42 an Ephraim asor thinang-lo.

⁷Jephthah Israel aphan ningkan throk jalo. Ansi la thilo lapen Gilead along ahem methang arongsi pip-lo.

⁸Jephthah aphi, Bethlehem pen Ibzan, Israel atum aphan jalo.

⁹La bang 30 asopomar lapen bang 30 asopimar dolo. La asopimar atum aphan amethang akur angbongsi penan chopilo lapen arloso bang 30 akur angtan pen vansi asopomar atum aphan achor ripilo. Ibzan, Israel atum aphan ningkan 7 jalo,

¹⁰ansi la thi-lo lapen Bethlehem along laphan pip-lo.

¹¹Ibzan aphi, Elon, la Zebulun pen Israel atum aphan ningkan kep jalo.

¹²Ansi la thi-lo lapen Aijalon, la Zebulun alongri along laphan pip-lo.

¹³Elon aphi Abdon, la Hillel asopo, Pirathon pen Israel atum aphan jalo.

¹⁴La bang 40 asopomar atum dolo lapen bang 30 asumar dolo, latum jon 70 agadha ardonlo.

¹⁵Abdon Israel atum aphan Ephraim alongri, Amalek atum anglong Pirathon alongsi pip-lo.