Read Karbi KANGSAI ATUM 13 Bible Online

KANGSAI ATUM 13 - Karbi bible

KANGSAI ATUM 13

¹Puthot Israel atum HEMPHU aphan langplotsi pap klemlo. Lapen latum aphuthak ningkan 40 Philistia atum papangri longtoilo.

²Halaso ahut inut amonit Manoah, la Zorah arong penlo. La Dan akhei inut bangphulo. Alangli piso oso chopathe longlelang.

³HEMPHU apherangke labangpi aphan cheklang-lo lapen pulo, “Nang non anta oso chopathe longlelang, bonta nang prapjin pen so pinso inut chopathe longpo.

⁴Che-ora drakha ahorlang ason an junri, lapen kecholongle a-ok an chori;

⁵lapen nangso amahang thekdet aphi, nang laso achu nokso pen soisedet nangji, pima la mahang kethek arni pen Nazir mate Arnam aphan hodaitang-lo. La Israel aphan Philistia atum pen kepajok akam chengpo.”

⁶Anke arloso abang damsi apenan aphan chethandamlo, “Inut Arnam amonit nelong vang-lo, la Arnam apherangke ason kelang pherememe, konat pentong kevang-lone ne arjuje, lapen la amenta nephan nethanthe.

⁷Bonta ne oso chopathepo pu alam nephan thanlo lapen pinso a-ososi longji pu thanlo. La nephan drakha ahorlang mate lason kedo-an lapen kecholongle ason an chori pusi nephan than. Pima laso a-oso achethe dotik-ke Nazir asonsi Arnam aphan hodaitang-lo.”

⁸Ansi Manoah HEMPHU aphan ardomlo, “Kanghon pen, HEMPHU, nangketoi Arnam amonit netum along nangtoira oso mahang thek-lote kopi pi si keklempi nangjima nepathan-toitha.”

⁹Arnam Manoah kehang ateng klempilo, lapen la apherangke arloso abang hidi ajo kangnilun ahut vangthulo. Labangpi apenan la along ave,

¹⁰Lasi bangpi menmen katchong chongsi la aphan pulo, “Langtha! Aphrang arni nelong kevang amonit nephan nang cheklangthu lilo.”

¹¹Manoah thursi apiso aphi phi dunlo. La monit along damsi arjulo, Nangli heloma nelipiso aphan kepu abang? Kalang-lo! Pusi alangli thak-lo.

¹²Ansi Manoah arjulo, “Nangli kepu ateng chekok lote, oso kopisi klemnangji? Lapen kopuson akaisi la do-thak nangji?”

¹³HEMPHU pherangke thak-lo, “Nangli piso neli keputang ateng asontin klem-et thek nangpo.

¹⁴Drakha arikang pen keplang ason an chochedet nangji; horlang mate arak-heihei jun nangne mate kecholongle ason an chonangnelo. Ne keputang ason an la klempet nangji.”

¹⁵Manoah ke la HEMPHU apherangkelo pu chininelang, lasi alangli laphan pulo, “Kanghon pen damritha Nangliphan bi aloso a-ok nanglipilang.”

¹⁶Bonta pherangke pulo, “Jongsi sangseta neli nanglitum a-an chochelo. Bonta nangli jongsi la sikji pulote, la HEMPHU aphanle isi athok ason la phrinnon.”

¹⁷Manoah arju-lo, “Nelitum aphan nanglimen nangchethan iktha, ansi nanglilam chekok lote nangliphan nelitum man pithekpo.”

¹⁸Pherangke arjulo, “Nelimen chinite kopi chonghoipo? Lake isi manghumeme amen.”

¹⁹Lasi Manoah bi aloso ponsi ajehak asok lapen lahei arlong adovan along manghumeme akam-heihei keklem a-HEMPHU aphan athok pilo.

²⁰Dovan pen me ade thek-longsi, Manoah lapen apiso, HEMPHU apherangke Sining anat me ade pen kedam thek-long-lo.

²¹Manoah ansi monit abangphan HEMPHU apherangkelo pu chinilo, ansi alangli lapen apiso latum amahang longle paphosi ardomlo. Latum puthot pherangke aphan thek-longledet-lo.

²²Manoah apiso aphan chepulo, “Etum thinangvekpo, pima etum Arnam aphan thek-long-lok-lo!”

²³Bonta la apiso thak-lo, “Etum a-HEMPHU jongsi epathiji aninghang pulote la etum athok edengdedet tahai, la etum aphan lahei epaklangkledet tahai mate non lason alam ethanthe det tahai.”

²⁴Arloso abang pinso a-oso mahang pathek-lo, lapen amen Semson pusi irlo.

²⁵A-oso thebomlo lapen Eshtaol angbong Dan amukam along kedo ahut HEMPHU ajakong laphan pangtang-lo.