Read Karbi KANGSAI ATUM 14 Bible Online

KANGSAI ATUM 14 - Karbi bible

KANGSAI ATUM 14

¹Arnisi Semson Timnah anat hirdamlo, hadak inut Philistia a-arloso aphan amek bonlok-lo.

²La hem chevoisi apei-apo aphan chethan damlo, “Hadak Timnah along inut Philistia a-arloso do, la nemek pabonlok-lo. Nephan nehangpi damnon; ne bangpi pen chepangripo.”

³Bonta la apei-apo laphan arjulo, “Piso ke-enji aphan kopisi nang kekroikre a-Philistia atum along kedam nangpo? Nang methang amonit angbong, methang akur angbong nang inutbak a-arloso chelong thekthe detloma?” Bonta Semson apo aphan chepulo, “Bangpi helo nang nephan nangkevanpi nangji. Ne laphan ningdok-olo.”

⁴La api apo atum Semson aphan HEMPHU si kepaklemtoilo pu chinine, athema HEMPHU-ke Philistia atum pen kechedan longji aphansi angkrak cholangding-lo. Halaso ahut Philistia atum Israel aphuthak pangrilo.

⁵Lasi Semson apo-apei pen Timnah hirdamlo. Latum dambomsi drakha aberi ajo hadak phodamlok-lo, la hingho aloso ejon kangrong arjulong-lo.

⁶Menmen amat HEMPHU ajakong Semson aphan pangtangrak-lo, lapen la hingho aphan ari angse pen bi aso aphan ason thakthak ingsekdak-lo. Bonta la kopi klemtang-loma apei-apo atum aphan chethanthedet-lo.

⁷Anke la damsi arloso chingkidamlo, lapen bangpi aphan la aningdok-lo.

⁸Aphi la bangpi aphan kepangrijisi la damlo. Tovar kedam ahut la kepathitang ahingho chelangtekang-lo, lapen thek-longsi manghuhak-lo, pima pijo ahur lapen ajehak pijo alang kethitang arpum arlo thek-long-lo.

⁹La ari chephuthorsi kedambom ahut pijo alang cho ponbomlo. Ansi la apo-apei along chedamlo, lapen ajehak latum aphanta pilo. Latum la cholo, bonta Semson pijo alang hingho akethi arpum pensi entang-lo pu la thanthedet-lo.

¹⁰La apo arloso ahem damlo, lapen Semson hadak kecho-kejun pilo. Lake risomar atum nimrokomlo.

¹¹Philistia atum laphan thek-lok pen latum bang 30 ariso atum la along pasangdunlo.

¹²Semson halatum aphan pulo, “Ne nangtum aphan tomopatar pen ethe nang arjulang. Nangtum jongsi nephanla athe kecho-kejun ni throksi angbong nethan thek pulote abangphutin aphan pe-kanglit lapen keche-um ape nangpiji.

¹³Lapen nangtum jongsi nephan nethan thekthe pulote nangtum anut-tinta pe kanglit lapen keche-um ape epak pak nephan nepinangji.” Halatum pulo, “Nang tomopatar nethannon, la arjuhur lonang.”

¹⁴Alangli pulo, “Kecho abang pen kechome ason nangklang-lo Kangtangnei pen akedok nangbarlo.” Nithom aphi anta latum tomopatar athe thakthek vangvedet-lo.

¹⁵Phli arni halatum Semson apiso aphan pulo, “Netum aphan tomopatar athe nangpathanjile nangpenan aphan moinon. Nang jongsi la klemkle pulote, nangpo ahem netum me kaidutji, lapen la along nangphrindutji. Nangtum banghini netum aphan kephangnojisi nekephama?”

¹⁶Lasi Semson apiso chiru-chirusi la along damlo lapen pulo, “Nang nephan ne inghonhe! Nang nephan hijimlo! Nang nephan la athe alam nethanthepin pen nangjirpo atum aphan tomopatarlo!” Alangli pulo, “Ne nepei nepo aphanta la thanthelang. Kopi athesi ne nangphan nangkethan nangpo?”

¹⁷Bangpi chojun ni throksi arni anta laso aputhak chirulo. Bonta ni throksi arni labangpi aphan tomopatar athe thanlo, pima bangpi laphan nir-e-khangjang-lo. Anke bangpi Philistia atum aphan thanserlo.

¹⁸Lasi throksi arni, Semson mek-kejang angdeng damde aphrang, rongsopi amonit atum laphan pulo, “Pijo alang pen apar kedokmu kopisi kedolang? Hingho pen apar kopisi kangtangnei kedolang?” Semson thak-lo, “Nangtum jongsi ne chainong api pen haibaibe pulote, Non anta nangtum nangthak thekthejilang.”

¹⁹Men men amat HEMPHU ajakong la aphan pangtangrak-lo, lapen la Ashkelon hirdamsi bangthomkep amonit aphan pathilo, halatum ape phloksi ape keme tomopatar kethakthek atum aphan pilo. Laso aphi la kopi plangtang loma la aning thisi ahem chedamjuilo,

²⁰lapen apiso ke kepangri arni kecheri ajirpo aphansi halatum pidet-lo.