Read Karbi KANGSAI ATUM 15 Bible Online

KANGSAI ATUM 15 - Karbi bible

KANGSAI ATUM 15

¹Penang an aphi sok-tipli kerot ahut Semson apiso along chedamlo lapen bi aso ejon bangpi aphan ponpilo. La ahupo aphan pulo, “Ne nepiso angdeng kedamji nening hang-lo.” Bonta laphan arlo padam longledet-lo.

²Alangli Semson aphan pulo, “Nangli bangpi aphan hijimlo, pusi mathathip-lo, lasi neli bangpi nangjirpo aphan pidet-lo. Bonta bangpi amu akebi abang jat seta memuchot. Alar nangli halaphan en tame.”

³Semson pulo, “Non ephong Philistia atum aphan ne kopima keklem nedai ave!”

⁴Lasi la damlo lapen jon 300 aserung nep-lo. Jonni-ni arme ingnangsi thengtom-heihei kokdunlo.

⁵Anke la thengtom along me keidunlo lapen Philistia atum ahidi-heihei ajo lodampak-lo. Lasonsi la kerottang asok me pacho-et lapu anchot kali hidi adang asok lapen jit aberi anta me pacho-et-lo.

⁶Philistia atum charjulo, la komatsi keklemloma pu, aphi Semsonsi la klemlo pu halatum chinilo. Pima la ahupo, Timnah amonit, Semson ajirpo aphan Semson apiso pidet-lo. Lasi Philistia atum dampaksi arloso aphan me phrindut-lo, lapen labangpi apo ahemta me keidut-lo.

⁷Semson halatum aphan pulo, “Nangtum lason keklem apot, laso alar ne nanghui longletik ne nang-o-e!”

⁸Halatum aphan la aningthihak si tengkheng-lo lapen ongdung halatum aphan pathilo. Ansi la chedamlo lapen Etam alongku athak chepatudamlo.

⁹Philistia atum vang-lo lapen Judah along mukam chekimlo lapen Lehi pu arong tengkheng-lo.

¹⁰Judah amonit atum halatum aphan arjulo, “Nangtum kopi athesi netum aphan ketengkheng-lo?” Halatum thak-lo, “Netum Semson aphan nepsi kebengchokji aphan vang-lo, lapen la netum aphan keklem asonthotsi laphanta klempo.”

¹¹Lasi bang suri kethom a-Judia amonit atum Etam alongku along damsi Semson aphan pulo, “Philistia atum ke etum aphuthak kepangri atumlo pu nang chininema? Nang netum aphan kopisi keklempor loma?” La thak-lo, “Latum nephan keklem asonthotsi neta latum aphan klemlo.”

¹²Halatum pulo, “Netum ladak kevangke netum nangphan nangkok pontansi halatum arideng nang kehodaijipu.” Semson thak-lo, “Nangtum nephan nepathithe pura nephan lam chechaknon.”

¹³Chechak-lo, netum nangphan nang ingnangchotji lapen halatum arideng nang hodaichotji. Netum nangphan nang pathithelo; pusi halatum thak-lo, Lasi halatum laphan arri akemi rini pen ingnang-lo lapen longku pen vandet-lo.

¹⁴La Lehi alongle sok pen Philistia atum la anat nangkatsi la aphan hangprak-lo. Menmen HEMPHU ajakong laphan pangtangrak-lo, lapen ari kangnang arri pen me kechotang ahon asonsi vungprup-lo.

¹⁵Anke la nonhet kethitang agadha akecheng thek-long-lo. La ingkupsi humlo, lapen la pen bangsuri isi amonit pathilo.

¹⁶Lasi Semson lunlo, Ejon agadha akecheng pen ne bangsuri isi amonit pathilo; Ejon agadha akecheng pen ne lahei abui builo.

¹⁷Laso aphi la akecheng arrepi varchorlo. La keplang adim ke Ramath Lehi pusi irlo.

¹⁸Ansi Semson lang ingitpik-lo, lasi la HEMPHU aphan hangsi pulo, “Nang nephan la thedung akehai pilo, seta ne kelangit pen thinangjima lapen la kekroikre a-Philistia atum nang pacherithujima?”

¹⁹Lasi Lehi along HEMPHU longle kangder phlak-lo lapen la pen lang pangbop-lo. Semson la junlo lapen rengmejirlo; lasi laso angbop Hakkore pusi amen irlo; la nonputa Lehi along dolang.

²⁰Philistia atum Israel aphuthak kepangri ahut Semson ningkan 20 Israel aso aphan jalo.