Read Karbi KANGSAI ATUM 16 Bible Online

KANGSAI ATUM 16 - Karbi bible

KANGSAI ATUM 16

¹Arnisi Semson Philistia arongsopi Gaza damlo, hadak inut abeisapi chetong-lo lapen la pen irap-rap-lo.

²Semson hadaksi dolo pu Gaza arat atum chinilo, lasi halatum adim komchen lo lapen rongsopi anghap along jopangthang laphan inghongding-lo. Halatum jopangthang dojoijailo, lapen mathalo, “Arnikevang an etum inghong-lonang, anle etum la aphan pathilonang.”

³Bonta Semson hadak jirlo achitim ansi dochot-lo. Anke la thursi rongsopi anghap ot-loksi la angsong rungtang-lo, inghapso-heihei, anujok-heihei, kangkir ason kedo-an penpen la halahei aphan athak batkoksi halahei inglong angsong atovar soding Hebron anglong angdenchit anglong an ponlo.

⁴Laso aphi, Semson inut a-arloso Delilah pu amen pen aningchedok-lo, la Sorek arloksi kedo.

⁵Philistia arecho bangpho labangpi adung damsi pulo, “Semson kopisi pu-an kangtangma nangkepathan-jile moinon lapen etum laso aphuthak chepahai pen la aphan ingnanghetsi thangta pacheplang un-edet lonang. Netum abangphutin ta nangphan rup angkleng dum pharokre-isi nangpiji.”

⁶Lasi Delilah Semson aphan pulo, “Kanghon pen nang kopisi lapu-an kangtangthek loma nethantha. Jongsi mane nangphan ingnanghet pen thangta nangphan paklem un-edetji pulote, la kopusonsi keklemnangpo?”

⁷Semson thak-lo, “Halatum jongsi ri throksi thai arri kemi kekrengkre kepacherop pen ne ingnanghet lote neta bang asonthakthak jakong avedetpo.”

⁸Lasi Philistia arecho atum Delilah aphan thai arri ri throksi vanpilo, la kekrengkre, lapen labangpi Semson aphan ingnanghet-lo.

⁹La bangpi kaprek angdeng along ajehak amonit padolo; lasi bangpi hangchirlo, “Semson! Philistia atum vangtang-lo!” Bonta thai arri-heihei me kephole kechingtopet asonsi la padakprup-prup-lo. Lasi halatum la ajakong kepatu alam chininedet-lo.

¹⁰Delilah, Semson aphan pulo, “Langtha, nang nephan nechongthuisi ahok alam nethanthe lilo. Kanghon pen kopusonsi bang nangphan nang-ingnang unjima? Nethantha.”

¹¹La thak-lo, “Mane jongsi nephan ke-en-epin arri pen ne ingnang lote, neta bang kaprek atum ason thak-thaksi jakong avedetpo.”

¹²Lasi Delilah mirak arri lang-lo lapen la aphan ingnanghet-lo. Ansi labangpi hangchirlo, “Semson! Philistia atum vangtang-lo!” Monit atum angdeng kaprek si dopet-lo. Bonta ari kerak-i arri honjengso asonsi padakprup-lo.

¹³Delilah Semson aphan pulo, “Nang non anta nephan nangchong-thui bomlang lapen ahok alam nethanthe lilo. Nangphan kopusonsi bang kaprek atum nang ingnanghet thekpoma nethantha.” La thak-lo, “Nang jongsi nechu klei throksi therang pen thak raphet-ra kurdang pen la rak-rap-het lote neta bang kaprek atum asonsi jakong avedetpo.”

¹⁴Delilah la aphan padoksi amek pajang-lo, lapen chu klei throksi ensi lahei therang pen thak rap-het-lo. Bangpi la kurdang pen rak-hetsi hangchirlo, “Semson! Philistia atum vangtang-lo!” Bonta la amek prang-lo lapen achu therang pen chepajok-lo.

¹⁵Lasi laphan bangpi pulo, “Nang nephan chinghonlo pu kopusonsi kepu unpo, nang la angthek nepaklangkle-det-lang. Nang nephan batai kethom nechongthui tang-lo, lapen non anta nang kopusonsi ingtanglong loma nephan nethanthe-lang.”

¹⁶Bangpi la aphan arnivangta arjuverlo. Laso aputhak bangpi la aphan arjuver amatsi la dosojolo,

¹⁷kejut ke labangpi aphan la ahok alam thanserlo, “Nechu kaita ingtipte pinlang, “ la pulo, “Ne mahang kethek arni pen Nazir asonsi nephan Arnam arideng hodaidet-lo. Nechu jongsi ingtip-lo pulote, nejakong avedetpo lapen bang atum ason thakthak nejakong avedetpo.”

¹⁸La ahok alamsi thangtang-lo pu Delilah chinidet aphi bangpi Philistia arecho atum aphan birta pathandam toilo, lapen pulo, “Vangnon puthot ephong, la nephan ahok alam nang chethandet-lo.” Ansi halatum vang-lo lapen tangka ta halatum along chevanlo.

¹⁹Semson aphan Delilah padoksi amek pajang-lo arbak-het-lo, lapen inut amonit aphan hangsi achu aklei throksi ingtip-lo.

²⁰Ansi bangpi hangchirlo, “Semson! Philistia atum vangtang-lo!” La amek prang-lo lapen mathalo, “Aphrang ason thak-thaksi ne chepajokphlotsi dampo.” HEMPHU laphan otang-lo pu la chechinine.

²¹Philistia la aphan nepchek-lo lapen amek hini hor-et-lo. Halatum laphan ha Gaza pondetsi tam-angchin pen ingnanghet-lo, lapen kebeng angdeng along la aphan sok-ketok akor along sok patok-lo.

²²Bonta la achu chingjokthulo.

²³Philistia arecho atum an halatum a-arnam Dagon aphan isi thedung athok kepiji lapen ketalonjisi chingrumlo. Halatum lunlo, “Netum a-arnam netum ahotur Semson aphuthak kehaiji ajakong nepilo.”

²⁴Halatum amethang aning chepajangsi halatum pulo, “Semson aphan hangnon, lapen la etum aphan ening-parongjile paklem nang!” Semson aphan kebeng angdeng pen kevan ahut halatum aphan aning-parongjisi halatum Semson aphan paklemtoilo, lapen nujokpi hongni adak parjaptoilo.

²⁵La aphan rat atum kethek-long pen halatum a-arnam aphan chorolo: “Netum alongle kepavir abang lapen ongdung netum aphan kepathi abang, netum ahotur aphuthak kehaiji ajakong netum a-arnam nepitang-lo!”

²⁶Ari otding pen kejapon a-oso aphan Semson pulo, “Hemthengsong aphan karchak anujokpi adung nebinon, Ne hadak charchunglang.”

²⁷Hem thengsong pinso arlo pen plengset-lo. Hadak bangpho Philistia arecho atum dolo, lapen sarnung angsong pinso arlo bang suri kethom anbak dolo, halatum aning keparong a-Semson aphan lang-lo.

²⁸Anke Semson ardomlo, “Keklem un Arnam, kanghon pen ne mathatha, kanghon pen Arnam, nephan non ephong jakong nepitha, anke ne ephong akangbai pen nemek hini nekehor a-Philistia atum aphan alar huilongpo.”

²⁹Lasi Semson hem karchak angbong anujokpi hini aphan pu pu ari ehong-hong lahei aphan ingbailo

³⁰lapen hangserlo, “Philistia atum pen pen pathinang!” La ajakong kedo-an pen ingbailo lapen hem recho bangpho lapen akaprek kedo-an aphuthak krep-lo. Kerenglang akai ahut mute kethi ahutsi Semson rat aphan kepathi ongmulo.

³¹La a-ik atum lapen la adon arap nanghirsi la abang arpum keponjisi vang-lo. La aphan latum pondet-lo lapen la aphan Zorah lapen Eshtaol angbong, apo Manoah athiri along pip-lo. La ningkan 20 Israel atum aphan jalo.