Read Karbi KANGSAI ATUM 18 Bible Online

KANGSAI ATUM 18 - Karbi bible

KANGSAI ATUM 18

¹Halaso ahut Israel atum arecho avelang. Halaso ahut Dan akhei ta amethang alongrilo pu kechepu longji aphan ribomlo, lapen kecheraiji aphan pima Israel akhei angbong halatum amethang alongle pu chepudun longlelang.

²Lasi Dan akhei ahemtun kedo-an angbong pen bangpho kethekser atum ingvailo lapen halatum aphan longle keparijisi Zorah lapen Eshtaol arong pen toilo. Halatum Ephraim anglong alongri nanglesi Mikah ahem nanglesi sang-lo.

³Halatum hadak kedo ahut Levi riso ase halatum chinidet-lo, lasi latum la along damlo lapen arjulo, “Nangli ladak kopisi keklemlo? Nangliphan ladak komatsi nangkevanlo?”

⁴La thak-lo, “Neli Mikah pen chechak-et-lo, la neliphan akurusar asonsi tangka nelipipo.?”

⁵Laphan halatum pulo, “Kanghon pen Arnam aphan ne-arjupitha, neli-tum kedambom akam chunji mene?”

⁶Kurusar thak-lo, “Nanglitum thangta mathanangne. HEMPHU-si nanglitum laso atovar kedam nanglangdunpo.”

⁷Lasi bangpho amonit atum osi Laish arong anat damlo. Halatum hadak kedo arat atum aphan ko-an jokvan pensi dolong-loma thek-long-lo, Sidon kedo atum asonthak-thak-lo. Latum ning ingsamjinjan, dojoijai arat, kaprek penta kecharvo ave; latum kenangji ason an latum do. Latum Sidon asor pen kedo helovinglang lapen kaprek atum pen thangnat akecherap ave.

⁸Bangpho amonit Zorah lapen Eshtaol nangkechele ahut, halatum dorap-rap atum arjulo, halatum kopisi kelong-loma pu.

⁹“Vangnon,” halatum thak-lo, “Etum Laish tengkheng-lonang. Netum longle thek-long-lo, la mepik. Dak thangta kavepin adim donangne; paprapnon! Damra la cheraidam lonang!

¹⁰Nangtum hadak lelote nangtum thek-longpo halatum jat ason aputhakta ningbi nangne. La thedung adet, inut amonit kopima kenangji la dolo lapen Arnam nangtum aphansi la nangkepilo.”

¹¹Lasi bang pharo throk Dan akhei Zorah lapen Eshtaol olo, latum kechedanjisi chesik-lo.

¹²Judah alongri Kiriath Jearim along halatum damsi mukam chekimlo. La apotsi nonputa laso adim Dan Amukam pusi pubomlo.

¹³Halatum hadak pen dambomsi Ephraim alongri anglong Mikah ahem vang-lo.

¹⁴Ansi Laish adung arei alongle kelang bangpho atum ari asangho atum aphan pulo, “Ladak hem-heihei angbong ehum ahem along isi thengpi akumlin, rup pensi ketop, nangtum chinima? Hadak kaprek kaprek akumlin-heihei lapen kurusar achoita epak do. Nangtum ateng ke etum kopisi klem nangji?

¹⁵Lasi latum Mikah ahem Levi riso kedo adim damlo lapen Levi aphan arjulo, la kosonsi dobomma pu.

¹⁶Halaso ahut amat Dan akhei pen bang 600 ron aso atum ron kechedanjisi inghap along arjapding-lo.

¹⁷Laso ahut kurusarke bang 600 arisimkedo amonit atum along kedo un ahut bangpho kelangjoi atum hem lutdamthorsi rup pen ketop athengpi akumlin, kaprek akumlin-heihei lapen kurusar achoi anta ponpi-et-lo.”

¹⁸Monit atum Mikah ahem arlo lutdam pen kepangthir ahormu kepon ahut, kurusar halatum aphan arjulo, “Nanglitum kopisi keklemlo?”

¹⁹Halatum thak-lo, “Dojoi! Itheta ningjeri, netum along nangdunra netum akurusar lapen netum thanparebang plangnon. Edon ahem kurusar keplang tangdet ke Israel akhei akurusar keplang un-e-detji ma?”

²⁰Laso alam kurusar aphan aningpadok-lo, lasi la kepangthir ahormu-heihei ponsi halatum along dunjuilo.

²¹Halatum pupu chelangsi kedamji pangcheng-lo, halatum apiso aso, kepangreng api lapen halatum ahormu-heihei paphrang-lo.

²²Mikah kechedanjisi adung arei aphan kehang un ahut halatum Mikah ahem pen kedam heloving an lo. Seta latum Dan amonit atum along phodunrok-lo.

²³Lapen latum Dan amonit atum aphan aningthilo, lapen halatum chetevarsi Mikah aphan pulo, “Kopi athesi la an kechebohong amonit kevanpak-lo?”

²⁴Mikah thak-lo, “Nangkopisi kepulo, ‘Kopi athelo pu kepu?’ Nangtum ne kurusar aphan lapen ne keselam a-arnam aphan pontang-lo! Nephan kopi asonsi ke-o ason kedolang?”

²⁵Dan amonit atum pulo, “Nang ethebakta ningjejedetsi akeme, kalite lahei amonit atum aningthisi nangphan tengkhengpo. Anke nang lapen nanghem isita thinang-etpo.”

²⁶Anke halatum dambomlo. Mikah thek-long-lo laphan mute halatum ingtangmu, lasi la chiruisi hem chedamjoilo.

²⁷Dan amonit atum kurusar lapen Mikah keselam ahormu-heihei pondet aphi, halatum damsi Laish, ingsamjinjan, kedojoijai arat la Beth-Rehob arlok arong asor aphan tengkheng-lo. Latum rong aso atum aphan pathilo, lapen rongsopi me keidut-lo.

²⁸Halatum aphan kepajokdunji baduta ave, pima Laish ke Sidon pen kedo cheheloving lang, lapen latum akaprek atum pen thangnatta kecherap ave. Dan amonit atum rong kimthusi hadak dolo.

²⁹Latum Laish aphan Dan pusi amen irlo, Jakob asopo Dan, halatum aphusar amen atengthot irlo.

³⁰Dan amonit atum karchojisi kumlin bat-lo lapen Jonathan, la Gershom asopo lapen Moses asupo dan akhei aphan Kurusar plang-lo, lapen la aso-asu atum latum aphan ban ponpetik an halatum akurusar asonsi ingduk-lo.

³¹Lasi Arnam kardom apehem Shiloh along Mikah akumlin kaita doverlo.