Read Karbi KANGSAI ATUM 19 Bible Online

KANGSAI ATUM 19 - Karbi bible

KANGSAI ATUM 19

¹Halaso ahut Israel atum arecho kedoji aphrang, inut a-Levi Ephraim anglong anosi dolo. La Judah alongri Bethlehem pen inut asopi ke-enpangtarji aphan ponlo,

²bonta bangpi la aphan aningthisi Bethlehem apo ahem chedamjuilo, lapen hadak chiklo jonphli dolo.

³Ansi pinso abang bangpi aphan kangthumdunjisi chesik-lo, lapen bangpi aphan hem kecheponjisi bor-ilo. La aban cheponlo lapen gadha jonni ta ponlo. Arloso abang Levi aphan hem arlo ponlo, lapen arloso apo la aphan thek-longsi aning arongpen kardom chepilo.

⁴La aphan ajo kepadojisi apo abang khang-lo, lapen lasi la nithom salo. Penansota latum an chorap-rap-lo lapen ajo hadak dokok-lo.

⁵Niphli adapprang latum thursi kedamji aphan chesik-lo. Bonta arloso apo Levi aphan pulo, “Kechengsi kecho ason chotha. La nangliphan mesenji. Laso aphile dam seta chok.”

⁶Lasi banghini amonit ingnithujoilo lapen chorap-rap-lo, junrap-rap-lo. Anke arloso apo abang la aphan pulo, “Kanghon pen paningveta sakoknon lapen kedo ning chepajangtha.”

⁷Levi abang kedamjisi thurlo, seta ahupo abang la aphan khangdunlo, lasi aningve kaprekta la hadak sakok-lo.

⁸Pho adapprang la kebarjisi chesik-lo, bonta arloso apo abang pulo, “Kanghon pen pinene ason chotha. Penang an aphile damnon.” Lasi banghini amonit chothurap-rap-lo.

⁹Pinso, la enpangtar apiso lapen aban atum puthot ke-oji aphan kechesik ahut ahupo abang pulo, “Langtha, non arni ingsamtang-lo; paningveta sathukoknon. La ingtingdappo, dak sakok-ra do cheparengme non. Penap adapprangle thurra hem chedamthunon.”

¹⁰Bonta pinso abang puthot ajo kesangji aninghanghesi, la lapen la enpangtar apiso, halatum aban lapen agadha jonni athak hormu atilup pen pen halatum atovar chedamlo.

¹¹Halatum Jebusi (lake Jerusalem) adung nangkele ke keningvelo, lasi aban abang ahemphu aphan pulo, “Ilitum Jebusi arongsopi along-le ajo sadamkok-lonang.”

¹²Bonta la ahemphu pulo, “Israel arat kalite etum badu arongsopi seta sanangnelo.

¹³Etum damchot pen Gibeah anat Ramah along ajo sa lonang.”

¹⁴Lasi latum Jebusi parsi halatum atovar chedamlo. Gibeah ke Benjamin alongri, along nangkele ke arni kangsamlo.

¹⁵Latum hadak dam pen ajo kesangjisi tovar suilo. Halatum rongsopi arlo damlo lapen thedung atikup alongsi chongnidamlo, bonta baduta latum aphan ajo kepasangji aphan ponpelo.

¹⁶Latum hadak kedo un ahut, inut asarbura hidi akam keklem pajutsi nangchevoilo. La ta aphrangke Ephraim anglong akeng-ri kedo abang-lo. bonta nonke la Gibeahsi dolo, (akaprek atum ke Benjamin akhei.)

¹⁷Rongsopi atikup along arleng kesar abang dampri-dampro atum aphan thek-long-lo lapen arjulo, “Nanglitumke konat pensi kevang-loma? Konatsi kedampo?”

¹⁸Levi abang thak-lo, “Nelitum Judah alongri Bethlehemsi kedo, lapen non nelitum methang ahem anatsi chedamji pusi Ephraim Anglong akeng-ri nanglerok-lo. Baduta nelitum aphan ajo kesangji aphan nehangponpe,

¹⁹nelitum kecho ahormuta do, lapen ne ke-en-pangtar nelipiso, neliban aphan jokta him dolang. Nelitum kenangji ason an nelitum do.”

²⁰Arlengkesar pulo, “Nanglitum aphan nelihem ning aklong pen nanghang-lo! Neli nanglitum aphan langpo; nanglitum tikup along ajo pangthang nangnelo.”

²¹Lasi la latum aphan amethang ahem cheponlo lapen halatum agadha aphanta pacholo. La alohi atum ari akeng chingroisi an cholo.

²²Halatum aning arong chepibom ahut menmen ajehak amek-kelangno atum rong pen vangpaksi hem kompet-lo lapen inghap theng-lo. Halatum akesar aphan pulo, “Nanglong nanghem nangkedun amonit ingtan vannon! Netum la pen kehingno akam choklempo!”

²³Bonta akesar abang ingtan nangbarsi halatum aphan pulo, “Kali jirpo atum! Kanghon pen lapuson kehingno a-ot kave akam klemri! Laso amonit ke nehem alohilo.

²⁴Langtha! Ladak la enpangtar apiso lapen nesopi inut okarjang dolo. Ne halatum aphan ingtan nangtoipo, lapen halatum aphan nangtum enlongpo. Halatum aphan nangtum kopima nangning kehang alingle klemnon, bonta lason kehingno akam laso amonit aphuthak klemri!

²⁵Bonta la aphan monit atum arjudun long-lo. Lasi Levi abang enpangtar apiso aphan ingtan halatum along bidunkok-lo. Jopangthang halatum bangpi aphan un an chonep-lo lapen chenek-ot-lo, ha ingthangthe tik an.”

²⁶Adapprang arloso abang apenan kedo adim akesar ahem anghap along charvak-o-lo. Arni kevang ahut anta bangpi hadaksi dolang.

²⁷Bangpi apenan adapprang thurlo, lapen hem kechedamjisi inghap ingpulo, lapen enpangtar apiso inghap angno tithorsi ari inghap ajakan along ke-otding thek-long-lo.

²⁸La pulo, “Thurnon! Etum damlonang.” Bonta la thakthedet-lo. Lasi bangpi abang arpum la agadha athak arthangsi ahem chedamlo.

²⁹La kechele ahut hem arlo damsi nokso epak endamlo. La enpangtar apiso abang arpum ensi, la beng krehini ingthanlo, lapen la athan Israel khei krehini aphan lolo.

³⁰Kethek-long abangphutin atum pujolo, “Netum lapuson arjulongle pinlang! Israel atum Ijip obub pen lapuson plangplepin lang! Laso aputhak etum pine klemvek nangji! La kopi apot-loma?”