Read Karbi KANGSAI ATUM 2 Bible Online

KANGSAI ATUM 2 - Karbi bible

KANGSAI ATUM 2

¹HEMPHU apherangke Gilgal pen Bokim damsi Israel arat aphan pulo, “Ne nangtum aphan Ijip pen nangvanlo, lapen nangphusar atum aphan ne kechak alongle along nangvanlo. Ne pulo, ‘Nangtum pen kechejok aloh kaita phriphrelo,

²nangtum dak kedo badu arat pentame kechejokji akam ave. Nangtum halatum karkli adovan-heihei phri nangji.’ Bonta ne nangkepu ason nangtum klemklelang. Nangtum kalilesi klemtang-lo!

³Lasi ne nangtum aphan nangpulang, ne lahei arat aphan nangphlung pipedetpo, nangtum kechanbom ason thakthak latum nangtum ahotur plangpo, lapen latum a-arnam-heihei aphan karcho pen ajok nangtum aphan nangmoipo.”

⁴Pherangke abang laso alam ningjedet aphi, Israel arat kedo-an kechiru pangcheng-lo,

⁵lapen hadak Bokim pu adim, latum HEMPHU aphan athok-heihei pilo.

⁶Joshua Israel arat aphan amethang atovar pachedamrep-lo, lapen abangphutinta apharman alongle chepahemphurep-lo.

⁷Joshua rengtik ke Israel arat HEMPHU aphansi ingduk-lo, lapen la thilot aphi Israel aphan HEMPHU thedung akam-heihei keklempi kethek-dunlong kejalin atum rengtik an halatum lasonsi klemponbomlo.

⁸HEMPHU aban Nun asopo Joshua ningkan 110 arta ahutsi thi-lo.

⁹La aphan Timnath Serah pu Ephraim anglong alongri Gaash Anglong nirep amethang alongle achet alongsi pip-lo.

¹⁰Halaso a-ove an thi-et-lo, lapen aphi a-ove atum HEMPHU Israel aphan kopi klemtang-loma tengne-et-lo.

¹¹Israel arat atum HEMPHU aphan langplotsi pap klemlo lapen Baal-heihei aphan kangduk pangcheng-lo.

¹²Halatum HEMPHU lake halatum aphusar atum a-Arnam Ijip adet pen kevan a-Arnam aphan ingdukdesi obup-lo, lapen akaprek arnam-heihei, la hem adung arei a-arnam aphansi ingduk-rong-lo. Latum halahei aphan angphun patongkisi HEMPHU aning papung-lo.

¹³Latum HEMPHU aphan archochesi Baal-heihei lapen Astartes aphan ingduk-lo.

¹⁴Lapen HEMPHU Israel aphuthak aningthilo lapen dokait atum patengkhengsi halatum papon longtoilo. Alangli hotur atum halatum do-an aphuthak pachepahemphu toilo, lapen Israel atum amethang aphan chepajok thekthedet-lo.

¹⁵Aphongtinta latum ron kechedanji aphan damlo, HEMPHU keputang asonthotsi halatum abethurlo. Latum jasemetsi sung nang-lo.

¹⁶Lasi dokait atum pen Israel aphan kepajok Abang HEMPHU keja atum pilo.

¹⁷Bonta Israel arat atum jalin atum alam arjudun long-lo. Israel atum HEMPHU aphan kroithipthesi kaprek arnam-heihei aphan ardom-rong-lo. Latum apo atum ke HEMPHU ahukum-heihei kroilo, bonta la ovekemi atum keklemji molo.

¹⁸HEMPHU Israel aphan keja abang kepi ahut HEMPHU la aphan rap-lo lapen keja abang rengtik an halatum ahotur atum pen rat aphan pajok-lo. HEMPHU halatum aphan jinsopo, pima latum akesung lapen bang kechenek ot pensi halatum ningri nang-lo.

¹⁹Bonta keja atum thidet aphi rat atum aban atovar-heihei chevoisi aphrang a-ove apar hingnomuchotsi klempo. Halatum akaprek a-arnam-heiheisi ardompo, lapen halatum akehingno atovar keche-oji molo.

²⁰HEMPHU Israel aphuthak aningthihaksi pupo, “Laso akhei Ne aphusar atum aphan kepaklemtoi kechejok ahukum ingditang-lo. Pima latum nephan kroikrelo.

²¹Joshua kethi ahut kedobom kaprek akhei aphan laso alongle pen Ne phlungphlelo.

²²Nephan Israel arat atum kroima kroikrema aphusar atum keklem ason kelangjisi Ne latum aphan rimpo.”

²³Lasi HEMPHU lahei akhei aphan bangso alongle along padolongtoilo; alangli Joshua aphanta lahei aphuthak kehaidetji ajakong pipedet-lo, lapen Joshua thidet aphi seta lahei aphan alangli phlungphle det-lo.