Read Karbi KANGSAI ATUM 20 Bible Online

KANGSAI ATUM 20 - Karbi bible

KANGSAI ATUM 20

¹Israel arat atum Dan anirep pen ha Beersheba anitur lapen Gilead anihang anta kehang atum an vangpet-lo. Mizpah along HEMPHU angno latum kedo-an isipetsi chingrumlo.

²Arnam arat kechingrum amei along Israel kedo-an akhei ajalin atum dopet-lo, lapen hadak lak-phli aron-aso do.

³Halaso ahut Benjamin arat ta kaprek Israel kedo-an Mizpah along chingrumlo pu arjulong-lo. Israel atum arjulo, “Kopusonsi laso kehingno akam keklem longpop loma netum aphan nethantha?”

⁴Kepathitang enpangtar a-arloso apenan, Levi thak-lo, “Ne lapen enpangtar nepiso Gibeah, Benjamin alongri ajo kesadamjisi damlo.

⁵Gibeah amonit atum neliphan ketengkhengjisi vangpak-lo lapen hem ajo kompet-lo. Latum neliphan kepathijisi aninghang-lo; la klemklesi enpangtar nepiso aphan latum chonep-lo lapen la thilot-lo.

⁶Neli la abang arpum vandetsi beng-ilo, lapen Israel khei krehini aphan ebeng beng lorep-lo. Lahei amonit atum etum angbong isi kehingno lapen a-ot kave akam klemtang-lo.

⁷Nanglitum dak kedo-anta Israel atumlo. Laso aputhak etum kopisi keklem nangji?”

⁸Kedo-an arat atum thurpetsi puhurlo, “Etum kedo-an pehem tame, hem keme tame, ehem chedam nangnelo.

⁹La helo etum keklem nangpo: Etum khadot pathulonang lapen ajehak amonit ingvaira Gibeah tengkheng lonang.

¹⁰Israel angbong phankep pen ephan amonit ke ron armu amonit aphan an sik pipo lapen kaprek atum anke Gibeah damsi aduk pidam nangji, pima la a-ot kave akam Israel atum angbong latum klemtang-lo.”

¹¹Lasi kedo-an Israel amonit atum rong ketengkhengji esonnat athe pen chingrumpet-lo.

¹²Israel atum Benjamin akhei alongri an pherangke toilo, “Kopisi lason kehingno akam nangtum keklemloma?

¹³Gibeah along amek kelangno atum an nanghodainon anke netum halatum aphan pathilongpo, lapen Israel pen laso akehingno pakak longpo.” Bonta Benjamin arat atum kaprek Israel atum alam anocheden vangvedet-lo.

¹⁴Kaprek Israel atum pen kechedanjisi rongsopi kedo-an pen Benjamin atum vangpak-lo.

¹⁵Halaso arni latum arongsopi kedo-an pen bang suri 26 aron-aso hang-lo. Lapen apar Gibeah arongsopi kedo atum bang 700 keparvi amonit invailo.

¹⁶Abangphutin ta halatum phamri pen arlong chujeng athek aphan varparothek lapen la kaita paroverthek.

¹⁷Israel akhei kedo-an pen bang Lak phli kethantang aron-aso dolo.

¹⁸Bethel, karcho adim Israel atum damlo lapen halatum hadak Arnam aphan arjulo, “Koloso akheisi ketengkheng cheng nangjima pu?”

¹⁹HEMPHU thak-lo, “Judah akhei.” Puthot adap Israel atum damlo, lapen Gibeah arongsopi adung amukam chekimlo.

²⁰Latum damsi Benjamin aron-aso armu ketengkhengjisi damlo lapen ron-aso atum rongsopi anatsi pangnolo.

²¹Benjamin aron-aso armu rongsopi angtan nangbarsi arni chiche ako bang suri 22 Israel aron-aso aphan pathilo.

²²Ansi Israel atum karcho adim chedamsi HEMPHU angno ningrilo ha ningvevetik an.

²³Latum alangliphan arjulo, “Netum akorte Benjamin abe kethur pen netum ron chedan damthu nangjima?” HEMPHU thak-lo, “Kalang damnon.” Lasi Israel aron armu aning che-thelo lapen latum aron-aso atum aphan aphrang arni asonthot padolo.

²⁴Latum bataihini aphong Benjamin aron armu abethursi damlo.

²⁵bataihini aphong Benjamin aron armu atum Gibeah pen nangbarlo, lapen laso aphongta latum bangsuri 18 Israel kethantang aron-aso aphan pathilo.

²⁶Ansi kedo-an Israel arat atum Bethel along damsi ningri damlo. HEMPHU angno latum ingniphrong-lo, lapen arnikangsam anta an chochedet-lo. Latum kechingrum athok-heihei lapen ajehak athok-heihei lapen danta HEMPHU angno phrinlo.

²⁷Halaso ahut Arnam Kechejok Aloh amarjong Bethel alongsi do,

²⁸lapen Eleazar asopo, lapen Aaron asupo Phinehas si la chepahemphulo. Rat atum HEMPHU aphan arjulo, “Puthot netum akorte Benjamin atum pen ron chedan nangjilangma mate obup nangjima?” HEMPHU thak-lo, “Chedannon. Penap halatum aphuthak Ne nangpahaidetpo”

²⁹Lasi Israel aso atum ajehak aron-aso Gibeah kompetsi chepatulo.

³⁰Ansi puthot nithom arni latum Benjamin aron-armu abethursi damlo lapen halatum aron-aso Gibeah anat pangnosi padolo, aphrang latum keklem asonthot klemlo.

³¹Benjamin aso atum kechedanjisi vang-lo lapen rongsopi angtan nangbarlo. Aphrang asonsi halatum Israel aso aphan ajehak Bethel atovar anat lapen Gibeah atovar anat rong angbong pathi pangcheng-lo. Halatum bang 30 Israel aso aphan pathilo.

³²Benjamin aso atum chepulo, “Aphrang keklem asonthotsi etum halatum aphan sap-lo.” Bonta Israel aso atum kecheruijisi lapen halatum aphan rongsopi pen tovar-heihei anat kejaponjisi mang-lo.

³³Lasi ongdung a-Israel aron-aso atum aphi chiruisi Baaltamar along chingrumlo, lapen Gibeah kekomchen amonit atum halatum kechepatu arongsopi komchen adim a-arlong-heihei pen damserak-lo.

³⁴Bang suri 10 Israel angbong kangvaipame amonit atum Gibeah tengkheng-lo lapen ron kechedan sikpik-lo. Benjamin aso atum virrang-lo pu chechininelang.

³⁵Benjamin atum aphuthak kepahaijisi HEMPHU Israel aphan jakong pitang-lo. Israel atum halaso arni bang 25,100 ahotur atum aphan pathilo,

³⁶lapen Benjamin aso atum remtang-lo pu chechinilo. Israel ongdung aron-armu Benjamin aso pen aphi chiruilo, pima halatum Gibeah komchen kechepatu amonit aphansi chikilo.

³⁷Lahei amonit Gibeah anat kat serak-lo; rongsopi arlo chethakjam-jamsi hadak abangphutin aphan pathilo.

³⁸Ongdung Israel aron-armu atum lapen kechepatu armu atum angthek chepilo. Halatum rongsopi pen mehi angpong kethek-long pen,

³⁹rong angkang kedo a-Israel atum chepangnolo. Halaso ahut Benjamin atum bang 30 a-Israel aphan pathitang-lo. Halatum chepulo, “Chenamsi etum aphrang asonthotsi halatum aphan sap-lo.”

⁴⁰Anke angthek klang-lo; rong, Benjamin aso atum halatum aphi chelang-lo lapen manghuhak-lo lapen rongsopi me kecho ade saidelo.

⁴¹Anke Israel atum chepangnohamlo, lapen Benjamin aso atum sungkrung-lo, pima halatum chechinilo, latum virrang-lo pu.

⁴²Halatum Israel atum pen aphi chiruilo lapen hidi ajo kat-lo, bonta halatum chepajok un-edet-lo. Halatum ongdung aron-armu lapen rongsopi nangkebar ateng angbongsi dokok-lo, lapen halatum virdet-lo.

⁴³Israel atum hotur aphan padanchek-lo, lapen sangse pin pen latum ha Gibeah anihang anat halatum aphan hungdunlo, dambomsi latum pathiponbomlo.

⁴⁴Bang suri 18 kemenei a-Benjamin aron-aso aphan pathilo.

⁴⁵Kaprek atumta chepangnosi hidi ajo kat-lo ha Rimmon Arlong akejejangtang ajo anat. Tovar along halatum aphan bang suri 5 pathilo. Ahin an Israel atum Gidom anat hungdunsi, bang suri 2 pathilo.

⁴⁶Pangrumpet halaso arni bang 25 a-Benjamin aso aphan latum pathilo. Kethi nang atum anta angthin kethe aron-aso saidelo.

⁴⁷Bonta Rimmon Arlong anat bang 600 an hidi pen jok-lo, lapen hadak latum chiklo jonphli dolo.

⁴⁸Israel atum kedo-an a-Benjamin aphuthak pangnokhrap-lo lapen pinso-arlo lapen osomar lapen pi anta pathilo. Halatum kelong arongtin me keilo.