Read Karbi KANGSAI ATUM 21 Bible Online

KANGSAI ATUM 21 - Karbi bible

KANGSAI ATUM 21

¹Israel atum Mizpah along kechingrum un ahut halatum HEMPHU aphan aning aklong pen semetang-lo, “Ili baduta Benjamin atum esomar atum aphan pa-enlong nangne.”

²Lasi Israel arat atum Bethel along damlo, lapen arnikangsam an Arnam angno ingnilo. Asekethe lapen aning hodaksi chirulo:

³“Israel a-Arnam HEMPHU, la kopi athesi paplanglong loma? Kopisi Benjamin akhei Israel pen kevir nangpoma?”

⁴Puthot adapprang rat atum isi adovan hadak builo, kechingrum athok-heihei pilo, lapen ajehak athok-heihei phrinlo.

⁵Halatum arjulo, “Israel akhei kedo-an angbong HEMPHU angno Mizpah along kechingrum dunde asong doma?” (Halatum aning aklong pen semetang-lo, Mizpah along kedunde abangphutin amonit aphan pathilotpo.)

⁶Israel arat atum, Benjamin atum aphan keklem apot aning che-oilo lapen pulo, “Pini Israel atum angbong la isi akhei avetang-lo.

⁷Kedo-an a-Benjamin aso aphan kopusonsi ili piso ripipo? Etum HEMPHU aphan semetang-lo, etum asomar halatum aphan piso chopipelo pu.”

⁸Halatum angbong jongsi Israel akhei angbong Mizpah akechingrum along kedunde asong doma pu karju ahut, halatum thek-long-lo, Gilead alongri Jabesh pen inutbakta ave;

⁹ron armu amen kehang ahut Jabesh pen baduta thakdun abang ave.

¹⁰Lasi mei pen suri krehini halatum angthin kethenei amonit toisi hukum pilo, “Damra Jabesh along abangphutin amonit aphan pathidamnon, arlosopimar lapen osomar atum aphanta pathi-etnon.

¹¹Pinso kedo-an lapen arloso okarjang kali an aphanta pathinon.”

¹²Jabesh arat angbong bang 400 a-okarjang halatum long-lo. Lasi Kanaan adet Shiloh amukam along halatum aphan vandet-lo.

¹³Ansi mei adang Rimmon Arlong along kedo a-Benjamin aso aphan lamthe ithe toilo, lapen ron chedandelo pu abirta papitoilo.

¹⁴Benjamin aso atum vangthulo, lapen kaprek Israel atum halatum kepathithe Jabesh a-arloso halatum aphan pilo. Bonta lahei halatum aphan dordelang.

¹⁵Rat atum Benjamin aso aphan jinsolo pima HEMPHU Israel akhei angbong ning isi pavetang-lo.

¹⁶Lasi kechingrum ajalin atum pulo, “Benjamin akhei along arloso avelo. Ahin atum aphan kopusonsi ili piso keripipoma?

¹⁷Israel atum angbong isi akhei chepangbo nangne. Benjamin akhei keparengji aphan pine atovar ripivek nangji,

¹⁸bonta etum asopimar latum aphan pa-enlong nangne, pima etum angbong badutame esopimar angbong Benjamin atum kepa-en long abangphan ahirjuno pitang-lo.”

¹⁹Anke latum mathalo, “Shiloh along ningkan esek HEMPHU achojun amei nang tebok het-lo.” (Shiloh ke Bethel anirep, lapen Lebonah anitur Bethel lapen Shekem anihang atovar angbong.)

²⁰Benjamin aso aphan halatum pulo, “Damra drakha aberi ajo chepatu klipnon.

²¹Lapen langnon. Shiloh a-arloso atum chojun amei ahut kekanji aphan vang-lote, nangtum drakha aberi-heihei pen nangbarnon. Jakong pen abangphutin piso inut ennon arlosomar angbong pen lapen bangpi aphan Benjamin alongri anat nangtum along chepondet nangpo.

²²Jongsi halatum apo mate a-ik atum nanglongvang-ra kroikre lote, nangtum pudunnon, ‘Kanghon pen latum aphan netum pabilongtha, pima netum apiso keplangji aphan netum nanglitum pen ron chedan along penle halatum aphan kepon kali, lapen nanglitumta halatum aphan lapuson pen nelitum aphan nekepi kalidet apot nanglitum aseme kephri adai avelo.’”

²³Benjamin aso atum la klemlo; Shiloh along kekanji aphan kevang a-arloso atum angbong pen apiso abangphutinta chongvaiponlo; lapen hem chepondet-lo. Ansi halatum amethang alongri chedamlo, halatum arong-heihei chekimlo lapen dolo.

²⁴Halaso ahut amat Israel atum kedo-anta osi abangphutin ta amethang akhei anat lapen amethang ahemtun anat chedamrep-lo.

²⁵Halaso ahut Israel atum arecho avelang. Abangphutinta aningkehang atengsi klemrep-lo.