Read Karbi KANGSAI ATUM 3 Bible Online

KANGSAI ATUM 3 - Karbi bible

KANGSAI ATUM 3

¹Lasi HEMPHU ajehak akhei Israel aphan asat ke-enjisi ron chedande pin pen Kanaan adet padolong-lo.

²Alangli la klemlo, ron aputhak Israel a-ovetin kechiniji aphan, jasemet ke aphrang pen ron chedandun longlepinlang atum aphan.

³Det along kepadolongtoi ke pho Philistia arongsopi-heihei, Kanaan asor an, Sidon asor an, Hivi asor an Lebanon anglong pen Baal Hermon anglong pen ha Hamath anglong atovar an.

⁴Latum Israel aphan isi asat plangpo, Moses pen ajok halatum aphusar atum aphan kepitang HEMPHU ahukum-heihei Israel atum kroima kroikrema pu kelangji aphanlo.

⁵Lasi Israel arat atum Kanaan atum, Hitti atum, Amor atum, Perez atum, Hivi atum, lapen Jebusi atum angbong donang-lo.

⁶Latum pen halatum piso che-en chedo seroilo lapen halatum a-arnam-heihei aphan ardom dunlo.

⁷Israel arat atum latum a-arnam, HEMPHU aphan tengnetang-lo; latum Alangliphan langplotsi pap klemlo lapen Baal lapen Asherah akumlin-heihei si ardom-rong-lo.

⁸La apotsi HEMPHU Israel atum aphuthak aningthisi Mesopotamia Recho Kushan Rishathaim latum aphuthak pahailongdet-lo, lapen la latum aphuthak ningkan 8 pangrilo.

⁹Ansi Israel atum HEMPHU aphan choningrilo lapen latum aphan kepajokji abang alangli toilo, la ke Othniel, la Kaleb amu Kenaz asopolo.

¹⁰HEMPHU akarjong la aphuthak vang-lo, lapen la Israel atum ajalin plang-lo. Othniel ron damlo, lapen HEMPHU la Mesopotamia arecho aphuthak kehaiji ajakong pidet-lo.

¹¹Lasi hadak ningkan 40 det along ingsamjin pen dolong-lo lapen aphi Othniel thilot-lo.

¹²Israel arat atum puthot HEMPHU aphan langplotsi pap klemlo. Laso apotsi HEMPHU Moab arecho Eglon, Israel apar pangtangmunak-lo.

¹³Eglon, Amor lapen Amalek pen chelangpetsi latum Israel aphan paremdet-lo, lapen sotele arongsopi Jeriko latum cheraidet-lo.

¹⁴Israel atum ningkan 18 Eglon aber donang-lo.

¹⁵Ansi Israel atum HEMPHU aphan choningrilo, lapen latum aphan kepajokjisi Alangli inut amonit toilo. La ke Ehud lo, la inut keparvi amonit, Gera asopo, la Benjamin akhei pen. Israel arat atum Ehud aphan dan-heihei paponsi Moab arecho Eglon along toilo.

¹⁶Ehud amethang aphan ingrup isi anbak keding arangso-heihei anokjir cheselamlo. La ar-e avam choi arlo la chesek ponjoilo.

¹⁷Ansi la, Eglon akromthedung amonit aphan dan-heihei ponpilo.

¹⁸La aphan Ehud dan-heihei kepajir ahut kevan atum aphan la hem padamtoilo.

¹⁹Bonta Ehud amethang Gilgal adung kekurvon a-arlong anat pangnosi Eglon anat damlo lapen pulo, “Recho, neli nangliphan kepujoi abirta do.” Lasi recho abang aban atum aphan pulo, “Netumdet padolongtha!” Lapen halatum kedo-an damjuilo.

²⁰Ansi recho hadak inutvetsi ingnijoilo ha angsong kangsamjet amethang angdeng along, Ehud damputsi alangliphan pulo, “Neli Arnam pen isi abirta nangliphan do.

²¹Ari arvi pen ar-e avam pen nokjir chesansi recho apok arlo la chut-lut-lo. Nokjir do-an lut-lo,

²²lapen abe anta athu si dipthip-lo. Recho apok pen Ehud la sansedet-lo, lapen alangli kengdak tokthip-lo lapen akesa-ur ason nangbarlo.

²³Ansi Ehud ingtan nangbarlo, lapen aphi inghap-heihei ingkirhet-lo, lapen halahei inghap-het-lo,

²⁴lapen damjuilo. Ban atum vang-lo lapen inghap-heihei ingkirhet thek-long-lo, bonta rechoke arlo sangjoi tahailo pusi latum mathalo.

²⁵Halatum kematha atengsi un an inghong-lo, bonta inghap ingpuperek thek-longsi latum inghap aphlok ponsi ingpulo. Lapen halatum ahemphu longle athak kethitang ketilai thek-long-lo.”

²⁶Halatum kanghongbom ahut Ehud damlongjuilo. La arlongkurvon parsi Seirah anat chepajok damlo.

²⁷Ephraim anglong alongri la kele ahut, la Israel amonit ron aphan kehangjisi pong-ut but-lo; ansi la halatum aphan inglong pen thoi an japonlo.

²⁸La pulo, “Ne phi phi nangdunnon! Etum ahotur Moab aphuthak kehaijisi HEMPHU epitang-lo.” Lasi halatum thoi an Ehud aphi phi dunlo lapen Moab atum Jordan parai kekapji pu adim an cherai dam-et-lo; halatum badu amonit aphanta pakap longledet-lo.

²⁹Halaso arni latum bang surikep Moab atum akemenei aron aso aphan pathipilo; inutbakta jok longledet-lo.

³⁰Halaso arni Israel atum Moab aphan paremdet-lo, lapen ningkan 80 det ningkangsam pen dolo.

³¹Adun ajalin abang ke Shamgar, la Anath asopo, la Israel aphan pajok-lo, lapen chainong kechut-i akaibong pen bang 600 a-Philistia atum aphan pathilo.