Read Karbi KANGSAI ATUM 4 Bible Online

KANGSAI ATUM 4 - Karbi bible

KANGSAI ATUM 4

¹Ehud thidet aphi Israel arat atum HEMPHU aphan langplotsi puthot pap klemlo.

²Lasi Hazor arongsopi kepangri abang, inut Kanaan arecho, Jabin pen ajok HEMPHU halatum aphuthak pahaitoilo. La ron apinpo ke Sisera, la Harosheth along kedo abang.

³Jabin ingchin aron ahemkonglong hum 900 do lapen la ningkan 20 Israel aphuthak kesedeng lapen kephangno pensi pangrilo. Ansi kerap kelongji aphan Israel atum HEMPHU aphan choningrilo.

⁴Non Deborah, la Lappidoth apiso, inut montripi lo, lapen halabangso ahut bangpi Israel aphuthak ingsailo.

⁵Labangpi Ephraim anglong alongri Ramah lapen Bethel adak sotele erong arumsi bangpi chongniver, lapen bangpi pen kephar kelongji aphan Israel arat atum hadak dampo.

⁶Arnisi bangpi Barak pu Abinoam asopo, la Naphtali alongri Kedesh arongsopi pen pahang-lo lapen pulo, “Israel atum a-Arnam HEMPHU-si nangphan laso ahukum pilo: ‘Naphtali lapen Zebulun akhei pen bang surikep amonit ponnon, lapen Tabor anglong anat halatum aphan japonnon.

⁷Kishon alangroi along Jabin aron apinpo nangpen kechedanjisi Ne nangvanpo. Laso abang ron ahemkonglong-heihei lapen ron aso doji bonta Ne halatum aphuthak nang kehaiji ajakong nangpidetpo.’ ”

⁸Anke Barak thak-lo, “Jongsi nangli nelilong nangdunji pulote neli damji, bonta nangli jongsi nangdunde pulote neli damde.”

⁹Labangpi thak-lo, “Chokpo, neli nanglilong nangdunpo, bonta kehai pen nang thang anong longle pima HEMPHU-ke inut a-arloso aridengsi Sisera hodaipo.” Lasi Deborah, Kedesh kepalejisi Barak pen dam pangcheng-lo.

¹⁰Barak, Naphtali lapen Zebulun amonit atum Kedesh along phalo, lapen bang surikep amonit la aphi phi dunlo, lapen Deborah ta la penpen damlo.

¹¹Halaso ahut Heber, lapen Ken abang Kedesh adung o-ak athengpi adung Zanannim along la apehem chekimlo. La kaprek a-Ken atum pen chepahelo-tang-lo, Hobap, la Moses a-ongsar aro.

¹²Barak, Tabor Anglong arlutang-lo pu Sisera chinidet aphi,

¹³la alang hum 900 ingchin ronhemkonglong lapen la kedo-an amonit chehang-lo lapen Harosheth pen toilo ha Kishon alangroi an.

¹⁴Ansi Deborah, Barak aphan pulo, “Damnon! HEMPHU nangliphan japonlo! Pini alangli Sisera aphuthak nangpahai detpo.” Lasi Barak bang surikep amonit ponsi Tabor Anglong pen thoi nangsunlo.

¹⁵Barak aron aso pen ketengkheng ahut HEMPHU Sisera aronhemkonglong lapen amonit an aphan pamanghu-et-lo. Sisera hemkonglong pen suntuksi akeng pen katjuilo.

¹⁶Barak ronhemkonglong lapen ron aso aphi hungdunlo ha Harosheth an, lapen Sisera aron aso an thi-et-lo. Inut bakta sasedet-lo.

¹⁷Sisera Jael pu Ken aso Heber apiso apehem along katjuilo, pima Hazor arecho Jabin pen Heber ahemtun atum cheme-o.

¹⁸Jael, Sisera aphan kechetongji aphan damlo, lapen laphan pulo, “Vang iknon, akehai; neli pehem arlo vang iknon, phere nangnelo.” Lasi la arlo lutdamlo, lapen labangpi kebeng-ape anungsi laphan patujoilo.

¹⁹La, bangpi aphan pulo, “Neliphan kejun alang nelipi iktha; neli ingit-olo.” Bangpi pi amok-lang a-ok-reng ajarong ingpusi la aphan pajunlo, lapen patuthulo.

²⁰Anke la labangpi aphan pulo, “Pehem anghap along arjapnon, mane jongsi vang pen dak bang amonit doma pu nang arjulote, ave pule thaknon.”

²¹Sisera lapu-an lak-lo, la amek kejang varhet-lo. Anke Jael kibu lapen kurdang isi ponsi la along damjoilo, lapen laphan kurdang pen aphu along saksi longle an kesak paplatsi pathilot-lo.

²²Barak vangsi Sisera aphan keri ahut Jael damsi laphan chetongdunlo lapen laphan pulo, “Dak vang-iknon! Nangli keri amonit neli nangpaklangpo.” Lasi la labangpi pen pen arlo damlo lapen Sisera longle athak kurdang pen aphu sakplot thek-long-lo.

²³Halaso arni Arnam Israel aphan Jabin, la Kanaan arecho aphuthak pahaidet-lo.

²⁴Latum la abethursi pasungbom pasungbomsi latum la aphan pavirdet-lo.