Read Karbi KANGSAI ATUM 5 Bible Online

KANGSAI ATUM 5 - Karbi bible

KANGSAI ATUM 5

¹Halaso arni Deborah lapen Barak, la Abinoam asopo laso alun lunlo:

²HEMPHU aphan chorolo! Israel atum kechedanjisi chesik-lo; rat atum aningkehang pen nangbarlo.

³Arjutha, nang recho atum! Nangno chedentha, nang kepangri atum! Ne Israel a-Arnam, HEMPHU aphan lunji lapen kelun-i ajohton rotji.

⁴HEMPHU nang Se-ir anglong ke-o ahut, Edom alongri pen kebar ahut, pirthe klemhurlo, sining pen arve klolo, ahok, inghun-heihei pen langdung-lo.

⁵Sinai a-HEMPHU angno inglong klemhurlo, HEMPHU, Israel a-Arnam angno.

⁶Anath asopo Shamgar arni ahut, Jael arni ahut, Longri kejor-kelang ahemkonglong chehelat-ledet-lo lapen tovar kedam atum akrong kaprek atovar-heiheisi damlo.

⁷Israel arongso-heihei dohai abang avelo, Deborah, nang vangvetik ke halahei angsesi arjapphrong-lo, Israel aphan pei asonsi vang-lo.

⁸Israel atum arnamkemi-heihei kechongvai ahut det ron thurlo. Bang suri 40 a-Israel amonit atum inutbak achong mate achir cheponma?

⁹Ne ningke Israel apinpo atum alongsi dolo, lapen aningkehang pen kechesong arat along. HEMPHU aphan chorolo!

¹⁰Bangso alam thantha, nang gadha kelok athak kardon abang kedamjisi kangni abang lapen nahok-le dam seta kevur ponvek nangji abang.

¹¹Arjutha! Langhe akung amuluk ase lahei HEMPHU kehai alam thanlo, lapen Israel arat kehai alam! Ansi HEMPHU arat halatum arongsopi-heihei pen nangsuntoilo.

¹²Japonbomnon, Deborah, Japon-bomnon! Lun kelun pen japonbomnon! Dam paphrangnon, Abinoam asopo Barak, keneptang aphan japonnon!

¹³Ansi kekroi thirklong abang amethang ajalin atum along chevang-lo; HEMPHU arat la along vang-lo, kechedanjisi kechesik.

¹⁴Halatum Ephraim pen arlok anat vang-lo, Benjamin akhei lapen la arat armu atum Makir pen pinpo atum vang-lo, Zebulun pen chakri atum vang-lo.

¹⁵Isaakar ajalin atum ta Deborah pen vang-lo, ahok-lo, Isaakar lapen Barak ta vang-lo, lapen latum la aphi aphi arlok an dunlo Bonta Reuben akhei chethakdak-lo, halatum vang nangjima nangnema phar thekthedet-lo. 1

¹⁶Kopisi halatum biresak adung kedoverloma? Kevi abang ahur aphan kehang karjujima? Kalang, Reuben akhei chethakdak-lo; halatum kevang nangji la pharthekthelo.

¹⁷Gad akhei ke Jordan aroi nihang anatsi do, lapen Dan akhei ke telongpi-heihei adungsi do, Asher akhei ke talo akungsi do; latum longkam sodingsi dolo.

¹⁸Bonta Zebulun lapen Naphtali arat ke ron chedan adim along apran chesongdut-lo.

¹⁹Taanak along, Megiddo Aroi akung, recho atum vangsi chedanlo; Kanaan arecho atumta chedanlo, bonta halatum rup ponpe.

²⁰Chiklolongso-heiheita sining angsong pen chedanlo, Halatum sining dambom ahut, halatumta Sisera abethursi chedanlo.

²¹Halatum aphan Kishon alang thepi pon-et-lo, Kishon Aroi alang ali. Ne jakong pen dambom dambomji!

²²Anke losei vangsi ingplongbomlo, halatum kemo-akeng-heihei pen longle patekung-lo.

²³Meroz, aputhak ahirjuno hangnon, pusi HEMPHU apherangke pulo, “Hadak kedo atum aphuthak isi ahirjuno. Halatum vangpen HEMPHU aphan rap-relo, nokbe ason vangpen alangphan chedan pipelo.”

²⁴Akopai kemenei ke Jael helo, Ken aro Heber apiso Pehem kedo angbong akopai menei abangpi.

²⁵Sisera lang chohang-lo, bonta bangpi laphan pi mok-lang mesen angkleng aharlung pen la aphan vanpilo.

²⁶Bangpi pehem akurdang ari ehong pen otsi ehong anat kam klembang akibu ot-lo, bangpi Sisera aphan thengsi aphu thengrop-lo; bangpi aphu sakplot-lo.

²⁷La akengphu an chetongdik-si klibub-lo lapen bangpi akeng-risi jot-thorlo. Bangpi akeng-ri along la akengphu chetongdiksi la krepbup-lo; la longle along krepsi thilot-lo.

²⁸Sisera apei inghapso pen chelang-lo, bangpi rangkha pen lang-lorlo. “Kopisi la hemkonglong vangverek-loma?” pusi labangpi arjulo. “Kopisi la alosei kevang inglen var-ret-loma?”

²⁹Bangpi akerenei a-arloso thak-lo, lapen bangpi amethang aphansi chethan lemdet-lo,

³⁰Halatum kecheraiji lapen keche-thakjisi mar-heihei ribomlang, inut a-osopi mate banghini ke anut-tin anokbe aphanlo, adorkeso ape Sisera aphanlo, keroi-kebutang ape ke rechopi achethok aphanlo.

³¹Nang hotur an lasonthot-le pathinang, O HEMPHU, bonta nangjirpo atum arni kevang atur ason paturbong nang! Lapen det angbong ningkan 40 ningkangsam pen dolong-lo.