Read Karbi KANGSAI ATUM 6 Bible Online

KANGSAI ATUM 6 - Karbi bible

KANGSAI ATUM 6

¹Israel arat atum puthot HEMPHU aphan langplotsi pap klemlo, lasi la rat aso aphuthak Midian atum ningkan throksi pangri longtoilo.

²Midian atum Israel apar ingtangmuchot lapen latum pen Israel arat atum longku longdang ajo-heihei, inglong arlok-heihei ajosi chepatu nang-lo.

³Israel atum pine sai chotiki lote Midian atum, Amalek lapen kejejangtang ajo kedo akhei atum pen pen vangpaksi halatum aphan tengkheng-lo.

⁴Halatum alongle along mukam chekimsi ketiki ason an nitur pen Gaza alongri an pavirlo. Halatum kedo-an abiresak, achainong lapen agadha-heihei ponpi-etpo, lapen Israel atum kerengji aphan thangta bitekangkelo.

⁵Halatum api ahur lapen pehem-heihei pen pen vangpak titi, lapen karthat alongvurle kebonthip ason. Halatum lapen halatum aka-utta dopik, lakha un-e. Latum vangsi longle pavirtekang-lo,

⁶lapen latum abe kethurji Israel atum cherap thekthedet-lo.

⁷Ansi Israel arat atum kerap kelongjisi HEMPHU aphan choningrilo, Midian atum abekethurji aphan,

⁸lapen latum aphan inut amontri laso abirta HEMPHU, Israel a-Arnam pen kevangji abang toilo: “Ne nangtum aphan Ijip adet ban kedo pen nangvantang-lo.

⁹Ne nangtum aphan Ijip asor lapen laso alongle along nangtum abekethurra kechedan atum an penta nangpajok-lo. Nangtum kechedan ahut Ne halatum aphan phlung-lo, lapen Ne nangtum aphan halatum alongle nangpilo.

¹⁰Ne nangtum aphan nangpulo, Ne ke HEMPHU, nangtum a-Arnamlo lapen nangtum non kedobom alongle Amor atum a-arnam-heihei aphan ardom nangnelo. Bonta nangtum Nelam asapta arjuje.”

¹¹Ansi HEMPHU apherangke Ophrah arong an vangsi o-ak athengpi arum ingnilo, la Joash alongle, inut Abeezer aro. La asopo Gideon drakha alang kesor adim, Midian atum laphan kethek-longle-detjisi sok-tipli pamjoi-joilo.

¹²Hadak HEMPHU apherangke la aphan cheklang-lo lapen pulo, “HEMPHU nanglilong dolo, angthin kethe lapen jakong kethe abang!”

¹³Gideon laphan thak-lo, “Neli nangliphan arjulong pulote, lapen nelitum along HEMPHU do pulote nelitum aphan lahei kopi apotsi keplanglong-loma? HEMPHU keklem manghumeme akam-heihei nelipo atum ne kethan Ijip adet pen halatum aphan kosonsi vantang-loma lahei ason an konat-lo? Midian atum akangjinso aphuthak nekebijisi HEMPHU netum aphan obub-lo.”

¹⁴Ansi HEMPHU laphan hukum pilo, “Nangjakong do-an pen damra Israel atum aphan Midian arideng pen pajokdamnon, Ne si nangphan nangtoilo.”

¹⁵Gideon thak-lo, “Bonta, Hemphu, neli kosonsi Israel aphan pajokthekpo? Pima Manasseh akhei angbong pen nelitum aro helo jakong kavenei atumlo, lapen neli ke nelitum ahemtun angbong pen keningjoinonei abang-lo.”

¹⁶HEMPHU thak-lo, “Nang la klem unji, pima Ne nangrap dunji. Nang Midian atum aphan halatum inutvet asonsi joike pen sorlam-lampo.”

¹⁷Gideon thak-lo, “Nangli jongsi neliphan ningdok-lo pulote, nangli HEMPHU binong-lo pu angthek neli paklangtha.

¹⁸Nangliphan neli an adan nanglivan pipe tik damritha.” Alangli pulo, “Nang chevoivetik Ne inghongpo.”

¹⁹Lasi Gideon hem arlo chedamsi bi aloso a-ok tun pilo lapen linkep sang aduk ensi thapkave ahim selampilo. La ton arlo si ok thap-lo, lapen ke-up a-ok-lang phuleso arlo bisi lahei HEMPHU apherangke o-ak athengpi arum vanpilo, lapen laphan lahei pilo.

²⁰La aphan pherangke hukum pilo, “Laso a-arlong athak-le ok lapen him batnon lapen ke-up alang lahei aputhak dungnon.” Gideon lasonthotsi klemlo.

²¹Ansi HEMPHU apherangke alang ke-otdong achin angchun pen ok lapen him aputhak papholo. Arlong pen me nangbarsi ok lapen him cho-et-lo. Anke pherangke avedet-lo.

²²Gideon ansi chinilo, la HEMPHU apherangke alang thek-longtang-lo, lapen pheresi la pulo, “Jakong-theparpik a-HEMPHU! Nemek angdeng nangpherangke thek-long-lorlo!”

²³Bonta laphan HEMPHU pulo, “Ning chepangsam non, phereri, nang thithe.”

²⁴Gideon hadak HEMPHU aphan isi adovan buipilo lapen la amen “HEMPHU-ke kepangsam Abang” pusi irlo. (La nonputa Ophrah, Abeezer aro alongle, along arjapdinglang.)

²⁵Halaso ajo Gideon aphan HEMPHU pulo, “Nangpo achainong alo lapen akaprek achainong alo ningkan 7 arta ponra Baal aphan adovan phrira Asherah arnampi akumlin la adung kedo chorpetnon.

²⁶Laso ajakong kedo adim HEMPHU nang Arnam aphan isi adovan buipamenon. Anke adun achainong alo ponra la isi adan ason akangthim phrindutnon lapen nang kechortang Asherah akumlin athengpi an theng pinchong non.”

²⁷Lasi Gideon bangkep aban cheponsi HEMPHU alangphan kepu ateng klemlo. La amethang ahem asor lapen rong arat aphan pheresi anerlo amat keklemji ninghanghelo, lasi la ajo klemrong-lo.

²⁸Rong asor puthot adap thurlo lapen Baal lapen Asherah akumlin an kechor-et lapen kekimtang adovan along adun achainong phrintang-lo lahei thek-long-lo.

²⁹Halatum lahin lahin charjuseroilo, “La komatsi keklemloma?” Latum ri-arjutonlo lapen Joash asopo Gideonsi la klemtang-lo pu chinilo.

³⁰Anke latum Joash aphan pulo, “Netum nangsopo aphan kepathilong jile ingtan vannon! La Baal adovan ingsek-ilo lapen Asherah la adung kedo akumlin an chor-ettang-lo.”

³¹Bonta Joash abang karjappak kedo-an aphan pulo, “Nangtum Baal aphantong choningri poma? Mate nangtum la aphantong raipoma? La aphan kechoningri abangle arni nangklangkle ako papathinang. Jongsi Baal inut arnam pulote, la amethangle pachesong lonang. Laso adovansi kangsekpi-tang-lo ke.”

³²Halaso penke Gideon aphan Jerubaal pusi chinilo, pima Joash pulo, “Baal amethangle pachesong lonang; laso adovansi kangsekpi-tang-lo ke.”

³³Anke do-an a-Midian atum, Amalek lapen kejejangtang ajo kedo akhei atum an chingrumsi Jordan Aroi hatpetsi lapen Jezreel arlok along mukam chekimlo.

³⁴HEMPHU akarjong Gideon aphuthak vang-lo lapen la Abeezer aro amonit atum aphan kehangpen aphi aphi kepadunjisi pong-ut-but-lo.

³⁵Manasseh lahin lahin alongri abeng ta pherangke atum aphan toilo. La Assher, Zebulun lapen Naphtali akhei anatta pherangke toilo, lapen halatum ta vangsi la along chelangdunlo.

³⁶Ansi Arnam aphan Gideon pulo, “Nangli kepu Israel aphan kepajokjisi nangli neliphan rimpo pusi pathik-lo.

³⁷Mesen, nelitum sok-tipli kesi adim longle athak ajehak biresak angmi bilo. Jongsi ar-e biresak angmi alongsi dochot lapen longle athak ave pulote Israel aphan kepajokjisi nangli neliphan rimpo.”

³⁸Lasonthotsi plang-lo. Puthot adap Gideon amek prang-lo, la biresak angmi sorlo lapen harlung plengset ar-e alang la pen long-lo.

³⁹Anke Arnam aphan Gideon pulo, “Neliphan nanglining thiri, neliphan lam ethe paningje longtha. Non biresak angmi pen puthot isi asat nelipalang longtha. Non ephong ke biresak angmi pakrengtai lonang, lapen longle ke pachamvok-lonang.”

⁴⁰La kepu asonthotsi halaso ajota Arnam klemlo. Puthot adap biresak angmi krengtailo lapen longle ar-e pen ajok chamsop-lo.