Read Karbi KANGSAI ATUM 7 Bible Online

KANGSAI ATUM 7 - Karbi bible

KANGSAI ATUM 7

¹Arnisi Gideon lapen alangli amonit kedo-an thurdap-prangsi Harod alangjeng akung mukam chekimlo. Midian atum amukam ke halatum pen nirep Moreh anglong a-arlok along.

²HEMPHU, Gideon aphan pulo, “Nanglilong kedo amonit atum Midian aphuthak kehaiji la nephan ong-ong-lo. Halatum mathapo, halatum amethang ajakong pensi hailo, lapen nephan anong pipedetpo.

³Rat aphan pachininon, Kephere abang aling hem pachedam nang, lapen netum Gilead anglong alongsi dak inghongpo.” Lasi bang suri 22 angbong bang suri 10 ansi sa chot-lo.

⁴Anke Gideon aphan HEMPHU pulo, “Nangli monit non anta ong-ong lang. Lang anat latum aphan ponra hadak neli nangpupo. Jongsi inut amonit nanglilong nangdun nangji pulote, la dunpo. Jongsi inut amonit nanglilong dun nangne pulote, la dundelo.”

⁵Gideon monit atum aphan lang anat pahir-et-lo, lapen la aphan HEMPHU pulo, “Methan ason ade pen lang kechovet abangphutin aphan lapen lang along akengphu patongrui pen kejundam abangphutin aphan papreknon.”

⁶Ari pen lang kechosoksi lang kejun atum hadak bang 300 dochot-lo, kaprek atum anke halatum akengphu patongruisi junlo.

⁷Gideon aphan HEMPHU pulo, “Ari pen lang kejun bang 300 amonit atum pen Ne nanglitum aphan nangpajokpo, lapen Midian aphuthak nangpahaipo. Bangphutin aphan hem pachedam toinon.”

⁸Lasi Gideon Israel kedo-an aphan hem toi-et-lo, lapen asonson kepajir kelong lapen pong-ut kerimlong atum bang 300 si dolongchot-lo. Midian amukam ke halatum aber a-arloksi do.

⁹Halaso ajo Gideon aphan HEMPHU hukum pilo, “Thurra mukam tengkheng damnon; la aphuthak kehaidetjisi Neli nangliphan nangpidet-lo.

¹⁰Bonta nangli jongsi ketengkhengji pherelo pulote, nangliban Purah pen mukam anat hirnon.

¹¹Halatum kopisi kechethanma nangli arjudun longpo. Lapensi nangli ketengkhengji nangli ingthin thepo.” Lasi Gideon lapen aban Purah hotur amukam ingtan kedai anat hirdamlo.

¹²Midian atum, Amalek atum, lapen kejejangtang ajo akhei atum arlok along longvur asonsi rikthip-lo, lapen talo akung asangti asonsi halatum aka-ut lapen sok ongpik.

¹³Gideon lerok pen inut amonit ajirpo aphan amang alam kechehir arjudun long-lo. La pulo, “Nemang sok-tipliso ahim nangkong-longsi etum amukam arlo vang-lo lapen pehem tongphit-lo.” Pehem krep-hup-lo lapen longle athak jaidak-lo.”

¹⁴La ajirpo thak-lo, “lake Israel abang Joash asopo Gideon anokjirlo! La apar kaprek thangta kalilo! Arnamsi la Midian lapen etum ron amuluk aphuthak kepahaijisi pitang-lo!”

¹⁵Gideon monit amang lapen la athe kopima arjulongdet pen la akengphu patongruisi la HEMPHU aphan ardomkhrup-lo. Ansi la Israel atum amukam anat chedamlo, lapen pulo, “Thurnon! Midian aron amuluk aphuthak kehaijisi ehodaitang-lo!”

¹⁶Alangli la bang 300 amonit songthom thak-lo, lapen abangphutin aphan isisi apong-ut lapen tibuk, la arlo methengtom pilo.

¹⁷Alangli halatum aphan pulo, “Ne mukam angchun kele ahut, nephan langnon lapen ne keklem alingle nangtum klemnon.

¹⁸Ne song lapen ne pong-ut but lote nangtumta mukam soding butpo lapen hangpo, ‘HEMPHU lapen Gideon pahainang!’ ”

¹⁹Ajo chittimte ako, Gideon lapen la bang 300 amonit prapjin pen mukam angchun keton atum kechelarjong aphi vang-lo. Anke halatum pong-ut but-lo lapen tibuk-heihei panghangsi halatum rung-lo,

²⁰lapen hala songni atumta lasonthotsi klemlo. Halatum anut-tinta me thengtom arvi anat otkreilo, lapen halatum ar-e anat pong-ut lapen hang-lo, “HEMPHU lapen Gideon anokjir!”

²¹Abangphutinta mukam arei amethang adim chedo-rep-lo, lapen hotur ron amuluk kedo-an kat-et-lo.

²²Gideon amonit atum halatum apong-ut kebut ahut HEMPHU hotur ron asong halatum anokjir-heihei pen amethang methang amonit aphan chetengkheng seroilo. Halatum Zarethan lapen Beth-Shittah an kat-lo, lapen Abel Meholah arong, la Tabath adung anta kat-lo.

²³Anke Naphtali, Asher lapen Manasseh lahin lahin abeng akhei amonit atum aphan hang-lo lapen latum Midian atum aphi aphi hungdunlo.

²⁴Gideon inglong arlok an pahangjisi pherangke atum aphan toisi paputoilo, “Nangtum non Midian atum pen chedannon. Jordan Aroi tondingnon, lapen Bethbarah alangjeng an Midian atum kepar longledetjile tondingnon.”

²⁵Halatum Banghini Midian akehoi atum, Oreb lapen Zeeb aphan nepchek-lo; halatum Oreb Anglong along Oreb aphan lapen Zeeb adrakha kesor adim Zeeb aphan pathilot-lo. Halatum Midian atum aphi aphi hungdunbomsi Oreb lapen Zeeb aphu-heihei Gideon angno vanlo, la Jordan nihang anatsi kedo.