Read Karbi KANGSAI ATUM 8 Bible Online

KANGSAI ATUM 8 - Karbi bible

KANGSAI ATUM 8

¹Anke Ephraim amonit atum Gideon aphan pulo, “Kopisi nang Midian atum pen kechedandam ahut netum aphan nanghanghe-det-lo? Kopisi nang netum aphan lapuson keklemloma?” Halatum la aning oilak pensi la pujolo.

²Bonta la thak-lo, “Ne keklem un ason pen pangbardam lote nangtum keklem thangta kali. Tebonseta nangtum Ephraim amonit atum asap-o klemchot seta nangtum keklemtang ke netum aro kedo-an keklem an sose.

³Jat seta Arnam ajakong pensi nangtum banghini Midian akehoi, Oreb lapen Zeeb aphan pathilo. La pen ne thangta pangbar un-e?” La ningjedet aphi halatum aningthiverve det-lo.

⁴Laso ahut Gideon lapen la bang 300 amonit atum Jordan Aroi nanglelo lapen la hatpet-lo. Latum ainipik-lo, seta latum hotur aphi aphi hungdunbomlo.

⁵Latum Sukkoth pu arong nanglesi rong asor aphan la arjulo, “Kanghon pen nemonit atum aphan ajehak ahim pitha. Latum ainipik-lo lapen ne Midian arecho Zebah lapen Zalmunna aphan hungdunlo.”

⁶Bonta Sukkoth arong asar pulo, “Kopi athesi nehem nangron aso atum aphan ne an kepinangpo? Nangtum non anta Zebah lapen Zalmunna aphan nepnedet-lang ke.”

⁷Lasi Gideon pulo, “Toh chokpo! HEMPHU nephan Zebah lapen Zalmunna nerideng nehodaidet lote, ne nangtum aphan kejejangtang ajo athengsu lapen bapsudo pen nangsappo!”

⁸Gideon dambomsi Penuel lelo lapen hadak arat aphan asonthotsi choningrilo, bonta Penuel amonit atumta Sukkoth amonit atum asonsi thak-lo.

⁹Lasi latum aphan la pulo, “Ne thangthe pen nangchevoilong lote, ne nangtum ahem chardon nangphri pi-etji!”

¹⁰Zebah lapen Zalmunna atum ke amethang aron aso pen Karkor si do, kejejangtang ajo akhei bang suri 15 an dolang, bang suri 120 aron aso thi-et-lo.

¹¹Gideon kejejangtang ajo atovarsi dambomlo Nobah lapen Jogbehah anihang anat, lapen pamanghuhaksi ron aso aphuthak tengkheng-lo.

¹²Banghini Midian arecho, Zebah lapen Zalmunna katjuilo, bonta la hungdunsi halatum aphan nepchek-lo lapen halatum aron aso pheresi pratseilo.

¹³Heres atovar anat pen Gideon ron pen nangkechevoi ahut

¹⁴Sukkoth kedo inut ariso nepsi arjulo. Riso abang Gideon aphan bang 77 ajalin amen tokpilo.

¹⁵Anke Gideon Sukkoth amonit along damsi pulo, “Chemathanon, nang nephan nekerap-re aphong? Nang pulo, ne Zebah lapen Zalmunna aphan nep thekthelang apot ne ke-aini amonit aphan an pi-un-e. Chok-lo, lahei helo halatum!”

¹⁶Anke la thengsudo lapen bapsudo kejejangtang ajo pen ponsi Sukkoth ajalin atum aphan aduk pi-lo.

¹⁷La Penuel arongsopi ahemchardon phri pi-etsi hadak kedo amonit aphan pathitekang-et-lo.

¹⁸Ansi Gideon, Zebah lapen Zalmunna aphan arjulo, “Tabor along nangtum kepathi amonit koson?” Halatum thak-lo, “Halatum nangsonthot, recho asopo ason.”

¹⁹Gideon pulo, “Halatum nekorte atumlo, nepei apok asolo. Ne semetang-lo, nangtum jongsi halatum aphan pathithe pulote, ne nangtum aphan nangpathithe detji apot-lo.”

²⁰Anke la asopo akleng Jether aphan pulo, “Damra pathi-etnon!” Bonta asopo nokjir chesansedet-lo. La chak-hik-lo, pima la inut a-osochot-lang.

²¹Ansi Zebah lapen Zalmunna atum, Gideon aphan pulo, “Vang-ra nangmethangle netum aphan pathinon. Pinso akam pinsosi la klem unji.” Lasi Gideon halatum aphan pathilot-lo, lapen halatum aka-ut-heihei achethok along kedo alek asang pondet-lo,

²²lapen aphi Israel atum Gideon aphan pulo, “Nang lapen ha nangpoton atum anta netum aphan pangrinon. Nang netum aphan Midian atum pen pajok-lo.”

²³Gideon thak-lo, “Ne nangtum aphan kepangri abang kalilo, nesomar atumta kalilo. HEMPHU-si nangtum aphan pangripo.”

²⁴Bonta la pubomlo, “Ne nangtum aphan eson alam nepar-julongtha. Abangphutinta nangtum kepon ajangsai-heihei nepitha.” (Midian atum, kejejangtang ajo akhei kechingthang aser ajangsai amar.)

²⁵Rat atum thak-lo, “Netum ning arong pen nangphan lahei nangpiji.” Latum pe limlo, lapen abangphutin kepon ajangsai-heihei la aputhak bilo.

²⁶Ser ajangsai lok Gideon kelong lin 20 anbak do, lapen halatum kepang-e amarso, lek-heihei lapen pe-erring, lapen recho kechingthang amar lapen ka-ut achethok along kehom alek-heihei bikok-lo.

²⁷Ser pen Gideon kumlin selamlo lapen la amethang ahem Ophrah along la chebilo. Israel atum kedo-an Arnam aphan obubsi kumlin aphan karchojisi dampet-lo. Lake Gideon lapen ahemtun isi aphan kepamanghulo.

²⁸Lasi Midian atum aphan Israel atum paremdet-lo lapen kepherenangji kalidet-lo. Det lapusonsi ningkan 40 ingsamjin pen dolo, lake ha Gideon thithetik anlo.

²⁹Gideon amethang ahem chedamsi hadak dolo.

³⁰La asopomar bang 70 dolo, pima la apiso ongdung.

³¹La Shekem alongta enpangtar apiso do; la ta inut asopo chopathelo, lapen la laphan Abimelek pusi amen irlo.

³²Gideon, Joash asopo kesar ahut an thilongpamelo lapen Ophrah along apo Joash athiri alongsi pip-bup-lo, Abiezer aro arong-lo.

³³Gideon thilot aphi Israel arat atum Arnam aphan kroithipthe det-lo, lapen Baal-heihei si archorong-lo. Latum Baalsi halatum kechejok a-arnam pinchong-lo,

³⁴lapen HEMPHU halatum a-Arnam halatum ahotur pen kepajok Abang aphan ingdukdepinlo.

³⁵Halatum Gideon ahemtun ko-an keme akam la Israel aphan klempilo seta ale pipedet-lo.