Read Karbi KANGSAI ATUM 9 Bible Online

KANGSAI ATUM 9 - Karbi bible

KANGSAI ATUM 9

¹Gideon asopo Abimelek Shekem arong along damlo, hadak apei adon-arap kedo adim lapen halatum aphan pulo,

²Shekem asor amonit aphan arjulo, “Kolo abangsi nangtum nangninghang-lo? Gideon asopo bang 70 kedo-an nangpangri nangjima mate inut amonit anta chokma? Chemathanon, Abimelek ke nangtum a-ok-avi amonit-lo.”

³Apei adon-arap atum Shekem amonit aphan thanpilo, lapen Shekem amonit atum Abimelek aphi kedunjisi pharlo, pima la halatum adonlo.

⁴Kechejok a-Baal akardomhem pen latum rup dum 70 la aphan pilo, lapen laso atangka pen la along kejelang duntoiji aphan amokevangve arikave asong anam pen rong-lo.

⁵La Ophrah along apo ahem damlo lapen ha angsong longpak athak akorte bang 70, lahei Gideon asomar atum aphan pathilo. Bonta Jotham, la Gideon asopo akebinei abang chepatujoi amat laphan pathi-longledet-lo.

⁶Ansi Shekem lapen Bethmillo amonit atum chepangrum-petsi oak athengpi kangthir Shekem along dampet-lo lapen hadak Abimelek aphan halatum recho bat-lo.

⁷Jotham laso alam arjulongsi la Girizim anglong athak arjapsi halatum aphan hangdunlo, lapen Arnamta nang arjutahai!

⁸Ahut isi thengpi atum chingrumpetsi halatum arecho chongvailo. Halatum Jit arong aphan pulo, “Netum arecho plangnon!”

⁹Jit arong thak-lo, “Nangtum aphan pangrilote ne arnam lapen monit man kepi-i ajangthu kepado che-onangkokpo.”

¹⁰Anke thengpi atum Thebo arong aphan pulo, “Nang vangnon netum arecho plangnon!”

¹¹Bonta Thebo arong thak-lo, “Nangtum aphan pangrinangji pulote ne kelangme kedokjok athe kepathe che-onangkokpo.”

¹²Lasi thengpi atum drakha arikang aphan pulo, “Nang vang-ra netum arecho plangnon!”

¹³Bonta drakharikang thak-lo, “Ne nangtum aphan pangri nangji pulote, arnam lapen monit atum aphan aning kepadok ahorlang kepado akam che-onangkokpo le.”

¹⁴Lasi thengpi kedo-an bapsudo aphan pulo, “Nang vang-ra netum arecho plangnon!”

¹⁵Bapsudo thak-lo, “Jongsi nangtum nephan nangtum arecho plang nangji pulote, vang-ra nebin along nang chepachong non. Jongsi nangtum klemkle pulote ne ingsu aro pen me akar vansi Lebanon a-Kedar athengpi cho-etpo.”

¹⁶Jotham pubomlo, “Non lasi, Nangtum Abimelek aphan recho kebat ahut ahokpet lapen chokpet loma? Gideon aphan nangtum aman piloma lapen la ahemtun aphan langpame loma lapen la akam kepaklang ateng-loma?

¹⁷Chemathatha, nepo nangtum aphansi chedantang-lo. La apran chethongdut-lo nangtum aphan Midian atum pen kepajokjisi.

¹⁸Bonta pini nangtum nepo ahemtun abe thurlo. Nangtum la asopo bang 70 longpak athak pathi-et-lo, pima Abimelek, la asopo inut banpi pen aso, nangtum adon apot nangtum laphan Shekem arecho bat-lo.

¹⁹Non tangte, nangtum pini Gideon aphan lapen la ahemtun aphan keklem ahok lapen chokpet-lo pulote Abimelek pen ning cheparongnon.

²⁰Bonta kali pulote, Abimelek pen me vang-ra Shekem lapen Bethmillo amonit an aphan pachonang, lapen Shekem pen Bethmillo pen me akar thurra Abimelek aphanta pachonang.”

²¹Anke la a-ik Abimelek aphan phereduk apotsi Jotham katjuilo lapen Beer alongsi dolo.

²²Abimelek ningkan 3 Israel aphan pangrilo.

²³Anke Arnam, Abimelek lapen Shekem amonit atum angbong lahin lahin pachelangselet-lo.

²⁴La lapusonsi plang-lo, Abimelek lapen la aphan Gideon asomar bang 70 kepathiji aning keparungdun atum Shekem amonit atum, halatum adai anam tu nangpo.

²⁵Shekem amonit atum Abimelek aphan kephangnojisi inglong angsong monit patonding-lo, lapen halatum hapu anat kedam aling aphan mar thiponlo. Abimelek aphan bangso alam thanlo.

²⁶Ebed asopo Gaal, Shekem anat damlo, akorte ahem pen damlo, lapen Shekem amonit atum alangphan chikilo.

²⁷Halatum do-an amethang adrakharikang kelikdamjisi drakha aberi anat chedamrep-lo, lahei pen drakha ahorlang selamlo lapen isi chojun amei dolo. Halatum halatum arnam-heihei akardomhem, hadak halatum chojunlo, lapen Abimelek aphan ingtonjolo.

²⁸Gaal pulo, “Etum Shekem amonit atum kopi manloma? Kopisi ili Abimelek aphan ingduk nang-loma? La konat-lo? Gideon asopo! Lapen Zabul la pen hukum hang-lo, bonta ili kopi athe laphan ingduknangji? Nangphusar Hamar, nangtum aro keja abang aphanle kroinon.

²⁹Ne laso arat aphan kejaji nening hang-lo! Ne Abimelek pen chepahelo-longpo! Ne laphan pu-unpo , ‘Nang ron aso chepa-ongnon, lapen vang-ra nangchedan non!’”

³⁰Zebul, rongsopi pangribang, Gaal kepu alam arjulongsi aningthilo,

³¹la Abimelek aphan Arumah along pherangke atum aphan toilo, “Ebel asopo Gaal lapen akorte atum pen Shekem anat vangbomlo, lapen halatum nangliphan rongsopi arlo nangpalut longle.

³²Non lasi nangli lapen nangli monit atum ajo amat damsi hidi ajo chepatu damjoinangji.

³³Penap adapprang thurra, arni kevang ahut rongsopi aputhak menmen tengkheng non. Anke Gaal lapen la amonit nangbe-thurra vang-lote, nang jakong do-an pen halatum aphan arbunon.”

³⁴Lasi Abimelek lapen la kedo-an amonit atum halatum ajo amat damlo lapen Shekem arlo songphli chepatulo.

³⁵Abimelek lapen la amonit atum Gaal kevang thek-longsi halatum kechepatu adim-heihei pen nangbarlo,

³⁶Gaal halatum aphan thek-longsi Zebul aphan pulo, “Langtha! Inglong angsong pen monit nanghirbomlo!” Zebul thak-lo, “Halatum monit kali, lahei ke inglong-heihei aharchichot.”

³⁷Gaal puthulo, “Langtha! Monit atum inglong alum pen nangkehir, lapen esong ke oak athengpi, kopaikethom atovar pensi vang-lo.”

³⁸Ansi Zebul aphan pulo, “Konatsi nanglambek kekatjuilo? Non nanghelo bo etum kopi athesi Abimelek aphan ingduk nang-loma pu karju. Lahei helo nangkangton kangthi amonit-lo. Damra non halatum pen chedannon.

³⁹Gaal amonit atum aphan japonsi Abimelek pen chedanlo.

⁴⁰Gaal katjuilo, lapen Abimelek laphan hungdunlo. Ongdung atum arengsolo ha rongsopi anghap alongta.

⁴¹Abimelek Arumah along si dolo. Zebul, Gaal lapen akorte atum aphan Shekem anglong an phlung-lo, lapen halatum hadak do longledetpo.”

⁴²Puthot arni Shekem arat atum ahidi kedamji kechesik alam Abimelek chinidunlo,

⁴³lasi la amethang amonit cheponsi songthom chethak-lo, lapen hidi ajo chepatujoisi, inghong ding-lo. Rat atum rongsopi nangkebar la kethek-long ahut halatum aphan la kepathijisi la kechepatu adim pen nangbarlo.

⁴⁴Abimelek lapen la asong atum dam paprapsi rongsopi anghap ketondam ahut kaprek songni atum rat aphuthak hidi along tengkhengsi halatum kedo-an aphan pathi-et-lo.

⁴⁵Lasonsi chedanlo. Abimelek rongsopi cheparidengsi la kedo-an amonit pathilo, la ingsek-lo, lapen ingti pen longle dipthip-lo.

⁴⁶Shekem along paisong kedo ne-ne amonit laso alam arjulong pen halatum Baal akechejok akardomhem arum angdeng chepachong damlo.

⁴⁷Halatum hadaksi chingrumlo pu Abimelek aphan thanlo,

⁴⁸lasi la arludamlo Zalmon anglong anat amonit atum pen. Hadak la cho epak ensi thengpi aro chorlo, lapen aphang along aphrang asonthot kepaprap pen paklemtoilo.

⁴⁹Lasi halatum abangphutin ta thengpi eroro chorrep-lo; lapen halatum Abimelek aphi aphi dunlo lapen latum arum angdeng anat buihup-lo. Latum la aputhak me keichok-lo, lapen la arlo kedo arat aphan pen pen lapen arum angdeng kedo arat an thi-et-lo, suri isi anbak apinso-arlo dolo.

⁵⁰Ansi Abimelek, Thebez anat damsi rongsopi komchenlo lapen la cheraidet-lo.

⁵¹Hadak hemchardon kethe do, lapen rongsopi abangphutin pinso-arlo, jalin atum jokta laso along kat-lo. Halatum arlo pen chingkirhetsi sarnung angsong arlulo.

⁵²Abimelek hemchardon aphan ketengkhengjisi vang-lo, la me kekaijisi angsong arlulo.

⁵³Bonta inut a-arloso la aphuthak him kekoi-i a-arlong varsi la aphu varrop-lo.

⁵⁴Anke la risim ke-otdun ariso aphan hang paprapsi hukum pilo, “Nang nokjir chesanra ne pathinon. Inut a-arlososi nephan kepathilo pu ne papuji ninghanghe.” Lasi riso abang serak pen chut-lut-lo, lapen la thilot-lo.

⁵⁵Israel atum Abimelek kethi thek-longsi, halatum ahem chedamlo.

⁵⁶Lapusonsi Arnam, Abimelek apo abe thursi bang 70 akorte aphan kepathi keklem kechokche apot alar huilo.

⁵⁷Shekem arat aphanta halatum kehingno apot Arnam pasung-lo. Gideon asopo Jotham kepu ahirjuno kepi asonthotsi halatum plang-lo.