Read Karbi 2 JON 1 Bible Online

2 JON 1 - Karbi bible

2 JON 1

¹Neli mondoli akesarsi nangliphan, atheke neli kechinghon binong arloso lapen nanglisomar atum aphansi labangso aloh tok-lo. Nangliphan nang kanghon abang ke neli inutnat, lapu kali. Ahok alam kechini atum anke nangliphan nang inghonlo.

²Pima ahok alam ilitum aning arlo do lapen lake kaiketa doverpo.

³Ahok lapen kanghon pen Po Arnam lapen alangli Sopo, Jisu Khristo ilitum aphan kanghon, kangjinso lapen ning kangsam epapinang.

⁴Nangli somar manene atum ke Po ilitum aphan hukum ekepi asonthot, ahok alam atengsi do thak-lo, la thek-longsi neli ning arong apar arong-lo.

⁵Lasi neli kechinghon abangpi, neli nangliphan choningrilo, ilitum lahin lahin chinghon lonang. Neli nangliphan nangkepi ahukumke hukum kemi kali, lake ilitum kecheng pen kelongtang ahukumlo.

⁶Kanghon ke Arnam ahukum kekroi helo. Nanglitum kecheng pen karjulong ahukumke la helo: nanglitum kadokaveta lahin lahin kechinghon seroi pen do nangji.

⁷Jisu Khristo monit ason cheplangsi pirthe athak vang-lo pu kekroikre, kechobei ake-ongpi atum pirthe adang damtang-lo. Lason amonit ke kepacherei abang lapen Khristo ahoturlo.

⁸Tangte nanglitum keklem-naknedetji, bonta nanglitum keklem akam an apot nanglitum kelong nangji anong-e kelongpetjile lang-pamenon.

⁹Khristo akethan alam angkang kedode, bonta la apar kedam abang along ke Arnam ave. Alangli akethan alam angkang kedo abang along ke Po lapen Sopota do.

¹⁰Lasi la Khristo akethan alam ateng kethanthe abang nanglitum along vang-lote, alangliphan nanglitum ahem chakri, kardom anta chepiri.

¹¹Pima alangliphan kardom kechepi abang aling ke alangli keklem akehingno akam hei heisi kekroidunlo.

¹²Neli nangliphan nangkethanji alam do-olang. Bonta neli loh lapen sahi pen la nangkethanji ning hanghelo. Neli methang nanglitum along vangsi nanglitum pen kechingki chethan longji aphan ning thelo! Anke ilitum aning arong plengsetpo.

¹³Nangli kechinghon amu asomar atumta nanglitum aphan kardom nangchepidunlo.