Read Karbi JUD 1 Bible Online

JUD 1 - Karbi bible

JUD 1

¹Jems akorte lapen Jisu Khristo aban, neli Judsi nanglitum aphan, atheke Po, Arnam kephatang lapen kechinghon, lapen Jisu Khristo kerai atum an aphan labangso aloh tok-lo.

²Nanglitum along kangjinso, ning kangsam lapen kanghon pa-ongbomnang.

³Neli kechinghon atum, neli nangli-tum aphan ilitum kelong akejok alamjir ketokji ning hang-olo. Bonta non amat ke Arnam amethang amonit atum aphan kepi, kelar un-epin akekroi nanglitum kerai thekji aphan ning nangkeparung alam ketoksi akenangsot pusi neli mathalo.

⁴Pima manene adhorom kave amonit atum ilitum angbong vangjoitang-lo. Latum amek kelangno a-ot hei hei pen ajok Arnam akangjinso alam phalangnodet-lo. Lapen latum Jisu Khristo, atheke ilitum inutnat a-Recho lapen a-Hemphu aphan dengdedet-lo. Latum akevirji alam hako ahut pen Hastro along thanmek tang-lo.

⁵Lasi nanglitum la kadokave chinipet-lo setta nanglitum aphan la nangkepachematha-thujisi neli ning hang-lo. Atheke ahut isi Israel amonit atum aphan Ijip adet pen pajok-lo, bonta aphi ke Hemphu hala kekroikre atum aphan pavirdet-lo.

⁶Amethang kedo nangji ateng kedode, bonta amethang kedo adim keche-obup asining apherangke atum aphan mathadamtha. Kangsai kethe Arni nangleletik ke latum aphan kevir un-epin angchin ani pen kok-hetsi kangting angbong bitang-lo.

⁷Sodom lapen Gomorrah lapen adung arei kedo arongsopi hei hei alamle mathadamtha, halabangso amonit atum labangso apherangke atum asonsi klemlo; latum beisa akam klemtang-lo, lapen latum a-ot kalile akam klemlo. Lasi latum kemep un-epin ame pen aduk phonang-lo. Lake ilitum aphan kepacheretoi alamlo.

⁸Lasonthak thaksi labangso amonit atum amang hemanlo, lapen laso atengsi amethang abang arpum aputhak pap klemlo. Latum Arnam ajakong aphan thangta kali ason pinchong-lo, lapen sining angsong adak atur kedo atum aphan pinremlo.

⁹Bonta sining apherangke akethenei abang Maikel jokta lason ke klemklelo. Alangli Hi-i Sarpo pen kecharvo ahut, atheke halatum Moses abang arpum kechithi ahut Maikel ke Hi-i Sarpo aphan kepusit pen kepinremji haihedet-lo, bonta “Hemphu nangliphan nang pangcheknang,” pusi puchot-lo.

¹⁰Bonta labangso amonit atum ke kechinine alingsi pinremvaret-lo. Halatum akechini ke kematha thekthe api atum akechinidam asonthak thak-lo, lapen halatum amethang kechinidam ason pensi chepavirpo.

¹¹Latum ko-an akepherememe akesung pho nangpo! Latum Kein keklem asonthak thaksi choklemlo. Pima latum amethang ale kelongji aphan Balaam kechoklem asonsi kechokche akam choklemdunlo. Latumta Kora ason kechesong pensi chepavirlo.

¹²Latum ke amethang ketherak thekthe akangri kangkrang pen ajok nanglitum achojun amei along ke kesa-ur anglur asonthak thak-lo. Latum ke phereredetsi amethang aphansi chemathalokchot-lo. Latum ke tomon kevan arve kave anghun asonlo. Latum ke abotor ahutta athe kepathethe, lapen angkur pen purdutsi phongni kethitang athengpilo.

¹³Latum ke talo alang angsum kethur angpip kechonpui asonthak thaksi amethang methang aketherakmeme akam hei hei chepaklang-lo. Latum ke kedamtap achiklo longso atum asonlo. Arnam latum aphan kejut un-epin akangting adim thikpitang-lo.

¹⁴Adam pen ove throksi nang kechok amonit Enok latum alamjir thanmeksi pulo, “Hemphu amethang apherangke kangthir suri suri atum pen pen vangji.

¹⁵Halatum dhoromime akam keklem apot lapen dhoromime, papi atum alangli be-thursi kepu alam an pen apot halatum kadokave aphan ingsaisi ado kepadoji aphansi alangli vangji.”

¹⁶Labangso amonit atum ke kaita keningje paselurtur lapen bang atum aphan kekoilok atumlo. Latum ke amethang kehingno aning kehang atengsi klembom, amethang methang pen apot chepindak varet lapen amethang ale kelongji aphan bang atum aphan kepalem-lem pen rovaret-lo.

¹⁷Bonta kechinghon atum, nanglitum hala e-Hemphu Jisu Khristo aketoitang atum aphrang pen kethantang alam hei hei chemathadamnon.

¹⁸Halatum nanglitum aphan pulo, “Mo kejut arni hei hei ahut nanglitum aphan nang kangnekchoi lapen amethang kehingno aning kehang ateng keklem amonit atum nangklangji.”

¹⁹Labangso amonit atum helo abe abe kepado atumlo. Latum amethang aning kehang atengsi klemlo. Latum along Arnam a-Karjong ave.

²⁰Bonta kechinghon atum, nanglitum akangthirnei akekroi athak-le nanglitum methang methang kekim chepathir-bomnon. Nanglitum Karjong Kangthir ajakong penle Arnam ardomnon.

²¹Lapen nanglitum Arnam akanghon angkangle dora e-Hemphu Jisu Khristo amethang akangjinso pen nanglitum aphan kejut un-e achethe nangkepiji ahut aphanle inghongphrongnon.

²²Keningbi atum aphan kangjinso paklangnon.

²³Penang atum aphan ke me angkang along pen vungdunphit-ra pajoknon, akaprek atum aphan ke kephere penle kangjinso paklangnon, bonta halatum ok aning kehang pen keklem akam pen apot pap aphik kerotang ape hei hei aphan hijimnon.

²⁴Nanglitum kechingkoikedetji aphan nanglitum aphan nangkerapthek lapen nanglitum apap kavepin pen lapen nanglitum aning arong pen nanglitum aphan amethang adak atur angno nangkevanthek abang, atheke

²⁵ekepajok abang, la inutnat Arnam adak atur, aman apeng, kepangri ajakong lapen jakong horang aphrang ateng nonta lapen mo kejut un-e akai apar akai anta e-Hemphu Jisu Khristo pen ajok padovernang! Amen.