Read Karbi KEPAKLANG 1 Bible Online

KEPAKLANG 1 - Karbi bible

KEPAKLANG 1

¹Labangso aloh along Jisu Khristo Kepaklang alam hei hei ketok do. Arnam aban atum aphan Jisu Khristo kepaklangji aphansi Arnam alangli phan la keplangji dokdok alam hei hei pachinilo, lapen Jisu Khristo amethang apherangke aphan alangli ban, Jon adung toisi labangso alam hei hei pathanlo.

²Jon Arnam pen kelong alam lapen Jisu Khristo kepaklang ahok alam an Jon haki cholo, atheke alangli kethek-long ason an thanpet-lo.

³Labangso alam keporhera keparju abang rengme, lapen labangso alam karjulong atum lapen labangso aloh along ketok alam kekroi atum rengme! Pima la hei hei kechekokji tebok-het-lo.

⁴Neli Jon si Asia alongri kedo mondoli throksi aphan labangso aloh tok-lo: Non, lapen aphrangta kedo, lapen kevangthuji a-Arnam, lapen alangli anghoi angno kedo bang throksi akarjong,

⁵lapen kekroi thirklong ahaki, kethitang atum angbong pen kethur paphrangcheng abang, lapen pirthe athak kedo arecho atum ahemphu, la Jisu Khristo nanglitum aphan kangjinso lapen ningkangsam nangpapinang. Alangli ilitum aphan e-inghonlo, lapen amethang apran chepisi ilitum aphan epap hei hei pen epajoktang-lo,

⁶lapen alangli Po, atheke Arnam aphan kepaklem pijisi alangli ilitum aphan kurusar atum lapen recho arat epaplang tang-lo. Labangso a-Jisu Khristo adak-atur lapen ajakong, kejut un-e akai apar kai anta padonang! Amen.

⁷Jo langtha, alangli inghun athak pen vangbomlo. Alangliphan chir pen ketok atum lapen abangphutin amonitta alangliphan thek longphrongji. Pirthe athak kedo amonit atum an alangli pen apot chirusi aning chetengji. Ahok lo, Amen.

⁸Non lapen aphrangta kedo lapen mo kevangji abang la Jakongkethe Hemphu Arnam pulo, “Ne helo Kecheng lapen Kejut.”

⁹Neli nanglitum akorte Jon ta Jisu aphan kekroi ajok nanglitum pen pen keduk kesung kepho rap-rap, alangli rat aso keplanglong rap-rap, lapen ning keding pen kechechak rap rap abang-lo. Neli Arnam alam lapen Jisu kepaklang ahok alam kethan apot neliphan Patmos pu alanglom along nebilo.

¹⁰Ansi Hemphu arni neli mek rengjeng-lo, lapen neli nung anat Pongut arki ason thakthak ase akethepi neli arjulong-lo.

¹¹Labangso ase pulo, “Nangli kethek long ason an epak aloh along tok-ra longthroksi arongsopi along kedo amondoli mate kroi-asong aphan atheke, Ephesas, Smyrna, Pergamam, Thiatira, Sardis, Philadelphia, lapen Laodesia amondoli mate kroi-asong aphan lonon.”

¹²Neliphan nekangki abang aphan kethek longjisi neli chetevarlo lapen neli hongthroksi Ser amelur archok thek long-lo,

¹³lapen archok angbong monit nangnak inut aphan thek long-lo. Alangli akengpak an kephorok achoi keding chingchoilo, lapen alangli ning angden Ser achepan chingtinlo.

¹⁴Alangli chu kelok biresak angmi ason thakthak, mate ar-e kelok ason thakthak-lo, lapen amek ke me ade ason thakthak-lo;

¹⁵alangli keng ke kepherangtang lapen kangthitang abitoi asonsi klarbong lapen ase ke langsun arki asonlo.

¹⁶Ari ar-e along chiklo longso throksi do, lapen alangli ingho pen rangso hini kedo kereset anokjir barlo, lapen alangli mahang ke nerlo chitim a-arni ason thak-thaksi tur-ang-lo.

¹⁷Alangliphan thek-longsi neli kethitang ason thak-thaksi alangli kengri klibup-lo. Alangli ari ar-e neli bang athak batsi alangli pulo, “Phereri! Kecheng lapen Kejut neli helo.

¹⁸Kerengver abang neli helo. Neli thilot-lo, bonta chini iktha neli ke kejut un-e akai apar akai anta rengver. Neli ridengsi kethi lapen chom Arong aphlok do.

¹⁹Tangte nangli kethek long, la non kedobom lapen mo aphi keplangji alam hei hei toknon.

²⁰Neli ri ar-e along nangli kethek-long achiklo-longso throksi, lapen Ser amelur archok hong throksi akepatu alamthe lahelo: hala chiklo longso throksi ke long throksi amondoli mate kroi-asong apherangke atum lo, lapen hala melur archok hong throksi ke long throksi amondoli mate kroi-asonglo.