Read Karbi KEPAKLANG 10 Bible Online

KEPAKLANG 10 - Karbi bible

KEPAKLANG 10

¹Ansi neli sining pen nangkehir ajakong kethedung apherangke kaprek thek-long-lo. Alangli phan inghun ephar pen tomthip-lo, lapen aphu athak mukak dolo; alangli mahang ke arni nangnak-lo, lapen akeng ke me anujok nangnak-lo.

²Alangli rideng kepurtang aloh athuiso dolo. Alangli akeng ar-e ke talo athak bilo lapen akeng arvi ke longle athak bilo,

³lapen alangli hingho kangrong ason thakthak ase kethe pen hang-lo. Alangli hangdet aphi sining batai throksi ingreng-lo.

⁴Sining kangder batai throksi ase jutdet pen amat neli loh tokji dokdok-lo. Bonta neli sining pen kevang ase arjulong-lo. Labangso ase pulo, “Sining kangder pabatai throksi pen keningje alam an patujoi non; labangso alamthe tok-ri!”

⁵Ansi la neli kethek-long talo lapen longle athak karjapther apherangke sining anat ari ar-e chirungsi,

⁶Arnam amen pen seme tang-lo. Labangso a-Arnam helo kejut un-e pin akai apar akai anta kerengver, sining lapen labangso arlo kedo amar an kepinchong, pirthe lapen labangso athak kedo amar an, lapen talo lapen labangso arlo kedo api aphan kepinchong abang-lo. Halabangso apherangke pulo, “Der-o-elo!”

⁷Bonta mo throksi apherangke abang pong-ut but-lote Arnam amethang aban, atheke montri atum aphan kethan asonthotsi alangli kemathatang akepatu akam paplengji.

⁸Ansi sining pen kevang neli karju longtang ase neliphan puthot puthulo, “Damra talo lapen longle athak karjapther apherangke arideng pen hala kepurtang aloh athuiso ennon.”

⁹Neli pherangke along damsi pulo, “labangso aloh athuiso neliphan neli-pitha.” Alangli neliphan pulo, “Enra chodetnon; la nangli pok arlo hodak cheplangji, bonta nangli ingho arlo ke la pijo alang ason thakthak dokjinji.”

¹⁰Pherangke arideng pen loh athuiso neli ensi chodet-lo, lapen neli ingho arlo lake pijo alang ason thak-thak dokjinlo. Bonta neli la joilut aphi neli pok arlo hodak cheplang-lo.

¹¹Ansi neliphan puthot pulo, “Ake-ongpi akhei, adet, alam lapen arecho atum alamjir nangli puthot montri nangji.”