Read Karbi KEPAKLANG 11 Bible Online

KEPAKLANG 11 - Karbi bible

KEPAKLANG 11

¹Ansi kepun-i achin nangnak arpik atharlon ehong neliphan pilo, lapen neliphan pulo, “Damra Arnam kardom ahem thepi kangthir lapen dovan punnon, lapen kardom ahem thepi kangthir arlo kangduk kardom atum aphan lakhanon.

²Bonta kardom ahem thepi kangthir atikup punri, thangbakma lake Jihudi kalidet atum aphan pitang-lo. Halatum chiklo jonphlikep-ra hini an Rongsopi kangthir doji.

³Pe thoila kechepindeng neli haki banghini aphan neli nangtoiji, lapen halatum 1,260 arni an Arnam alam kemontriji ajakong piji.”

⁴Pirthe a-Hemphu angno karjapphrong, hala Oliv athengpi arong rongni lapen melur archok hongni helo banghini ahaki atumlo.

⁵Komane abang jongsi halatum aphan kephangnoji aning hang-lote, halatum angho pen me nangbarsi ahotur atum aphan chodet titilo; lapen lapusonsi halatum aphan kephangnoji aning kehang atum an aphan ke pathi-et po.

⁶Halatum Arnam alam kepachethang ahut arve kejangjedetji aphan halatum sining kangkirhetji ajakong do, lapen lang an vi kepaklangji lapen aning kehang aling avur-akrem akesung hei hei pen pirthe aphan aduk kanghoiji ajakongta do.

⁷Halatum lam kepachethang jutdetsi herang thepi pen nangkebar Anampi api halatum pen ron chedanpo. La nampi api atum haidetsi halatum aphan pathipo,

⁸lapen halatum akethitang abang arpum rongsopi kethe atovarpi along tilaipo. Labangso arongsopi alongsi halatum a-Hemphu aphan thengparpan athak pathilot-lo. Lamlir penke halabangso arongsopi aphan Sodom, mate Ijip pusi amen hang-lo.

⁹Do-an akhei, akur, alam lapen adettin amonit atum hala kethitang arpum aphan langphrongpo lapen halatum aphan thiri arlo pabidam longledetpo.

¹⁰La banghini Arnam amontri kethi apot pirthe amonit atum chehokji, aning arong apar arong chepipikji lapen halatum lahin lahin hormu adan cheloseroiji. Pima, la banghini amonit atum pirthe amonit aphan pasungpik-lo.

¹¹Bonta nithomra ebeng aphi Arnam pen kepareng achethe vangsi halatum along lutdamlo, lapen halatum thursi arjapphrong-lo; lapen halatum aphan kethek-long atum an phere-olo.

¹²Ansi hala montri banghini atum sining pen ase kethe pen kehang charjulong-lo: La pulo, “Ladak vangnon ho!” Lapen halatum ha inghun pen sining athak damlo, lapen halatum ahotur atum halatum aphan langdunphrong-lo.

¹³Halabangso ahut mamat chikli thepi vang-lo; rongsopi phan-kep angbong pen ephan rulo, lapen bang suri throksi amonit thi-lo. Kedolang amonit atum an pheresi sining athak kedo Arnam aphan adak atur pathelo.

¹⁴Hala hini angdeng akesung juttang-lo. Bonta kethom angdeng akesung nangledappo.

¹⁵Ansi throksi apherangke abang apong-ut chebut-lo, lapen sining athak ase akethe hei hei dolo lapen pulo, “Pirthe arat nonke e-Hemphu lapen Khristo arat cheplangtang-lo; lapen Alangli kejut un-e akai apar akai anta recho choji!”

¹⁶Ansi Arnam angno, recho anghoi athak kangni akesar bang ingkoira-phli atum Arnam aphan ardomkhrupsi,

¹⁷pulo: “Nelitum nangliphan rolo Hemphu Jakongtheparpik Arnam, kadokave keklemthek abang, non lapen aphrangta kedo abang, pima nangli methang kethepik ajakong pensi, nangli recho kechoji pangcheng tang-lo!

¹⁸Adet kaprek atum ke aning thihurlo, pima nangli ning kethiji, lapen kethitang atum aphan kangsaiji ahut nangletang-lo. Nangli ban atum, atheke montri atum aphan, lapen methang amonit atum, atheke, nangliphan kangduk a-arleng kethe lapen arlengso atum an aphan nong-e kepiji ahut, nangle-tang-lo, lapen pirthe aphan kepavir atum aphan kepavirji ahuta nangletang-lo!”

¹⁹Ansi sining athak Arnam akardom ahem thepi kangthir ingpudet-lo, lapen halabangso kardom ahem thepi kangthir arlo kechechak aloh kedo, ser pen ketop Asinduk thek long-lo. Lapen hadak sining birlak-lo, arki kethe dolo, sining ingderlo, chikli vang-lo lapen herai klo-olo.