Read Karbi KEPAKLANG 12 Bible Online

KEPAKLANG 12 - Karbi bible

KEPAKLANG 12

¹Ansi sining athak isi kethedung lapen kelang kemanghumeme angthek nangklang-lo: Hadak arloso inut arni che-umsi, chiklo athak akengpak arumsi chiklo do, lapen aphu athak chiklolongso krehini avaikang chekup-lo.

²Alangli pok arlo aso chopathelo, lapen aso amahang kepathekjisi aduk kedo-ong hang-kongbomlo.

³Sining athak akaprek akemang-humeme angthek nangklang-lo. Pherui nangnak, Chehangthepi pu araiko ake-er akethepi nangklang-lo. Labangso api aphu throksi, anu hongkep, lapen aphutin athak phu avaikang isi-si dolo.

⁴Arme pen chiklolongso phanthom angbong pen ephan vungsi pirthe athak nangpaklolo. Lapen amahang kethek pen mamat oso aphan kechojisi halabangso a-Chehangthepi ke oso amahang kepathekji dokdok a-arloso angno tondunding-lo.

⁵Ansi labangpi pinso a-oso amahang pathek-lo. Labangso a-oso ingchin achin pen det do-an pangriji. Bonta labangso a-oso aphan Arnam along lapen alangli inghoi along rungpondet-lo.

⁶Labangpi arloso kejejangtang ajo katsi Arnam kethikpi adim do damlo. Hadak alangliphan 1,260 arni an lanaji.

⁷Ansi sining athak ron thurlo. Maikel pu apherangke, lapen alangli pherangke atum hala Chehangthepi pen ron chedanlo. Chehangthepi lapen apherangke atumta ron chedan dunlo.

⁸Bonta Chehangthepi lapen apherangke atum remdet-lo, lapen latum aphan sining athak pado long-ledet-lo.

⁹Chehangthepi ke hako apherui, atheke, pirthe adang aphan kepamanghu a-Hi-i sarpo, mate, asoitanlo. Alangli lapen apherangke atum aphan pirthe athak nangpaklolo.

¹⁰Ansi sining athak ase akethe neli arjulong-lo. La pulo, “Arnam non amethang amonit aphan pajokpo! Alangli non amethang ajakong chepaklangpo lapen recho asonsi pangripo! Non alangli Khristo ajakong chepaklangpo! Pima ilitum a-Arnam angno karjaptherra ilitum akorte atum aphan nerlosini lapen jopangthang adai ketinbom abang sining pen nangpaklotang-lo!

¹¹Biresak a-So avi pen lapen halatum kepachethang, ahok alam pen ajok ilitum akorte atum alangliphan haitang-lo, pima halatum amethang methang apran kechepiji lapen kethiji aphan anta aning hang-lo.

¹²Lahelo, oh sining lapen la athak kedo atum, ning arongnon! Bonta, oh pirthe lapen talo, nangtum ko-an akesung phonangpo! Pima Hi-i sarpo aning kethi parpik pen nangtum along nanghir tang-lo; pima alangli chinilo, non malomso ahut ansi alangli dolongchotpo.”

¹³Alangliphan pirthe athak nang-paklotang-lo pu chethek longsi Chehangthepi hala pinso a-oso amahang kepathek a-arloso aphan hungdunlo.

¹⁴Bonta labangpi aphan kethikpi adim, ha kejejangtang ajo kangjardamji aphan Vomupi arveng hini labangpi aphan pidet-lo. Hadak Chehangthepi arideng pen pajoksi ningkan kethomra-achitim an alangliphan lanaji.

¹⁵Lapen halabangpi arloso aphan langkethe kepaponjisi alangli phi phi langroi asonthot alang Chehangthepi angho pen pachonlo.

¹⁶Bonta pirthe alonglesi labangpi arlosopi aphan rapdunlo; la chingpudangsi Chehangthepi angho pen nangkechon alang an ingsipdun-et-lo.

¹⁷Arloso aphan Chehangthepi aning thihak-lo lapen labangpi kedolang asomar an, atheke, Arnam ahukum kekroi lapen Jisu alamjir kekroi thirklong atum an pen ron kechedanjisi damjuilo.

¹⁸Lapen Chehangthepi talo asangti along arjaptherlo.