Read Karbi KEPAKLANG 13 Bible Online

KEPAKLANG 13 - Karbi bible

KEPAKLANG 13

¹Ansi neli thek-long-lo, nampi api ejon talo pen arlulo. Labangso api anu hongkep lapen aphu throksi do. Anu ahongtin along isi si phu kekup avaikang lapen aphutin athak Arnam aphan kepinrem amen do.

²La neli kethek-long Anampi api ke bongkrui nangnaklo; akengpak ke thokvam akengpak nangnak, lapen angho ke hingho angho nangnak-lo. Hala Chehangthepi labangso Anampi api aphan amethang ajakong, ame-thang anghoi, lapen akam kethe pilo.

³Aphu isi abang ke kethi nangji, lason areng amek long-lo, bonta labangso amek medet-lo. Pirthe adang an manghuphrongsi labangso api aphi phi dunhurlo.

⁴Halatum Chehangthepi aphan ingduk-ardomlo, pima alangli hala nampi api aphan kam ajakong pilo. Halatum nampi api aphanta ingduk-ardomsi pulo, “La nampi api ason thakthak matsi doma? Matsi la pen ron chedan unjima?”

⁵Lam kangtang pen kechepindak-iji, Arnam aphan kepinrem-iji angho la nampi api aphan pidet-lo, lapen chiklo jon 42 an aning kehang aling keklemji ajakong la aphan pidet-lo.

⁶La Arnam aphan, alangli men aphan, alangli kedo adim aphan, lapen sining athak kedo atum an aphan kepinremjisi angho chingpulo.

⁷La Arnam amonit atum pen ron kechedanji lapen halatum aphan kehaiji avarsai long-lo, lapen la akurtin, akheitin, alamtin lapen adettin aphuthak ajakongta pilo.

⁸Pirthe kepinchong aphrang pen chethe abohi along amen ketoktang atum pen apar pirthe athak kedo amonit atum an labangso Anampi api aphan ingduk ardomji. Labangso achethe abohi ahemphu ke kethutang a-Biresak aso helo.

⁹“Tangte ano kedo abang parju nang!

¹⁰Mane abang aphan jongsi kenepchek nangji do tangte, alangliphan nepchekji; mane abang jongsi nokjir pen kethi nangji do tangte alangli nokjir pen thivekji. Lasi Arnam amonit atum kechechakthek ajakong pen lapen kekroi thirklong pen do nangji.”

¹¹Ansi neli longle pen nangkebar akaprek Anampi api thek-long-lo. Labangso api ke biresak aso ason thakthak anu hongni do, lapen Che-hangthepi ason thakthak lam ningjelo.

¹²Aphrang Anampi api ajakong an longsi, angnosi labangso api kadokave klemlo. Lake pirthe lapen pirthe athak kedo atum an aphan hala aphrang Anampi api, atheke kethi nangji areng amek long-lo setta kemedet api abang aphan pardomlo.

¹³La aphi Anampi api bidi jutdet angthek kethe hei hei paklang-lo; lapen kadokave amonit angnosi sining pen pirthe athak me nangpahirlo.

¹⁴Lapen hala aphrang Anampi api angno angthek hei hei kepaklangji ajakong longsi, lapen angthek hei hei paklangsi pirthe athak kedo amonit atum an aphan pamanghulo. Labangso api halabangso amonit atum aphan pulo, “Hala nokjir pen ajok areng amek kelong setta kereng-etlang Anampi api a-arjan selamnon.”

¹⁵La aphi Anampi api abang aphrang Anampi api a-arjan aphan chethe kepiji ajakong long-lo; lasi hala nampi api a-arjanta ningjethek-lo, lapen halabangso a-arjan aphan kardomde atum an aphan pathithek-lo.

¹⁶Labangso api bihek lapen thedung amonit, keplang-o lapen keboidet, ban lapen ban kalidet, kadokave atum aphan ari ar-e along, kalite atehang athak angthek pachebitoilo.

¹⁷Badu amonit setta labangso angthek, atheke, halabangso api amen, kalite amen anombor avete nam longle, kalite jor longledet-lo.

¹⁸Labangso alam kechinijite gian do nangji. Kechini ajakong kedo atum an ha nampi api anombor lakhanon, pima, lake monit anomborlo. Labangso anombor ke 666 helo.