Read Karbi KEPAKLANG 14 Bible Online

KEPAKLANG 14 - Karbi bible

KEPAKLANG 14

¹Ansi neli langsi Zaion anglong athak Biresak a-So karjapther thek-long-lo. Alanglilong monit bang 144,000 atumta do. Halatum atehang athak alangli men lapen apo amen ketok do.

²Lapen langsun arki ason thakthak ase lapen sining jasemet kangder arki ason thakthak sining pen kevang ase neli arjulong-lo. La neli karjulong ase ke kum kerot atum amethang methang akum kerot arki ason thakthak-lo.

³Recho anghoi angno lapen hala jon phli akereng api lapen akesar atum angno halatum lun kemi lunlo. Pirthe athak amonit atum angbong pen kepajoktang hala bang 144,000 atum apar ke baduta halabangso alun charli un-e det-lo.

⁴Latum ke arloso atum pen kangthirthe akam kecheklemkle atumlo; halatum ingthirjirlo. Halatum Biresak a-So kedam aling dunkrilo. Arnam lapen Biresak a-So aphan kepi athe atikong ason thak-thaksi monit atum angbong pen halatum aphan pajok tang-lo.

⁵Halatum kaita chobei alam ningjeje, halatum adai avepinlo.

⁶Ansi neli thek-long-lo, sining aphe-rangke anut kaprek abang angsongsi ingjarlo. Pirthe athak kedo amonit atum an aphan, atheke, adettin, akurtin, akheitin lapen alamtin aphan kepachethangji aphan kaiketa kedover a-Birta keme alanglilong dolo.

⁷Alangli ase kethe pen pulo, “Arnam aphan pherera alangliphan adak-atur pathenon! Pima alangli monit aphan kangsaiji apor nangletang-lo. La sining, pirthe, talo, lapen kangbop alangso kepinchong abang aphan ingduk ardomnon!”

⁸Aphrang apherangke aphi adun apherangke abang vangsi pulo, “Bebilon kethe rutang-lo, rutang-lo! Alangli amethang abeisa akam ahor kadokave amonit aphan pajuntang-lo!”

⁹La banghini apherangke aphi kethom apherangke abang vangsi ase kethe pen pulo, “ Mane abang jongsi hala nampi api, lapen a-arjan aphan ingduk-ardom lote, lapen amethang atehang lapen ari athak angthek dolo tangte,

¹⁰alangli Arnam aning kethi ahor junji. Lake Arnam aning kethi aharlung along kedung kepangvuivedet ahorlo. Labangso amonit atum anke pherangke kangthir atum lapen Biresak a-So angnosi meplum ame akar along aduk pho-oji.

¹¹Halatum aphan aduk kanghoi-i ame amehi kejut un-e akai apar akai anta tokmonji. Hala nampi api lapen a-arjan aphan kangduk-kardom atum lapen labangso api amen angthek kedo atum an ajo-nerlota sanglongledetji.”

¹²Lasi Arnam ahukum hei hei kekroi lapen Jisu aphan kekroi kethirklong atum, atheke Arnam amonit atum anke chechak-ding nangji.

¹³Ansi neli sining pen kevang ase arjulong-lo. La pulo, “Labangso alam toknon. Non pen apara Hemphu pen chelangpetsi kethiji atum rengme!” Karjong thaksi pulo, “Kalang-lo, ahok-lo! Halatum amethang methang akam che-o pen sanglongpo, pima halatum keklem akam ale halatum along chedunkripo.”

¹⁴Ansi neli inghun kelok lapen labangso anghun athak monit nangnak inut kangnilun thek-long-lo. Alangli phu athak ser avaikang lapen ari along nokek-rangso akerepi do.

¹⁵Ansi kardom ahem thepi arlo pen akaprek apherangke nangbarsi hala inghun athak kangnilun abang aphan ase kethe pen pulo, “Nokek-rangso pen nangli sok kerot pangchengnon, pima sok kerot apor nangletang-lo, atheke pirthe asok kemen phudang-lo!”

¹⁶Ansi inghun athak kangnilun abang anokek-rangso pen pirthe asok rot-lo.

¹⁷Ansi sining athak kardom ahem thepi arlo pen akaprek apherangke nangkebar neli thek-long-lo. Alangli ridengta akerepi anokek-rangso do.

¹⁸Ansi dovan pen akaprek apherangke vang-lo. Alangli ke me aphuthak ajakong do. Alangli hala akerepi anokek rangso kedo abang aphan ase kethe pen hangsi pulo, “Nokek rangso pen nangli pirthe adrakha athe pangrumnon; pima, drakha athe men tang-lo.”

¹⁹Lasi hala-bangso apherangke anokek rangso pirthe athak nang pahirsi drakha athe rot-lo, lapen adrakha athe Arnam aning kethi adrakha kesor adim arlo varchorlo.

²⁰Rongsopi angtansi drakha kesor ajoton arlo drakha athe athak dongsi sorlo, lapen drakha kesor ajoton pen vi nangchonsi mali 200 an akehelo lilo, lapen la karnuk mali pho dolo.