Read Karbi KEPAKLANG 16 Bible Online

KEPAKLANG 16 - Karbi bible

KEPAKLANG 16

¹Ansi kardomhemthepi kangthir pen kevang ase akethepi neli arjulong-lo. La pherangke bang throksi aphan pulo, “Damra Arnam aning kethi pen keplengset aharlung hong throksi pirthe athak dungnon!”

²Aphrang apherangke abang damsi aharlung longle athak dung-lo. Ansi hala nampi api angthek kelong lapen a-arjan aphan kardom atum an kehijim meme lapen kesopik areng amek long-lo.

³Labangso aphi adun apherangke abang aharlung talo athak dung-lo. Talo alang kethitang amonit avi ason thakthak cheplang-lo, lapen talo arlo kedo kereng api an thikoilo.

⁴Ansi kethom apherangke abang aharlung langroi lapen kangbop alangso athak dung-lo lapen la hei hei vi cheplang-lo.

⁵Lang hei hei kechepa-hemphu apherangke kepu neli arju long-lo, “Non lapen aphrangta kedo kangthir abang, Nang akangsai anke dhoromipet akangsai binong.

⁶Pima halatum Arnam amonit lapen amontri atum avi pabulo. Lasi nangli halatum kepajunji aphan vi pilo. Halatum lapuson kepho nangji a-ot dolo.”

⁷Ansi dovan pen kevang ase neli arjulong-lo. La pulo, “Hemphu Arnam, Jakongtheparpik abang! Nang akangsai hei hei ke ahokpet lapen dhoromipet binong!”

⁸Ansi phli apherangke abang aharlung arni athak dung-lo, lapen la monit atum aphan me pen kepase-kringji ajakong pilo.

⁹Kesopik ame angtang pen halatum aphan pasek ring-lo, lapen lahei hei avur-akrem nangketoi ajakong kedo a-Arnam amen aphan halatum pinremlo. Bonta halatum aning chiruire lapen Arnam anong pathethedet-lo.

¹⁰Ansi pho apherangke abang aharlung hala nampi api kangni anghoi athak dung-lo. Nampi api adet adang an ingtingkuk-lo, lapen kesung apot monit atum amethang methang ade chekorlo,

¹¹lapen halatum kesung lapen areng amek keso apot sining athak kedo a-Arnam aphan pinremlo. Bonta halatum kehingno akam an pen aning chiruiredet-lo.

¹²Ansi throk apherangke abang aharlung Euphratis alangroi kethe athak dung-lo, lapen nihang anat pen kevang arecho atum aphan tovar kesikpijisi labangso alangroi thep hak-lo.

¹³Ansi ha Chehangthepi angho pen lapen nampi api angho pen lapen kechobei amontri angho pen chongho nangnak bangkethom kangthirthe akarjong nangkebar neli thek-long-lo.

¹⁴Halatum ke manghumeme angthek hei hei kepaklang ahi-i langno atumlo. Jakongtheparpik a-Arnam a-Arni ahut ron kechedanji aphan kepangrumjisi karjong bangkethom atum pirthe athak kedo kadokave arecho atum along damlo.

¹⁵Chini iknon! Kanghu ason thak-thaksi neli vangpo! Areng angse kedam nangnedet lapen ketherak nangnedetji aphan no kechepang-ar pen lapen pe-ri pen kechesikding pen kedo abang rengme.

¹⁶Ansi hala karjong atum Ibri alam pen kepu Armageddon pu adim recho atum aphan pangrumlo.

¹⁷Ansi throksi apherangke abang aharlung tomon angbong dung-lo, lapen Kardomhemthepi arlo kedo recho anghoi pen ase kethe vangsi pulo, “La plang tang-lo!”

¹⁸Sining birlak lo, arki kethe dolo, lapen sining ingderlo, chikli thepi vang-lo, pirthe athak monit atum kedo cheng ahut pen non an lapuson achikli vangve pinlang; labangso achiklile theneilo!

¹⁹Rongsopi kethe inghangsi bengthom cheplang-lo, lapen kadokave adet arongsopi hei hei ru-et-lo. Arnam hala Bebilon kethe aphan chemathathusi amethang aharlung along kedo aning kethi ahor la aphan pajunlo.

²⁰Kadokave alanglompi lapen inglong avedet-lo.

²¹Lin phokep phokep anbak ardi kedo aherai hei hei sining angsong pen monit athak nangklolo. Herai pen akesung apot labangso amonit atum Arnam aphan pinremlo, pima, labangso akesung thepik-lo.