Read Karbi KEPAKLANG 17 Bible Online

KEPAKLANG 17 - Karbi bible

KEPAKLANG 17

¹Ansi harlung throksi kedo bang throksi apherangke atum angbong pen inut neli long vangsi pulo, “Neli long nangdun non, lapen hala lang ake-ongpi athak kangni kehing-nopik abeisapi aphan kepasung neli nangpaklangpo.

²Labangpi pen pirthe arecho atum beisa akam cheklemlo lapen pirthe amonit atum labangpi kechoklem abeisa akam ahor junsi ingrilo.”

³Lapen mekrengjeng pen alangli neliphan kejejangtang ajo neponlo, lapen nampi api ake-er athak kangni inut arloso neli thek-long-lo. Labangso api abang athak ke bithe bitha Arnam aphan kepinrem amen ketok dolo, lapen lake aphu throksi lapen anu hongkep dolo.

⁴Labangso a-arloso hepi arje lapen ersip ape chepindeng-lo. Alangli ser, ador keso a-arlong lapen mukut-abor apindeng hei hei chingthangsi matlep lo. Alangli rideng ser aharlung do lapen lake alangli kechoklem aketherakmeme lapen akehijim meme akam hei hei pen plengset-lo.

⁵Alangli tehang athak ke kepatu alam ketok do; “Oh Bebilon kethe, beisapi atum an lapen pirthe athak akehijim meme akam an apei”.

⁶Lapen neli thek-long-lo, Arnam amonit atum avi lapen Jisu pen apot kethinang atum avi junsi labangso arloso ingrilo. Labangpi aphan thek-longsi neli manghu parpik-lo.

⁷Ansi pherangke neliphan arjulo, “Nangli kopi apotsi manghu loma? Labangpi arloso lapen alangli kardon Anampi api, atheke aphu throksi lapen anu hongkep kedo Anampi api alamjir akepatu alam neli nangliphan nangthanpo.

⁸La nangli kethek-long Anampi api aphrangke reng-et-lo, bonta nonke thitang-lo. Labangso api malomso aphi aklong kave aherang thepi pen nangbarsi kevir adim damji. Pirthe athak kedo amonit atum, atheke pirthe kepinchong ahut pen chethe abohi along amen ketok kave atum an labangso Anampi api aphan thek-longsi manghuphrongji. Pima aphrangke la renget-lo, lapen nonke thilot-lo, bonta la puthot rengthuji.

⁹“Lasi gian lapen kechinithek ajakong do nangji. La aphu throksi ke inglong throksilo, lapen labangso athaksi halabangso arloso ingnilo. Lapen la aphu throksi ke recho bang throksilo,

¹⁰latum angbong pen bangphoke thitang-lo, inut abang non recho chobomlang, lapen kaprek inut abang ke non anta vangvelang, lapen alangli vang-lote malomso ahut ansi recho chochotji.

¹¹Hala aphrangke kereng-et, bonta nonke kethilot Anampi api ke nerkep aphong arecholo. Lake hala bang throksi angbong pen inut abang-lo, lapen la kevirjisi dambomlo.

¹²“Nangli kethek-long hongkep anu-ke recho bangkep-lo. Halatum non anta rat aso pangrirelang, bonta halatum nampi api pen pen porphai isi aphan recho ason thakthak kepangriji ajakong longji.

¹³Halatum keklemji aning kematha esonnat, lapen halatum ajakong lapen akam hala nampi api aphan pidetji.

¹⁴Halatum Biresak a-So pen ron chedanji, bonta Biresak a-So halatum aphan paremji pima Alangli ke hemphu atum a-Hemphu lapen recho atum apar arecholo, lapen alanglilong kedo atum ke hala kephatang, kangvaitang, lapen alangliphan kekroithip atumlo.”

¹⁵Pherangke neliphan puthulo, “Me lang hei hei athak beisapi kangnilun nang thek-long-lo; halabangso alang ke det hei hei, monit ake-ongpi atum, khei hei hei, lapen alam kaprek kaprek asong atumlo.

¹⁶Nang kethek-long anu hongkep lapen nampi api hala beisapi aphan hijimji. Halatum labangpi kedo an ason pon-etji, lapen labangpi aphan areng angse bitekangkokji, halatum labangpi a-ok chodetji lapen labangpi aphan me pachodetji.

¹⁷Halatum lapuson klemji, pima Arnam amethang aning kehang akam kepaklemjisi halatum aphan aning pahangtang-lo. Lasi halatum ning isipet pen klem rap-rapji, lapen Arnam alam hei hei chekok ketik ke rat aso kepangrijisi halatum amethang ajakong nampi api aphan pidetji.

¹⁸“Mo nang kethek-long a-arloso helo hala pirthe athak arecho atum aphuthak recho kecho arongsopi kethelo.”