Read Karbi KEPAKLANG 18 Bible Online

KEPAKLANG 18 - Karbi bible

KEPAKLANG 18

¹Labangso aphi neli thek-long-lo, kaprek apherangke inut sining pen nanghirlo. Alangli keklemji ajakong kethe do, lapen alangli methang atur pen pirthe pathe-ang-lo.

²Alangli ase kethe pen hangsi pulo, “Rutang-lo! Hala Bebilon kethe rutang-lo! Nonke la hi-i atum lapen kangthirthe ahi-i atum an athireng vangreng adim cheplangtang-lo, lapen kangthirthe lapen kehijim meme avo atum an kedo adim cheplangtang-lo.

³Pima kadokave adet amonit atum labangpi ahor juntang-lo, lake labangpi beisa akam aning kehang ahorlo. Pirthe arecho atum labangpi pen beisa klemlo. Labangpi rengdok rengni ahormu aning kehang kaita jut un-elo, la pen ajok pirthe abepari atum plang-i-olo.”

⁴Ansi sining pen akaprek ase kevang neli arjulong-lo, la pulo, “Nerat aso atum, nanglitum labangpi apap hei hei apharman kecho-en dundedetjile, lapen labangpi akesung hei hei kephodun nangnedetjile, labangpi along pen nangbarnon!

⁵Pima labangpi apap hei hei sining an buipangtui tang-lo, lapen Arnam labangpi akehingno akam hei hei aning chebi-elo.

⁶Labangpi nanglitum aphan keklem asonthot-le; nanglitum labangpi aphan klemnon; labangpi keklem apar phanni labangpi aphan alar huinon. Labangpi nanglitum aphan kepajun-i aharlung along phanni ahor pangvuira, labangpi aphan pinon.

⁷Labangpi amethangsi adak-atur kechepathe lapen aning kehang kechepapleng asonthot, labangso atengthot-le labangpi aphan aduk inghoinon, lapen aning aduk pinon. Pima labangpi amethangsi aning arlo chepulo: ‘Neli inut arechopisi ladak ingnilo! Neli hemepi kali, neli kaita ningduk nangnedetji!’

⁸Lasi arni isivet angbongsi labangpi avur-akrem hei hei phoji, atheke keso, kechiru-chernap lapen akhim phoji. Lapen labangpi aphan me pachodetji, pima labangpi aphan kangsai abang, Hemphu Arnam ajakong thepik binong.”

⁹Labangpi pen beisa keklem lapen aning kehang kechepapleng pirthe arecho atum labangpi aphan kecho ame amehi thek-longsi labangpi pen apot aning chetengsi chiruji.

¹⁰Labangpi kepho akesung apot pheresi halatum achar si, arjap phrongji. Halatum puji, “La-an arongsopi kethe! Bebilon, la-an ajakong kethe arongsopi! Nang kepho akesung ko-an akepherememe! Porphai isivet angbongsi nangliphan pasungdet tang-lo!”

¹¹Pirthe athak abepari atum labangpi pen apot chiruji, pima hala-tum telong pen kevan ahormu non pen apar ke kenam abang avelo,

¹²telongpi pen kevan aser lapen arup, adorkeso a-arlong lapen mukut-abor, linen kephirso ape, hepi arje ape, silik ape lapen ersip ape; kenempru athengpi abeng, ingnar aso pen keselam ahormu an, adorkesopik athengpi pen kesemar ahormu an lapen bitoi pen, ingchin pen lapen marbol pu a-arlong chething pen keselam ahormu an;

¹³lapen ke thengkeching, lapen mosola, hijung methek, adorsopik kenem-prujin ajangthu, hijung aphik, hor alang, jangthu, soktepli aduk keme, soktepli, chainong lapen biresak, losei lapen ahemkonglong hei hei, ban atum lapen monit apran anta kenam abang avedet-lo.

¹⁴Bepari amonit atum pulo, “Nangli ningkehang akeme ahormu an nanglilong pen damtang-lo, lapen nangli khi kedo an lapen alon kedo, lirlir-lorlor amar an virdet-lo lapen nangli hala hei hei kaita longthuthepin po!”

¹⁵Halabangso arongsopi along bepar keklem pen ajok keplang-o abepari atum akehelosi arjapphrongpo, pima halatum labangpi kepho akesung pen pherepik-lo.

¹⁶Halatum chirusi aning aduk pen pupo, “Mai! La rongsopi ketheke kepherememe akesung pho nang-olo! Labangpi ke linen kephirso ape, hepi arje ape, ersip ape kechepindeng lapen ser, ador keso arlong lapen mukut-abor hei hei apindeng kechingthang abang-lo!

¹⁷Lapen porphai isivet angbong labangso akhi an virdet-lo!” Telongpi ahemphu atum lapen telongpi kevek lapen kechethapdun atum lapen talo along bepar keklem pen ajok kerengbom atum an achar akehelosi arjapphrong-lo.

¹⁸Lapen labangpi aphan kecho ame amehi thek-longsi halatum hangjosi pulo, “Labangso arongsopi kethe ason thakthak akethe arongsopi avepin-lang!”

¹⁹Halatum longle aduk aphu athak chevarsi lapen chirusi keningri pen pulo, “Mai! Labangso arongsopi kethe ko-an akepherememe akesung pho nang-lo! Talo along telongpi pen bepar keklem atum an labangpi akhi pen ajoksi plang-olo! Bonta porphai isivet angbong alangli mar an virdet-lo!”

²⁰Labangpi kevir apot ning arong-non, Oh sining, Arnam amonit atum, ketoitang atum lapen amontri atum! Pima labangpi nanglitum aphan keklem apot Arnam labangpi aphan ingsaisi alar huitang-lo.

²¹Ansi ajakong kethe apherangke abang sok kekoi-i a-arlong ason thak-thak ardi kedopik a-arlong enlo lapen talo along varchuisi pulo, “Lasonthotsi ajakong kethe pen Bebilon arongsopi kethe aphan varchuisi paruraiji, lapen la puthot klangthuthedetji.

²²Non pen apara nangli methang angbong kum kerot arki, lun kelun atum ase, pongsi lapen pong-ut arki arjulongledetji. Ason kaprek kaprek akam keklem thekser atum nangli methang angbong klangthuthedetji. Sok kekoi akor arkita puthot arjulongledetji.

²³Nangli methang angbong melur ame atur thekthu longledetji; piso kechepangri apinso lapen a-arloso ase puthot arjulongledetji. Pima nangli methang abepari atum helo pirthe athak ajakong kethenei atumlo, lapen nangli maja kanghoi akam pen pirthe adang amonit atum aphan pamanghu-et-lo!”

²⁴Pima, Bebilon arongsopi angbong Arnam amontri atum avi, Arnam amonit atum avi lapen pirthe athak bang kepathitang atum an avi thek-long-lo apotsi Bebilon aphan aduk inghoilo.