Read Karbi KEPAKLANG 19 Bible Online

KEPAKLANG 19 - Karbi bible

KEPAKLANG 19

¹Labangso aphi sining athak armu ake-ongpi atum ase nangnak ase neli arjulong-lo. La pulo, “Arnam aphan ro-archonon! Ilitum aphan ekepajok abang Arnam helo! Alangli adak atur lapen ajakong the-o!

²Alangli akangsai ke ahok lapen dhoromi! Beisa akam pen ajok pirthe aphan kephangno abeisapi kethe aphan alangli ingsaitang-lo. Arnam aban atum aphan kepathi apot alangli labangpi aphan alar huitang-lo.”

³Halatum puthot hangjosi pulo, “Arnam aphan ro-archonon! La rongsopi kethe aphan kecho ame amehi kejut un-e akai apar akai anta tokdungbom!”

⁴Hala akesar bang ingkoiraphli atum lapen kereng api jon phli atum domkhrupsi recho-anghoi athak kangni a-Arnam aphan ingduk ardomlo. Halatum pulo, “Amen! Arnam aphan ro-archo lonang!”

⁵Ansi recho anghoi pen ase vangsi pulo, “Alangli ban atum an, alangli-phan kephere atum, atheke kethe-kebi amonit atum an alangliphan ro-archonon!”

⁶Ansi armu ake-ongpi atum ase, langsun kangreng-u arki lapen sining kangder akethepi arki ason thakthak arki neli arjulong-lo. Halatum kepu neli arjulong-lo, “Arnam aphan ro-archonon! Pima Hemphu Arnam, atheke Jakongtheparpik abang recho chotang-lo!

⁷Ilitum chehok-ra ning arong chepilonang! Ilitum alang-liphan adak atur pathelonang! Pima Biresak a-So aphan piso kepangri a-arni nangletang-lo, lapen piso kechepangriji arloso amethangsi chesiktang-lo.

⁸Labangpi lirlir-lorlor linen phirsoni ape kangthir chepindengtang-lo.” (La linen ape ke Arnam amonit atum keklem akeme akam hei hei helo.)

⁹Ansi pherangke neliphan pulo, “Toknon: Biresak a-So aphan piso kepangri akecho-kejun amei along kephatang atum rengme!” Lapen pherangke puthulo, “Lahei hei ke Arnam ahok alamlo.”

¹⁰Neli alangliphan kangduk-kardomjisi alangli kengri domkhrup-lo, bonta alangli neliphan pulo, “Lapuson klemri! Nanglitum lapen nangli korte, atheke Jisu kethan alam kekroithip atum asonsi nelita inut Arnam abanchot-lo. Arnam aphanle ingduk ardomnon!” Pima Jisu kethan ahok alam pensi Arnam amontri atum lam kethanji ajakong long-lo.

¹¹Ansi sining kangpudang, lapen hadak losei kelok ejon neli thek-long-lo. Labangso alosei athak kardon abang amen ke Kekroi thirklong lapen a-Hok puhelo. Alangli akangsai ke dhoromipet, lapen dhoromi pensi alangli ron chedanlo.

¹²Alangli mek ke me ade nangnak lapen alangli phu avaikang chekup-lo. Alangli thak amen isi ketok do, bonta lake alangli methang apar baduta chinine.

¹³Vi along karnimtang achoi keding alangli chingchoilo. Alangli phan kehang amen ke “Arnam a-Lam” puhelo.

¹⁴Sining athak pen ron kechedan aron-aso atum losei kelok athak ardonsi lapen linen ape kelok kangthir chepindengsi alangli phi phi dunlo.

¹⁵Adet kaprek kaprek akhei atum aphan kethuji aphan alangli ingho pen nokjir akerepi nangbarlo. Ingchin achin pen alangli halatum aphan pangriji; lapen halatum aphan drakha kesor ajoton along dongsi sorji. Labangso ajoton ke kadokave keklemthek a-Arnam aning kethi aphansi pudamlo.

¹⁶Alangli choi keding athak lapen akengtham athak amen ketok dolo. Ketok lapu helo: “Recho atum a-Recho lapen hemphu atum a-Hemphu.”

¹⁷Ansi neli arni athak karjapther apherangke inut aphan thek-long-lo. Alangli angsong kangjar avo atum an aphan ase kethe pen hangsi pulo, “Arnam akecho-kejun Ameipi aphan chingrumnon!

¹⁸Vang-ra recho atum a-ok, chedanbang ahemphu atum a-ok, ron kechedan aron-aso atum a-ok, losei lapen la athak kardon atum a-ok, kadokave amonit atum, atheke ban atum, lapen ban kalidet atum, kethe lapen kebi atum an a-ok chonon!”

¹⁹Ansi neli thek-long-lo, hala losei athak kardon lapen alangli methang aron-aso atum pen ron kechedanjisi hala nampi api, lapen pirthe arecho atum lapen halatum ron kechedan aron-aso atum chingrumlo.

²⁰Bonta nampi api lapen alangli ingno angthek kethe hei hei kepaklang akechobei amontri aphan nepcheksi phatek bengthot-lo. Labangso angthek kethe hei hei pen ajoksi alangli hala nampi api angthek kedo, lapen nampi api a-arjan aphan kardom atum aphan pamanghulo. La nampi api lapen montri aphan meplum pen kekar-ang ame atalo along varchuilo.

²¹Kedolang atum an aphan ke hala losei athak kardon abang angho pen nangkebar anokjir pen thu-et-lo. Vo atum an halatum a-ok un-an chosi chepangkrang-lo.