Read Karbi KEPAKLANG 2 Bible Online

KEPAKLANG 2 - Karbi bible

KEPAKLANG 2

¹“Ephesas amondoli mate kroi-asong apherangke aphan lasonle toknon: “Ari ar-e pen chiklolongso throksi ke-otthip lapen Ser amelur archok hong throksi angbong kehelatvoi abang pulo,

²Nangli kam hei hei neli chinilo; nangli kechepaduk lapen nangli kechechakthek ajakong neli chini lo. Lapen nangli kehingno amonit atum aphan chechak un-e, lapen kalidet setta amethang methangsi Khristo aketoitang abang pu kechepu atum aphan asat lang patini pamesi nangli halatum aphan kechobeichot atum pu thek-long-lo; la kadokave neli chinilo.

³Nangli ning chepading-lo, neli joine pen nangli kesung chechak lo, lapen nangli lak-lelo.

⁴Bonta neli nangli phan labangso alam kepuji do: Nangli aphrang asonthot ke non nephan ne inghonhedet-lo.

⁵Tangte nangli konat pensi klotang-loma, lale chemathathutha. Nangli ning chiruira aphrang keklem akam cheklemthunon. Nangli ning chiruirete neli nanglilong vangsi nangli melur archok kebi adim pen ponpo.

⁶Bonta nangli la akemesi klemlo: atheke neli Nikolaitan atum akam hei hei kehijim asonthotsi nanglita hijimlo.

⁷“Ano kedo abang mondoli atum aphan Karjong kepu alam parjunang! “Kehaibom atum aphan neli Arnam a-Beri along kedo chethe athengpi athe pacho longji.

⁸“Smyrna amondoli mate kroi-asong apherangke aphan lasonle toknon: “Kecheng lapen kejut abang, thilot-lo setta kerengthu-et abang pulo,

⁹Neli nangli kesung lapen keboi chinilo; bonta nangli plang-olo! Lapen kalidet setta, amethang methangsi Jihudi pu kechepu, Soitan amonit asongchot atum nanglitum aphan kepinrem alam neli chinilo.

¹⁰Nangli kephoji dokdok akesung aphan phereri. Nanglitum aphan asat kelangjisi Hi-i Sarpo nanglitum angbong pen manene atum aphan phatek bengji dokdok-lo. Nanglitum nikep an kesung phoji. Ha kethi an pin setta nangli neliphan kekroi thirklong pen donon, lapen neli nangliphan chethe avaikang nangpiji.

¹¹“Mondoli atum aphan karjong kepu alam ano kedo abang parjunang! “Kehaibom abang aphan batai hini aphong akethi an tame thangnat adukta pipedetji.

¹²“Pergamam amondoli mate kroi-asong apherangke aphan lasonle toknon: “Rangso hini kedo, akereset anokjir kedo abang pulo,

¹³Neli chinilo, Soitan arecho anghoi kedo adimsi nangli dolo. Nangli neliphan kekroi thirklong-lo, lapen hala Soitan kedo adim ahokpet pen neli lamjir kepachethang abang Antipas aphan kepathi ahut anta nangli neliphan kekroi o-e det-lo.

¹⁴Bonta neli nangliphan ningke-oi ason asap do: Nanglitum angbong manene atum Balaam kethan alam ke-otthip atum do. Labangso a-Balaam Israel amonit atum aphan pap kepaklemjisi Balaak aphan atovar thanlo. Halatum aphan kumlin along kethok ahormu kepachoji, lapen beisa akam kepaklemji atovar thanlo.

¹⁵Lasonsi nanglitum angbongta Nikolaitan atum kethan alam ke-otthip atum dolo.

¹⁶Tangte, ning chiruinon. Lapu kalite neli nangli long vangdap-po, lapen neli ingho pen nangkebar anokjir ensi neli halatum pen ron chedanji.

¹⁷“Mondoli atum aphan karjong kepu alam ano kedo abang parju nang! “Kehaibom atum aphan ke kepatu amanna neli piji, lapen neli abangphu-tin aphan arlong kelokta piji. Labangso arlong athak amen kemi ketok do. La kelong abang apar ke la baduta chini un-e.

¹⁸“Thiatira amondoli mate kroi-asong apherangke aphan lasonle toknon: “Me ade ason thakthak amek kedo lapen kangthilor abitoi ason thakthak kedoilor akeng kedo, Arnam a-Sopo pulo,

¹⁹Nangli keklem akam neli chinilo. Nangli akanghon, nangli akekroi, nangli keru-kethai akam keklem lapen nangli akechechakthek ajakong neli chinilo. Aphrang apar nangli non keklem ongmuchot-lo.

²⁰Bonta nangliphan neli ning ke-oi ason lahelo: nanglitum hala Jezebel pu arloso aphan pado longbomlo. Alangli amethangsi inut amontripi pu chepulo. Alangli kethan alam pen ajok neban atum aphan beisa akam paklemlo lapen kumlin aphan kethok kejir ahormu pacho pamanghulo.

²¹Alangli ning kecheruijisi neli alangliphan apor pitang-lo, bonta beisa akam pen aning kecheruiji alangli ning hanghelo.

²²Mathanon, neli alangliphan keso atum ke-i ahongplang athak vanpo, lapen alangli pen beisa keklem atum, alangli pen kechoklem akehingno akam pen aning chiruirete halatum aphan pasung-oji.

²³Neli alangli somar atum aphan pathi-etji. Anke abangphutin aning kematha lapen aning kehang alam neli chini pu kadokave amondoli mate kroi-asong atumta chinipo. Nanglitum abangphutin aphan nangli methang methang keklem akam asonthotsi neli anam piji.

²⁴“Bonta Thiatira angbong kedo nanglitum akaprek atum ke labangso kethan akehingno alam akaprek atum chethansei, Soitan akepatu karsik ason pu hei-hei nanglitum charliledet-lo. Neli nanglitum aphan nangpulang: neli nanglitum aphan akaprek anghor pen pardikdedet-lo.

²⁵Bonta neli vang-vetik-ke nanglitum kedotang ason an otthip masi.

²⁶Kehaibom abang lapen kejut anta neli kam keklembom abang aphan neli neli po pen kelong ajakongthot piji:

²⁷Neli alangliphan adet kaprek atum aphuthak ajakong piji; ingchin achin pen alangli halatum aphan pangriji lapen longle aphule hei hei ason thak-thaksi alangli halatum aphan paphuk-rairaidetji.

²⁸Lapen ke neli alangliphan klirdap achiklolongso piji.

²⁹“Mondoli atum aphan karjong kepu alam ano kedo abang parjunang!