Read Karbi KEPAKLANG 20 Bible Online

KEPAKLANG 20 - Karbi bible

KEPAKLANG 20

¹Ansi inut apherangke sining pen nangkehir neli thek-long-lo. Alangli rideng herang thepi aphlok lapen ingchin ari do.

²Alangli hala hako apherui, Chehangthepi, atheke Hi-i sarpo, mate Soitan aphan nep-cheksi ningkan suri isi an aphan kok-het-lo.

³Pherangke la aphan herang thepi arlo varthot-lo lapen ningkan suri isi pleng pletik ke adet adet amonit atum aphan kepamanghu longledetjisi labangso aherang thepi ingkirhet-lo lapen asap thenghet-lo. Labangso aphisi alangliphan cherso ahut an lophlotji.

⁴Ansi neli recho-anghoi lapen la athak kangni atum aphan thek-long-lo. Halatum kangsaiji ajakong long-lo. Jisu kethan tekang ahok alam lapen Arnam alam kepachethang apot angphun kangthantang atum akarjongta neli thek-long-lo. Halatum hala nampi api lapen a-arjan aphanta ardomdelo; lapen atehang athak, kalite ari athak nampi api angthek en-edet-lo. Halatum rengthusi Khristo along ningkan suri isi an recho chodunlo.

⁵Akaprek kethitang atum an ningkan suri isi plengpletik ke rengthuthedet-lo. Kethitang atum aphrangsi akethur la helo.

⁶La aphrangsi akethur ahut kethur dunlong atum rengme lapen ahirjume atheng-lo. Latum aphuthak hini aphong akethi thang ajakong ave; halatum Arnam lapen Khristo akurusar plangji lapen alanglilong ningkan suri isi an rat aso pangri dunji.

⁷La ningkan suri isi jutdet aphi Soitan aphan phatek kebeng pen lophlotji,

⁸lapen pirthe athak bithe bitha kedo adet amonit atum an aphan, atheke Gog lapen Magog pu adet atum aphan kepamanghujisi alangli barji. Ron kechedanjisi Soitan halatum kadokave aphan pangrumji, lapen halatum aphai talo asangti ason thak-thakji.

⁹Halatum pirthe akethepi athoi along damsi Arnam amonit atum amukam lapen Arnam kechinghon arongsopi kompet-lo. Bonta sining pen me nangklosi halatum aphan chodet-lo.

¹⁰Ansi halatum aphan kepamanghu a-Hi-i sarpo aphan hala nampi api lapen kechobei amontri aphan kevartang adim atheke me lapen meplum atalo arlo varchuiji. Lapen kejut un-e akai apar akai anta halatum aphan jo pangthang nerlosoni aduk inghoiji.

¹¹Ansi neli recho-anghoi kelok, akethe lapen la athak kangni abang aphan thek-long-lo. Alangli ingno pen pirthe lapen sining kat-lo, lapen latum aphan thekthu longle-det-lo.

¹²Ansi kethitang atum an, thedung lapen bihek amonitta recho-anghoi angno arjapphrong-lo. Halatum aphan neli thek-long-lo. Bohi hei hei purlo, lapen akaprek abohita purdet-lo, lake chethe abohilo. Amethang methang keklemtang akam an labangso abohi hei hei along tokpet-lo, lapen ketok asonthotsi kethitang atum aphan ingsaidet-lo.

¹³Ansi Arnam kepang-saijisi talota amethang angbong kedo akethitang atum aphan hodaidet-lo. Lasonthotsi kethi lapen kethitang atum kedo apirtheta amethang methang angbong kedo akethitang atum aphan hodaidet-lo. Lapen halatum keklemtang akam asonthotsi halatum kadokave aphan ingsaidet-lo.

¹⁴Ansi kethi lapen kethitang atum kedo apirthe aphan me atalo along varchuilo. (Labangso ame atalo helo batai hini aphong akethilo.)

¹⁵Chethe abohi along amen ketok kave atum an aphan ke me atalo along varchuilo.