Read Karbi KEPAKLANG 21 Bible Online

KEPAKLANG 21 - Karbi bible

KEPAKLANG 21

¹Ansi neli sining kemi lapen pirthe kemi thek long-lo. Aphrang asining lapen aphrang apirthe ke avedet-lo, lapen talota avedet-lo,

²lapen sining athak Arnam along pen Rongsopi Kangthir, atheke Jerusalem kemi nang kehir neli thek-long-lo. Labangso Arongsopi ke piso kepangriji a-arlosole hala piso kechepangriji apinso pen kechetongjisi kechepindengpame pen kechesikding ason thakthak-lo.

³Lapen Recho anghoi pen kevang ase akethepi neli arjulong-lo. La pulo, “Non pen apara Arnam kedo adim monit atum angbongsi dolo. Alangli halatum pen dorap rap-po, lapen halatum alangli arat aso plangpo. Arnam amethang mamat halatum along dopo, lapen alangli halatum a-Arnam cheplangpo.

⁴Alangli halatum amek along pen amekkri an venpo; kethi hala pen apara kaita avedetpo, aning keduk, kechiru chernap lapen kesung kaita avedetpo. Aphrang amar an damtang-lo.”

⁵Ansi recho anghoi athak kangni abang pulo, “Langnon, ne kadokave amar akemi pinchong-lo!” Alangli puthulo, “La toknon, pima labangso alam ke ahok lapen labangso alam aphan kechiki, lake ningtheklong.”

⁶Lapen alangli neliphan pulo, “La plangtang-lo! Ne helo Alpha lapen Omega, Kecheng lapen Kejut. Neke lang kang-it abang aphan akejoisi chethe kangbop alang pipo.

⁷Kehai abang aling ne pen lahei hei chepahemphu longji, pima ne alangli a-Arnam cheplangji, lapen alangli ne sopo cheplangji.

⁸Bonta kephereju atum, kekroi kave atum, keche-pangthirthe atum, pran ke-en atum beisa keklem atum, maja kanghoi atum, kumlin aphan kardom atum, lapen kechobei atum an aphan ke hala me lapen meplum pen kekar-ang atalo along var-etpo. La helo batai hini aphong akethilo.”

⁹Ansi kejut avur-akrem throksi pen keplengset aharlung hong throksi kedo, bang throksi apherangke atum angbong pen inut abang neli long vangsi pulo, “Vangnon, Biresak a-So pen piso kechepangriji dokdok a-arloso neli nangliphan paklangpo.”

¹⁰Ansi neli mek rengjeng cheplang-lo lapen pherangke neliphan kangtuipik anglong aphuchong along nepondet-lo. Alangli neliphan sining athak Arnam along pen Rongsopi Kangthir, atheke Jerusalem nangkehir nepaklang-lo.

¹¹Labangso a-Rongsopi ke Arnam adak atur pen turbong-lo, lapen lake ador keso a-arlong ason thakthak lapen loji nangnak kechithingkling a-arlong ason thak-thaksi khelanbong-lo.

¹²Lake isi kethe-o lapen kangtuipik apaisong do, anghap krehini do, anghaptin along inut nut apherangke keton do, lapen anghaptin athak Israel atum akur isi-si amen toksi kur-krehini amen tok-lo.

¹³Nihang anat anghap kethom, nitur anat anghap kethom, nirep anat anghap kethom lapen nichi anat anghap kethom dolo.

¹⁴Arlong ahemthur krehini athaksi rongsopi apaisong kimlo, lapen labangso ahemthur athak ke Biresak a-So ketoitang atum amen krehini tok-lo.

¹⁵Neliphan nekepu apherangke arideng rongsopi anghap lapen apaisong kepunji aphan ser abarlon dolo.

¹⁶Labangso arongsopi atok-ano-phli dolo lapen la arpan arjonta chingbarchit-lo. Alangli barlon pen rongsopi punlo: lake arjon kilometar 2400 dolo; arpan lapen kangtuita lapuson thakthak-lo.

¹⁷Alangli hala apaisongta punlo. La kangtui ingrup 144 an dolo. Monit atum kepun-ihur apun pensi pherangke la punlo.

¹⁸Jemper pu a-arlong pensi paisong selamlo lapen rongsopi ke loji ason thakthak kechithing-lor aser pensi selamlo.

¹⁹Rongsopi apaisong ahem-thurke arlong ajat do-an pen selamsi alon padolo. Aphrangsi a-arlong ke Jemper pu a-arlong kelir, adun abang ke Saphire, kethom abang ke Agate, phli abang ke Emerald pu a-arlong.

²⁰Pho abang ke Onex, throk abang ke Karnelien, throksi abang ke Khrisolait, nerkep abang ke Berail, sirkep abang ke Topaz, kep abang ke Chalsedoni, kre-isi abang ke Jeminth, lapen kre-hini abang ke Amethist pu a-arlong-lo.

²¹Hala anghap kre-hinike mukut-abor saidelo; anghap tinta isi-si amukut-abor pensi selamlo. Rongsopi atovarpi ke loji ason thakthak kedoilor, aju kavepin aserlo.

²²Rongsopi angbong kardom ahemthepi kangthir neli thek-longlelo, pima Hemphu Arnam Jakongtheparpik abang lapen Biresak a-So helo rongsopi angbong akardom ahem thepi kangthirlo.

²³Rongsopi angbong arni lapen chiklo ketur thangnat akenang avedet-lo, pima Arnam adak atursi labangso athak turdang-lo, lapen labangso arongsopi amelur ke Biresak a-So helo.

²⁴Labangso atur pen ajoksi adet kaprek kaprek atum doji, damji, lapen pirthe arecho atum amethang methang akhi ladak chevanji.

²⁵Rongsopi anghap nerlosinita ingpudangji; lahei hei kaita inghaphedetji; pima hadak ajo avedetji.

²⁶Adet kaprek kaprek atum adak atur lapen aman rongsopi along vanji,

²⁷Kangthirthe amar an hadak pon longledetji lapen kangthirthe akam keklem lapen kechobei abang labangso arongsopi angbong lut longledetji. Bonta Biresak a-So alohthui, atheke chethe abohi along amen ketok kedo atum ansi rongsopi lut-longchotji.