Read Karbi KEPAKLANG 22 Bible Online

KEPAKLANG 22 - Karbi bible

KEPAKLANG 22

¹Pherangke neliphan chethe alang alangroi nepaklang-lo. Lake loji ason thakthak chething-lorlo lapen Arnam lapen Biresak a-So kangni-anghoi pen ingbopsi,

²rongsopi atovarpi angbong chitimchit lilo. Langroi parai haraita chethe athengpi arong do. Lake chiklo ajontinta eboi boi athe pathesi ningkan isi angbong batai krehini athe pathelo, lapen arvo ke adet kaprek kaprek atum areng amek kepame-iji aphanlo.

³Rongsopi angbong Arnam ahirjuno kepho amar isi natta avedetji. Arnam lapen Biresak a-So anghoi rongsopi angbongsi dopo, lapen aban atum alangliphan ingduk-ardompo,

⁴Halatum alangli mahang thek-longji lapen alangli men halatum atehang athak tokdetji.

⁵Hadak kaita ajo avedetji, lapen halatum melur lapen arni atur nangnedetji, pima Hemphu Arnamsi halatum aphan turdangji; lapen kejut un-e akai apar akai anta halatum recho ason thak-thaksi rat pangriji.

⁶Ansi pherangke nephan pulo, “La hei hei alam ahok lapen kekroi ning theklong. Lapen Hemphu Arnam, atheke amontri atum aphan amethang akarjong kepi abang amethang aban atum aphan la keplangji dokdok alam kepaklangjisi amethang apherangke nangtoilo.”

⁷Jisu pulo, “chini iknon! Ne vangdap-prangpo! Labangso aloh along kedo, kemontri alam hei hei kekroi abang rengme!”

⁸Neli Jongsi lahei hei alam arjulong-lo lapen thek-long-lo. Lapen lahei hei alam arjulongdet lapen thek-longdet aphi neliphan lahei hei nekepaklang apherangke aphan kangduk-kardomjisi neli alangli kengri domkhrup-lo.

⁹Bonta alangli neliphan pulo, “Lapuson klemri! Nanglitum lapen nanglitum akorte, atheke Arnam amontri atum, lapen labangso aloh along kedo alam hei hei kekroi atum ason thak-thaksi nelita Arnam aban chot-lo. Arnam aphanle ingduk-ardomnon!”

¹⁰Lapen alangli neliphan pulo, “Labangso aloh along kedo kemontri alam hei hei paturi, pima lahei hei plangji dokdok-lo.

¹¹Kehingno keklem abang kehingno paklembomnang, aning kangthirthe abang pachepangthirthe bomnang, dhoromi abang dhoromi akam paklembomnang lapen kangthir abang pachepangthir-etbomnang!”

¹²Jisu pulo, “chininon! Ne vangdap-prangpo! Abangphutin aphan amethang methang keklem akam asonthotsi nong-e kepiji aphan ne nong-e vanji.

¹³Ne helo Alpha lapen Omega, Aphrangsi lapen Aphisi, Kecheng lapen Kejut.”

¹⁴Chethe athengpi athe kecho longji lapen anghap pen rongsopi kelut longji aphan amethang methang achoi keding kechechok abang rengme.

¹⁵Bonta a-ot kelangno atum, maja kanghoi akam keklem atum, beisa akam keklem atum, pran ke-en atum, kumlin kardom atum lapen kechobeiji aning kehang lapen kechobei akam hei hei keklem atum an rongsopi angtansi dolo.

¹⁶“Mondoli atum aphan kepachinijisi nangliphan la hei hei alam nangke-pathanji aphan neli Jisusi neli methang apherangke nangtoilo. Neli ke David asu lapen ahem asangholo; neli helo keturbong Aklirdap achiklolongsolo.”

¹⁷Karjong lapen nonhetsi keche-pangritang a-arloso pulo, “Vangnon, Hemphu Jisu!” Labangso alam karjulong abang “Vangnon!” pule papunang. Lang kang-it abang aling pavang-nang; aning kehang abang aling chethe alang akejoile pajunnang.

¹⁸Labangso aloh along ketok akemontri alam hei hei karjulong abangphutin aphan neli pacheretoilo: mane abang jongsi labangso alam pachan lote alangli phan Arnam labangso aloh along kepaklangtang akesung hei hei pisi pasungthu muchotji.

¹⁹Lapen mane abang jongsi labangso aloh akemontri alam hei hei angbong pen kopine alam pavedet lote Arnam alangli long pen labangso aloh along kechaktang ahirjume hei hei cheponthudetji. Alangliphan chethe athengpi athe pacho longledetji, lapen Rongsopi Kangthir angbongta padodun longledetji.

²⁰Labangso alam hei hei kethan kepachini abang pulo, “Ahok-lo! Neli vangdap-prangpo!” Lapule paplang nang. Vangnon, Hemphu Jisu!

²¹Hemphu Jisu akangjinso kadokave atum along pado nang! Amen.