Read Karbi KEPAKLANG 3 Bible Online

KEPAKLANG 3 - Karbi bible

KEPAKLANG 3

¹“Lapen Sardis amondoli mate kroi-asong apherangke aphan toknon: “Arnam akarjong throksi lapen chiklolongso throksi kedo abang pulo. Nangli kam hei hei neli chinilo; atheke nanglike akethitang-lo setta reng-et pusi nangli nong chethang-lo.

²Mek prangra thurnon lapen non kedolang, kethiji dokdok aphan jakong kemi pinon. Pima neli thek-long-lo, nangli keklem akam hei hei Arnam angno kechok-lim kalilang.

³Tangte nangliphan nangkethantang alam lapen nangli karjulongtang alam chemathathunon; labangso alam kroira nang ning chiruinon. Nangli jongsi mek prangpre tangte, neli kanghu ason nanglilong vangji, lapen neli kevangji apor anta nangli chininedetji.

⁴Bonta nanglitum atheke Sardis kedo atum angbong penang atum ke nanglitum ape chepangthir-etsi bilo. Nanglitum pe kelok chepindengsi neli pen kengkam chejorji, pima nanglitum lapuson keklemji a-ot do.

⁵Kehaibom abang aphan lapusonsi pe kelok pindengji lapen chethe aloh along pen neli halatum amen paprai-predetji. Neli Po angno lapen ke alangli pherangke atum angno neli halatum anke neliphan kekroi atum pusi chekrongji.

⁶“Mondoli atum aphan Karjong kepu alam ano kedo atum parjunang!

⁷“Philadelphia amondoli mate kroi-asong apherangke aphan lasonle toknon: “Ahok lapen kangthir abang kepu alam lahelo. Alangli ridengsi David aphlok do, lapen alangli ingpulote baduta la ingkir un-e detji, lapen alangli ingkir lote baduta la ingpu un-e detji.

⁸Neli nangli kam chinilo. Nangli jakong asapnat-lo; tebonta nangli neli lam patepekpedetlo, lapen neliphan kroi pamelo. Neli nangli ingno kangpudang anghap bitang-lo lapen lake baduta inghap un-e lo.

⁹Mathanon: Hala kalidet setta amethangsi Jihudi atum pu kechepu, kepachobaichot, Soitan amei amonit atum aphan neli nangli kengri pavangsi nangliphan pardom khrupji. Ansi neli nanglitum aphan inghon pu halatum kadokaveta chiniji.

¹⁰Pima ningkeding pen kechechakjisi neli nanglitum aphan kepi ahukum nanglitum kekroi apot, kevangji dokdok akesungpik pen pirthe amonit kedo-an aphan asat kelang-i-ji ahut neli nangliphan abang nangpajokji.

¹¹Neli vangdap-prangpo. Nangli kehai apot kelong anong-e baduta kethiponpe-detjile nangli kedo ahormu an ot-thipnon.

¹²Kehaibom abang aphan neli Arnam aphan kardom-kangduk ahemthepi kangthir anujok paplangji, lapen alangli kaiketa ladak pen barbedetji. Alangli phuthak neli neli-Arnam amen, lapen Arnam arongsopi amen, lapen neli men kemita neli tokji. Atheke ha sining angsong Arnam pen nangkehir a-Jerusalem kemi helo.

¹³“Mondoli atum aphan karjong kepu alam ano kedo abang parju nang!

¹⁴“Laodesia amondoli mate kroi-asong apherangke aphan lasonle toknon: “Ha Amen, atheke kekroi thirklong lapen ahok ahaki, lapen Arnam kadokave kepinchong kecheng-i abangsi pulo,

¹⁵Nangkam hei hei neli chinilo, nangke sodakta kali, lapen ingsamhekta kalilo. Nangli ingsam-hek, kalite sodak asonte me-oji apot-lo!

¹⁶Nang ke sodakta kali, ingsamhekta kali, bonta sopoi chot-lo apotsi neli ingho pen ning kevang asonsi neli nangliphan ching-ok-phlotji.

¹⁷Nangli pulo, ‘Neli plang-o lapen neli kenangji ason an neli long do; neli kedorde ason thangta ave.’ Bonta nangli ko-an akeduk loma, ko-an akangjinsomeme abang-loma, lake nangli chechininelo! Nanglike keboidet, reng-angse lapen mek kave abang-lo.

¹⁸Neli nangliphan than paresi pupo, nangli keplang-o thekji aphan neli pen kepherangtang aser nam non. Nangli methang kechepindengji lapen ketherak meme areng-angjang abang kechedipji aphan neli long pen akelok ape namnon. Lapen nangli mek kechecharji aphan nangli mek kechehijile neli pen bap amolomta nam non.

¹⁹Neli kechinghon atum an aphan neli ingchekbom, lapen arengta pasobom. Lasi mathapamera ning chiruinon.

²⁰Langnon! Neli inghap angno arjapthersi pachengbomlo. Neli se karjulong lapen inghap kangpu abang ahem neli lutdampo lapen neli alangli pen, lapen alangli neli pen cho rap rappo.

²¹Neli methangta haidetsi neli Po pen recho anghoi athak ingnisi kangsai rap rap asonthot, lason thak-thaksi kehaibom abang aphan neli, neli kangni arecho anghoi athak neli long nangpangni dunlongji.

²²“Mondoli atum aphan Karjong kepu alam ano kedo abang parju nang!”