Read Karbi KEPAKLANG 4 Bible Online

KEPAKLANG 4 - Karbi bible

KEPAKLANG 4

¹Labangso aphi neli langsi thek-long-lo, Sining athak inghap isi ingpudangsi dolo. Lapen aphrang neli karjulongtang, Pong-ut nangnak ase neliphan pulo, “Ladak an vangnon, labangso aphi kopipi plangjima, neli nangliphan paklangpo.”

²Tongsekotsi neli phuthak Karjong pen plengset-lo, lapen neli thek-long-lo, Sining angsong recho anghoi isi athak inut amonit ingnilunsi dolo.

³Hadak kangni abang a-arje ke Jempar pu a-arlong ason thakthak lo, lapen recho anghoi bithe bitha ke emerald a-arlong ason kelirseng amukaksi hingkomchenlo.

⁴Lapen akaprek ingkoira phli arecho anghoi ke, halabangso arecho anghoi aphan komjaisi dolo, lapen halabangso arecho anghoi hei hei athak bang ingkoira phli akesar atum ingnilo. Halatum pe kelok chepindeng-lo, lapen Ser avaikang chekup lo.

⁵Recho anghoi pen Sining ame, lapen ase arki hei hei lapen Sining kangreng ase hei hei vangbomlo. Recho anghoi angno kekar-ang athengtom throksi dolo. Lake Arnam akarjong throksi lo.

⁶Lapen recho anghoi angno kechithing-lor a-arlong ason, loji atalo nangnak kopine dolo lapen recho anghoi hihi anat kereng api jonphli komsarlo. Halatum angno lapen anung anatta ameksi dothip lo.

⁷Aphrangsi api ke hingho ason thakthak lo, adun api ke chainong alo ason thakthak-lo, adunthu api ke monit amahang ason thakthak amahang do, lapen aphisi api ke kangjar patelang avomupi ason thakthak-lo.

⁸Halabangso jonphli api ke ajontinta arveng pak throk pak throk dolo, lapen arveng aber athak bithe bitha ameksi dothip-lo. Nerlosini-jopangthangta halatum lun kelun o-e det-lo: “Kangthir, kangthir, kangthir, Hemphu Arnam, Kadokave keklem un abang; kedotang, kedobom lapen kevangji abang alangli helo.”

⁹Lapen jonphli api atum hala recho anghoi athak kangni, lapen kejut un-e akai kerengver abang aphan Lun pen adak atur lapen aman, lapen kero pilo. Lapuson keklem ahut aling

¹⁰hala akesar bang ingkoira phli atum ke recho anghoi athak kangni abang angno domkhrupsi kejut un-e akai anta kerengver abang aphan ingduk-ardomlo. Halatum amethang methang aphu avaikang chephloksi recho anghoi angno bikoksi pulo,

¹¹“Nang helo netum a-Hemphu lapen netum a-Arnam. Nangsi kadokaveta pinchong-lo, lapen nangning kehang asonthotsi halatum aphan paplang-lo lapen pinchong-lo, Lasi nang adak-atur, lapen man lapen jakong kelongji a-ot do.”