Read Karbi KEPAKLANG 5 Bible Online

KEPAKLANG 5 - Karbi bible

KEPAKLANG 5

¹Recho anghoi athak kangni abang ari ar-e along isi aloh athui neli thek long-lo. Labangso aloh athui anung lapen angno anatta ketok do, lapen la Sap throksi pen thengthip-lo.

²Lapen neli thek long-lo, inut ajakong kethe apherangke, ase kethe pen pulo, “Labangso asap hei hei kephlokji lapen loh athui kepurji matsi a-ot doma?”

³Bonta Sining athak, kalite pirthe athak, kalite pirthe arum kedo atum baduta labangso aloh athui pur un-e, kalite arlo lang un-e det-lo.

⁴Loh athui kepurji, kalite labangso arlo kelangji a-ot kedo abang aphan long thekthedet apotsi neli chirupik-lo.

⁵Ansi akesar atum angbong pen inut abang neli phan pulo, “Chiruri! chininon, Judah akhei pen Hingho, David asu inut abang haitang-lo. Alangli hala throksi asap phlok un, lapen kethui alohta pur un.”

⁶Lapen neli thek long-lo, recho anghoi lapen hala kereng-et jonphli api lapen akesar atum angbong ejon kethutang asonthot a-Biresak aso arjaptherlo. Lake anu hongthroksi lapen amek throksi do. La hei hei ke pirthe athak nangketoitang Arnam akarjong throksilo.

⁷Labangso a-Biresak aso damsi recho anghoi athak kangni abang ari ar-e along pen loh athui enlo.

⁸Alangli loh athui ke-en aphijong hala jonphli kereng-et api lapen akesar bang ingkoiraphli atum Biresak aso angno domkhrup-lo. Halatum abangphutinta kum isi-si lapen Ser aharlung dolo. Harlung along hijungsi plengset-lo. Lake kangthir atum Arnam aphan akardomlo.

⁹Halatum lun kemi eson lun lo: “Nang hala kethui aloh ke-enji lapen asap hei hei kephlokji a-ot do. Pima nangliphan thu tang-lo, lapen nangli vi pen nangli Arnam aphan panongsi akurtin pen, alamtin pen, ajattin pen lapen adettin pen monit aphan namlo.

¹⁰Arnam aphan kepaklempijisi nang halatum aphan kurusar arat paplang-lo, lapen halatum pirthe aso aphan pangriji.”

¹¹Ansi neli thek long-lo, lapen suri suri, lak lak apherangke atum ase arju long-lo. Halatum recho anghoi, kereng-et api jonphli lapen akesar atum aphan komjailo,

¹²lapen ase kethe pen lun lunlo: “Kethutang a-Biresak a-So ke jakong, akhi, gian, jakong kethe, man, adak-atur lapen ahirjume kelongji a-ot do!”

¹³Ansi sining athak, pirthe athak, pirthe arum lapen talo arlo kedo api an, atheke, la kadokave adim kedo akereng api an lun kelun neli arjulong-lo: “Recho anghoi athak kangni abang aphan lapen Biresak a-So aphan, ahirjume, man, adak-atur lapen ajakong kejut un-e akai apar akai anta padonang,”

¹⁴Kereng-et api jonphli atum pulo, “Amen!” Lapen akesar atum domkhrupsi ingduk ardomlo.