Read Karbi KEPAKLANG 6 Bible Online

KEPAKLANG 6 - Karbi bible

KEPAKLANG 6

¹Ansi Biresak a-So hala throksi asap angbong pen sap isi kangpu neli thek-long-lo, lapen hala jonphli api atum angbong pen ejon abang sining kangreng ason thakthak ase pen “Vangnon!” pu kepu neli arjulong-lo.

²Neli langsi hadak losei kelok ejon thek long-lo. Kardon abang arideng thai do, lapen alangliphan phu avaikang pilo. Alangli kehaibom abang asonthotsi kehaiji aphan barlo.

³Lapen Biresak a-So adun asap kephlok ahut adun akereng-et api “Vangnon!” pu kepu neli arjulong-lo.

⁴Akaprek ake-ang alosei ejon nangbarlo, Monit atum lahin lahin kechepathijisi labangso alosei athak kardon abang aphan pirthe athak ron kangthurji ajakong pilo. Alangliphan nokjir aketheta pilo.

⁵Lapen Biresak a-So kethom asap abang kephlok ahut kethom akereng-et api abang “Vangnon!” pu kepu neli arjulong-lo. Neli langsi losei ke-ik ejon thek-long-lo. Labangso alosei athak kardon abang arideng thuli isi do.

⁶Lapen hala kereng-et api jonphli atum angbong pen kevang nangnak ase neli arjulong-lo. La pulo, “Sok tepli elin anam arni isi kangdat anam pen chingbarchit lapen Barli linthom anam arni isi kangdat anam pen isipet lo. Bonta jangthu lapen drakha ahorlang phangnori.”

⁷Ansi Biresak a-So phli asap abang kephlok ahut phli kereng-et api abang “Vangnon!” pu kepu neli arjulong-lo.

⁸Neli langsi lok-hik alosei thek-long-lo. Kardon abang amen ke “Kethi” puhelo, lapen chom arong alangli phi phi dunkrilo. Lapen nokjir pen, akhim pen, avur pen, lapen nampi api pen pirthe phanphli angbong pen ephan aphan kepathijisi halatum aphan ajakong pidet-lo.

⁹Lapen Biresak a-So pho asap abang kephlok ahut dovan arum kethitang atum akarjong neli thek-long-lo, thangbakma, Arnam alam kepachethang lapen haki kepi apotsi halatum aphan pathilot-lo.

¹⁰Halatum ase kethe pen hangjolo, “Hemphu, Jakong kethe parpik abang, kangthir lapen ahokpet abang! Nelitum aphan nekepathi apot nangli pirthe athak amonit atum aphan kangsaiji lapen ado kepadoji a-arni nangkeleji non ni ko-an dolangma?”

¹¹Halatum abangphutin aphanta choi keding akelok pirep lo, lapen halatum aphan pulo, “Nangtum aphan ason thak-thaksi nangtum pen keklem rap rap, Arnam aban atum aphan lapen nanglitum akorte atum aphanta pathiji; labangso kethi nangji aphai chokchetik ke malomso ahut an nangtum dokliptha.”

¹²Ansi Biresak a-So throk asap abang kephlok ahut neli thek long-lo, hadak chikli thepi vang-lo, lapen arni ke pe-thoila ason thakthak ik-lunlo, lapen chiklo kepleng ke vi ason thak-thak erhang-lo.

¹³Tomonpile thebo arong kejap-ra akevai athe kepangjui ason thak-thaksi sining achiklolongso atum pirthe athak nangkloprelo.

¹⁴Lo athui kethui ason thak-thaksi sining avejun-jun avedet-lo, lapen inglongtin lapen lang-lomtin aphan adim pen terekphit-lo.

¹⁵Ansi pirthe arecho atum arleng kethe atum, lapen chedanbang bangpharo ahemphu atum, keplang-o lapen, ajakong kethe atum, lapen ban abangphutin lapen ban kalidet atum an longku hei hei arlo lapen inglong a-arlong hei hei arum chepatulo.

¹⁶Halatum hangjojosi inglong hei hei lapen arlong hei hei aphan pulo, “Netum athak nang ingreibupra hala recho anghoi athak kangni abang angno pen, lapen Biresak a-So aning kethi pen netum aphan patutha!

¹⁷Halatum aning kethi akepherememe a-arni nangletang-lo! Labangso abang angno matsi arjap unjima?”