Read Karbi KEPAKLANG 7 Bible Online

KEPAKLANG 7 - Karbi bible

KEPAKLANG 7

¹Labangso aphi pirthe atok phli along karjapphrong, sining aphe-rangke bangphli atum aphan neli thek long-lo. Pirthe, kalite talo athak, kalite thengpi arong athak tomon kepavang vedetjisi halatum pirthe atomon phli khangpamelo.

²Lapen nihang arni kevang anat pen akaprek apherangke kevang neli thek long-lo. Arideng kereng-et Arnam asap do, lapen hala pirthe lapen talo aphan kephangnoji ajakong kelongtang apherangke bangphli aphan ase kethe pen hangsi pulo,

³“Nelitum Arnam aban atum atehang athak sap thengthetik-ke pirthe, kalite talo, kalite thengpi arong hei hei phangnori.”

⁴Lapen Israel akurtin angbong pen ensi sap kethengtang atum aphai kadokave bang 144,000 dolo pusi neliphan thanlo.

⁵Judah akur angbong pen sap kethengtang atum aphai bang 12,000, Reuben akur angbong pen bang 12,000, Gad akur angbong pen bang 12,000,

⁶Asher akur angbong pen bang 12,000, Naphtali akur angbong pen bang 12,000, Manase akur angbong pen bang 12,000,

⁷Simon akur angbong pen bang 12,000, Levi akur angbong pen bang 12,000, Issakar akur angbong pen bang 12,000,

⁸Zebulun akur angbong pen bang 12,000, Joseph akur angbong pen bang 12,000, Benjamin akur angbong pen sap kethengtang atum aphai bang 12,000 dolo.

⁹Labangso aphi neli armu ake-ongpi thek-long-lo. Halatum aphan baduta lakha un-edet-lo. Halatum ke akheitin, akurtin, adettin lapen alamtin pen kechingrum atumlo. Halatum akelok ape keding chepindengsi, lapen ari pen sotele arvo otkreisi recho anghoi angno lapen Biresak a-So angno arjap phrong-lo.

¹⁰Halatum ase kethe pen hangsi pulo, “Nelitum a-Arnam, atheke, recho anghoi athak kangni abang lapen Biresak a-So alongsi kejok dochot.”

¹¹Arnam apherangke kadokave atum hala recho anghoi lapen akesar atum aphan, lapen kereng api jonphli aphan komjaisi arjapphrong-lo. Ansi halatum recho anghoi angno domkhrupsi Arnam aphan ingduk-ardomlo,

¹²lapen pulo, “Amen! Kejut un-e akai apar akai anta nelitum a-Arnam along ahirjume, lapen adak-atur, lapen gian lapen kero, lapen man lapen jakong hei hei padonang! Amen!”

¹³Akesar atum angbong pen inut abang neliphan arjulo, “La kelok ape keding kechepindeng atum komat atum ma, lapen konat pensi kevangma?”

¹⁴Neli alangliphan thakdunsi pulo, “Neli chinine hemphu, Nanglisi chinilo.” Alangli neliphan pulo, “Latum ke hala kesungpik akechenek angbong pen joksi kevang atumlo. Latum Biresak a-So avi pen amethang methang ape keding choksi palokphlanlo.

¹⁵Lasi latum Arnam anghoi angno arjapphrong-lo lapen alangli kardom ahem thepi arlo alangliphan ingdukbomlo. Recho anghoi athak kangni abang halatum along do dunsi halatum aphan raiji.

¹⁶Non pen apara halatum kaiketa an ingchirche, lang ing-it-epinpo; arni, kalite kesopik angtang ta halatum aphan pasungsedetpo,

¹⁷pima la recho anghoi angbong kedo a-Biresak a-Sosi Biresak kevi abang ason thakthak halatum aphan viji, lapen kaiketa kelivoi alang kangbop along alangli halatum aphan japonji. Lapen Arnam halatum amek pen amek-kri an venji.”