Read Karbi KEPAKLANG 8 Bible Online

KEPAKLANG 8 - Karbi bible

KEPAKLANG 8

¹Biresak a-So throksi asap abang kephlok ahut porphai ebeng anbak sining athak ingsamrilo.

²Ansi neli Arnam angno bang throksi apherangke karjapphrong thek-long-lo. Halatum aphan pong-ut throksi pidet-lo.

³Lapen sining apherangke anut kaprek abang vangsi dovan adung arjaptherlo. Alangli long methek kebi-i aser aharlung do. Recho anghoi angno kedo, ser adovan athak kangthir atum akardom along kepangvuidunjisi alangliphan hijung pi-olo.

⁴Kekai ahijung amehi kangthir atum akardom pen pen sining apherangke arideng pen Arnam angno arludamlo.

⁵Ansi pherangke methek aharlung enlo, lapen dovan athak kedo ame akri pen la paplengsi pirthe athak varchorlo. Ansi sining ingderlo, arki thepik-lo, sining birlak-lo, lapen chikli vang-lo.

⁶Ansi pong-ut throksi kedo aphe-rangke bang throksi atum pong-ut kebutjisi chesikding-lo.

⁷Aphrang apherangke abang apong-ut chebut-lo, lapen vi pen kepangvuisai aherai lapen ame pirthe athak nangklolo. Pirthe phanthom angbong pen ephan, thengpi arong an phanthom angbong pen ephan lapen lirseng abap kereng an me cho-et-lo.

⁸Ansi adun apherangke abang apong-ut chebut-lo, lapen me kekar-ang anglong nangnak kopine ason talo along varchuilo.

⁹Langthepi phanthom angbong pen ephan vi cheplangdet-lo, talo arlo kedo akereng api phanthom angbong pen ephan thi-lo, lapen telong an phanthom angbong pen ephan virdet-lo.

¹⁰Ansi kethom sining apherangke abang apong-ut but-lo. Thengtom ason thakthak kekar-ang achiklolongso akethepi sining athak pen nangklolo, lapen lake langroi an phanthom ang-bong pen ephan athak lapen lang amek athak klolo.

¹¹(Achiklolongso amen ke “Akeho” puhelo.) Lang phanthom angbong pen ephan hodak-lo, lapen ake-ongpi amonit atum labangso alang kejun pen ajok thi-lo, thangbakma, la hodak cheplang-lo.

¹²Ansi phli apherangke abang apong-ut chebut-lo. Arni phanthom angbong pen ephan, chiklo phanthom angbong pen ephan lapen chiklolongso phanthom angbong pen ephan aphan chok-lo. Lasi latum phanthom angbong pen ephan ke klarkledet-lo, anerlo phanthom angbong pen ephan akethe-ang avedet-lo lapen ajo phanthom pen ephan ke lapuson thakthak cheplang-lo.

¹³Lapen neli thek-long-lo, lapen arjulong-lo; kangtuiving kangjar avomu ase kethe pen pulo, “Mai! Nahokdet-ong! Nahokdet-ong! Hala akaprek bang kethom apherangke atum kebutji dokdok apong-ut kebutji ahut pirthe athak kedo atum an ko-an akesung pho nangpoma!”