Read Karbi KEPAKLANG 9 Bible Online

KEPAKLANG 9 - Karbi bible

KEPAKLANG 9

¹Ansi pho apherangke abang apong-ut chebut-lo. Sining pen pirthe athak nangkeklotang achiklolongso neli thek-long-lo, lapen Aklong kave aherangpi ahilik aphlok la aphan pidet-lo.

²Labangso achiklolongso la herangpi ahilik ingpulo, lapen me herangpi amehi ason thak-thaksi labangso ahilik pen mehi nangbar-osi arni lapen tomon aphan opthip-lo.

³Mehi angbong pen longvur atum pirthe athak nanghirlo lapen chehe langbong apivo ajakong ason thakthak ajakong halatum aphan pilo.

⁴Atehang athak Arnam asap ketheng kave atum an aphan ansi kepasungjisi halatum aphan hukum pichot-lo, bonta bap kereng, thengpi arong lapen thengpiso arong hei hei aphan kephangnoji ahukum pipelo.

⁵Labangso amonit atum aphan kepathiji ahukum longvur atum aphan pipedet-lo, bonta chiklo jonpho an halatum aphan aduk kanghoiji ahukumsi pichot-lo. Labangso aduk kanghoi akesung ke chehe langbong kechek akeso ason thakthak-lo.

⁶La chiklo jonpho ang-bong monit atum kethiji abidisi riji setta longledetji, halatum kethiji ingtung-oji, bonta kethi halatum pen katji.

⁷Longvur atum ke ron kechedanji aphan kesiktang alosei atum nangnak-lo. Halatum aphu athak ser avaikang nangnak avaikang dolo, lapen halatum amahang ke monit atum amahang nangnak-lo. Halatum aphu athak ser avaikang nangnak avaikang dolo, lapen halatum amahang ke monit atum amahang nangnak-lo.

⁸Halatum achu ke arlosomar atum achu ason thakthak, lapen halatum aso ke hingho aso ason nangnak-lo.

⁹Halatum ingchin ajakhor nangnak pen aning chedenlo, lapen halatum arveng arki-ke ron kechedan along ronhemkonglong kevungpon alosei atum kangplong arki nangnak-lo.

¹⁰Halatum chehe langbong apivo arme lapen ajokkasu nangnak arme lapen ajokkasu dolo, lapen halatum arme dongsi monit atum aphan chiklo jonpho an aduk kanghoiji ajakong do.

¹¹Halatum aphuthak recho inut do. Labangso abang ke hala herangpi ahemphu helo. Alangli men Ibri alam penke Abaddon, lapen Grik alam penke Apollyon puhelo. (Alam atheke “Kepavir abang” puhelo.)

¹²Aphrang ingdeng isi akesung ke juttang-lo; labangso aphi ingdeng hini akesung vangjilang.

¹³Ansi throk apherangke abang apong-ut chebut-lo. Arnam angno kedo ser adovan anu hongphli pen kevang ase neli arjulong-lo.

¹⁴Labangso ase throk apherangke abang aphan pulo, “Hala Euphratis alangroithepi akung kekokhet apherangke bangphli aphan lophlotnon!”

¹⁵La bangphli apherangke aphan lophlot-lo. Pima, halabangso apor, lapen a-arni, lapen achiklo lapen aningkan ahut monit kedo an phanthom angbong pen ephan aphan kepathijisi halatum aphan pathik tang-lo.

¹⁶Losei athak kardon aron-aso atum aphai neliphan thanlo, lake lahelo: suri kep pabatai suri ingkoi.

¹⁷Lapen neliphan kepaklang alam angbong neli losei atum lapen latum athak kardon atum aphan thek long-lo. Halatum me ason thakthak ke-er, Saphire a-arlong ason thakthak kelir lapen meplum ason thakthak ke-et a-ingchin achepan chepindeng-lo. Losei atum aphu ke hingho atum aphu nangnak-lo, lapen halatum angho pen me, mehi, lapen meplum nangbarlo.

¹⁸La sonthom avur, atheke losei atum angho pen nangkebar ame, amehi, lapen me-aplum pen monit atum aphan phanthom angbong pen ephan aphan pathilo.

¹⁹Pima losei atum ajakong ke angho lapen arme alongsi dolo. Halatum arme ke pherui nangnak-lo, lapen la anglongpi-heihei ke aphuta dolo. Lahei hei pensi halatum monit atum aphan aduk inghoilo.

²⁰Kedolang amonit atum an, atheke, labangso akesung pen kethithelang atum ke amethang methang ari pen kethip ahormu pen aning chiruiredet-lo. Halatum hi-i aphan lapen Ser, Rup, Bitoi, arlong, lapen thengpi pen keselam, amek kechecharchedet, karjulongledet lapen kengkam kechejor thekthedet akumlin hei hei aphan kangduk-kardom o-edet-lo.

²¹Halatum pran ke-en, kalite, maja kanghoi akam, kalite beisa, kalite kanghu akam pen aning chiruiredet-lo.