Read Karbi RUTH 2 Bible Online

RUTH 2 - Karbi bible

RUTH 2

¹Non Naomi, alangli penan adon inut dolo, la plang-o amonit, lapen Elimelek aro, amen Boaz.

²Lapen Ruth, la Moabpi, Naomi aphan pulo, “Neliphan nelikangjinsoji abang arit sok tipli abu kehumjile nelipadam long iktha.” Lapen alangli bangpi aphan thak-lo, “Damnon pei.”

³Lasi bangpi rit dam lo lapen kerot atum aphi aphi humlo lapen humbomsi Elimelek aro, ha Boaz arit adang anat nanglerok-lo.

⁴Lapen langtha, Boaz Bethlehem pen vangsi, kerot atum aphan alangli pulo, “HEMPHU nangtum along padonang!” Lapen halatum thak-lo, “HEMPHU nangpahirjume nang.”

⁵Ansi Boaz kerot atum keja abangphan pulo, “La komat a-osopilo?”

⁶Lapen kerot atum keja abang thak-lo, “La ke Moabpi, Naomi along Moab adet pen nangkedun abangpilo.”

⁷Labangpi pulo, “Neliphan ingjinsora sok tipli apeng adak keklo abu kerot atum aphi aphi neli pangrumlong iktha.” Lasi bangpi vang-lo lapen adapprang pen non an sangse pin pen humbomlang.

⁸Anke Ruth aphan Boaz pulo, “Non nelilam arju iktha pei, along kaprek arit humdamrinon lapen dak orinon, bonta neli banpi atum adungle do iknon.

⁹Halatum kerot arit aputhak le nangmek chebinon lapen aphi phi dunnon. Neli banpo atum nangliphan ke-ot-edetji aphan ne hukum pitang-lo kalima? Lapen nangli lang kang-it ahut risomar atum kesoktang alang tebuk-hei hei adung damra lang jun damnon.”

¹⁰Ansi bangpi amahang longle paphosi ardomkhrup-lo, lapen alangliphan pulo, “Nangli neliphan kopi athesi pu-an ingjinsoloma? Neli adet kaprek amonit aphan kopisi la an lang nangjima?”

¹¹Bonta Boaz alangliphan thak-lo, “Nangli penan thilot pen nanglinipi aphan nangli ko-an klem loma lahei neliphan than-et-lo, lapen nangli kosonsi nanglipo nanglipei lapen methang mahang kethek adim che-osi aphrang pen chininepinlang arat atum along vang-lo.

¹²HEMPHU nangli keklemtang akam ale nangpapi lonang, lapen nangli Alangli vengkong arum vang pen kechepachong a-HEMPHU, la Israel a-Arnam isi plenglim anong-e nangliphan nangpapinang.”

¹³Ansi bangpi pulo, “Nangli neliphan kangjinso thepik-lo, hemphu, athe nangli neliphan ning pangsamlo, neli nangli banpi atum angbong inut kalidet seta nanglibanpi aphan kanghon pensi ningjelo.”

¹⁴An kecho apor Boaz alangliphan pulo, “Dak vang-ra him ajehak nang-chotha, lapen nangli him ta hanthor alang along chonimtha.” Lasi bangpi kerot atum adung chongnidunlo, lapen alangli sang-karnu bangpi aphan pachonlo lapen bangpi ingkrangkretik an, cholo lapen asap-o ahin dolang.

¹⁵Lapen kehumthujisi alangli thurlo, lapen Boaz risomar atum aphan pinkhatsi pulo, “Labangpi apeng pen seta pahumnang lapen nangtum bangpi aphan patherak-ri.

¹⁶Lapen ajehak apeng pen san-ra bangpi kehum jile otekangnon lapen bangpi aphan ingchek-ri.”

¹⁷Ansi bangpi arni ingsamsetik an rit along sok tipli humlo; lapen kehumtang an pamlo lapen edang anbak soktipli long-lo.

¹⁸Lapen alangli la ponsi rongsopi chedamlo, lapen soktipli kehumtang an anipi aphan paklang-lo lapen ingkrangling aphi kecho un-e ahin asang-karnuta van pisi pajirlo.

¹⁹Anipi alangliphan pulo, “Pini nangli konatsi soktipli kehum lo? Lapen nangli kodaksi kam keklemdunloma? Nangliphan kelang abang ahirjume atheng paplang-lonang.” Ansi anipi aphan alangli komat pensi kam klem loma la chethanlo, lapen pulo, “Neli pini kam keklemdun abang amen lake Boaz.”

²⁰Lapen Naomi amunpi aphan pulo, “HEMPHU pen ajok alangli hirjume atheng paplangnang. Alangli kerenglang mate kethitang atum aphan seta kangjinso o-edet-lo!” Naomi alangliphan pulo, “Bangso amonit ilitum kechephonei adon angbong inut-lo.”

²¹Lapen Ruth, la Moabpi pulo, “La anchot kali, alangli neliphan pulang, ‘Neliban atum soktipli kerot tangtetik an nangli halatum pen che-ori.’”

²²Lapen Naomi amunpi Ruth aphan pulo, “Alangli abanpi atum along kedun lake mesenlo, pei, along kaprek arit ke bang nangliphan nang otdet tahai.”

²³Lasi alangli Boaz abanpi atum along soktipliso lapen soktipli rottangtetik an dunlo lapen anipi alongsi dobomlo.